HUGOT NGA KONDENAHON ANG LAIN NA USAB NGA PAGSAKA SA PRESYO SA GASOLINA

Cesar Renerio
Spokesperson
NDF-North Central Mindanao
Hunyo 15, 2004

Ang National Democratic Front�North Central Mindanao (NDF-NCM) hugot nga miduyog sa katawhan pagkondena niining dugang na usab nga pagsaka sa presyo sa gasolina nga miresulta usab sa paglumbaanay pagsaka sa presyo sa mga batakang komoditi ug serbisyo. Sa pagsaka sa presyo sa gasolina miusbaw usab ang plitehan sa transportasyon; ug kay ang mga produkto ug tawo mosakay man natural nga usbawan usab ang presyo sa mga produkto nga isakay niini; ug hangtod nga magkatay-katay na dayon kini.

Angay�ng hugot nga tulisokon sa katawhan ang pagka-itoy sa rehimeng Macapagal-Arroyo sa pagpadayon niining Oil Deregulation Law nga gidikta sa WTO. Diha sa pagsunodsunod niya sa dikta sa iyang mga langyawng amo pinaagi sa pagpalusot sa iyang makadaot nga mga ekonomikanhong palisiya sa liberalisasyon, deregulasyon ug pribatisasyon, grabeng naigo ug samot nga nagkalisodlisod ang mga batakang sektor sa katilingban ilabina ang mga mamumuo ug mag-uuma ug mga kabus sa dakbayan. Samtang pabiling gilansang ang ilang suholan ingon man ang presyo sa mga produkto sa mga mag-uuma nga ubos kaayo, ang mga presyo sa mga produkto ug serbisyo walay kontrol-kontrol nga misulbong.

Matag tuig sa abereyds ka-pito hangtod ka-walo mosaka ang presyo sa gasolina. Busa dili tinuod nga ang pagsulod sa mga �New Players� sa merkado sa gasolina makapaubos sa presyo niini. Ang atong kasinatian nagpakita nga imbes moubos nag-anam hinuon og saka ang presyo sa gasolina.

Kining mga �New Players� sa industriya sa katinuoray kun atong ihulagway mga �tindero� lang sa mga produkto niining mga higanteng kompaniya sa lana. Kun sa mga dry goods pa, ang pito ka mga higanteng kompaniya sa lana mao ang wholesaler samtang ang mga retailers mao na kining giingon nga mga �New Players�. Ug tungod kay retailer lang natural kun unsay presyo sa ilang pagkuha ila lang usab nga patongan (mark up) sa pagbaligya, busa mosamot kamahal ang presyo niini diha sa lokal nga baligyaanan.

Ang dominasyon sa mga higanteng kompaniya sa lana diha sa UPSTREAM ug DOWNWARD level sa industriya mao ang batakang hinungdan sa pagsaka sa presyo sa lana. Ang Exxon Mobil, Royal Dutch Shell, British Petroleum, Total, Chevron Texaco ug Connoco Phillips mao ang mahukmanon diha sa pagsaka-kanaog sa presyo niini aron mas makahakop pa sila og daw-higanteng-ganansya!

Tungod kay gipanag-iya niining �pito ka mga magsuon� ang mga oil concessions sa tibuok kalibutan sila ang adunay kontrol sa pagpresyo niini. Ang OPEC kun Organization of Petroleum Exporting Countries tungod kay atrasado ang kinaiya niining mga nasura ilabina ang Saudi Arabia, usa lang ka gaway sa imperyalismong US. Uban sa Iraq, Qatar, Nigeria, Libya, Algeria, Indonesia ug Venezuela, sila ang naglangkob sa OPEC.

Bugtong ang kausaban lang sa sistema sa katilingban ang makapabaliktad sa dagan sa kasamtangang kahimtang. Pinaagi sa paglingkawas nato sa kontrol sa imperyalismong US diha sa atong ekonomiya, politika ug kultura mahatagan nato og masanag nga kaugmaon ang atong kaliwatan. Kinahanglan nga magpakabana na kitang tanan alang sa kausaban. Walay moabot nga maayong kaugmaon sa katawhan kun magpabilin kining maong kahimtanga. Kinahanglan atong iasdang ang nasudnong industriyalisasyon ug tinuod nga reporma sa yuta aron mahatagan og kasulbaran ang mga batakang problema sa katawhan.

Mahimo kining sugdan pinaagi sa pag-scrap sa Oil Deregulation Law, sa liberalisasyon ug pribatisasyon. Mahinumdoman nga sa kada human sa reaksyonaryong eleksyon dako ang pag-usbaw sa presyo sa gasolina. Pasiuna na nato kining kaamguhan nga dili diay sulbad ang reaksyonaryong eleksyon sa atong mga problema. Busa kun mao, kini na ang tukmang panahon nga paninglan nato ug sudyaan ang mga nagmadaugong politiko ilabina si Macapagal-Arroyo sa ilang mga gisaad nga �pagkaon ug serbisyo� panahon sa milabayng reaksyonaryong eleksyon.

KATAWHAN MAGHIUSA! SALMOT SA PAKIGBISOG ALANG SA NASUDNONG KALINGKAWASAN UG DEMOKRASYA!

SA MGA MAKINASUDNONG MEMBRO SA AFP! SALMOT UG DUYOG SA PAKIGBISOG SA KATAWHAN!#