Diri tinuod an mga alegasyon han kahidabi han BHB ha mga bayolente nga insidente kasumpay han piniliay

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Mayo 14, 2004

For confirmation, contact:
Roy Santos
NDF-EV Media Liaison Office
Cellphone No. 0918-3112138
E-mail: [email protected]

Ginpapahibaro han National Democratic Front-Eastern Visayas ha publiko nga an rebolusyonaryo nga kagiusan in diri nahidadabi ha naisumat nga mga bayolente nga insidente kasumpay ha piniliay ha rehiyon. Ha partikular, hugot nga ginpapanhimuwa han NDF-EV nga an Bagong Hukbong Bayan an nagpapaluyo ha di pala maiha nga pagkawara hin duha nga pollwatcher ni Imelda Bacay, naperdi nga kandidato pagkameyor ha Motiong, Samar, ngan ha insidente han ballot-snatching ha Silvino Lobas, Northern Samar.

Karuyag namon igtudlok nga an mga kabangisan kasumpay ha eleksyon in kasagaran ginhihimo han mga pampulitika nga warlord kakunsabo an ira mga tawhon ha militar ngan pulis. Dugang pa, bisan antes pa han eleksyon, an mga lanong nga anti-komunista nga ginpapangunahan ni National Security Adviser Norberto Gonzales ngan han Armed Forces of the Philippines in nagkondukta hin pananabotahe kontra ha mga progresibo nga partylist sugad han Bayan Muna, Anakpawis, Gabriela Women's Party, Anak ng Bayan, Migrante ngan Suara Bangsa Moro.

An magkaiba-iba nga yunit han BHB in yana nagsusumat nga an 8th Infantry Division in nagsasabrag hin kahadlok ha pag-atentar nga impluwensyahan an kagagawsan han eleksyon ngan pugngan an pagdaug han mga progresibo ha rehiyon. Dida ngan kahuman han pambotos han Mayo 10, an mga sundalo in nagharas han mga botante ngan nag-atentar manipulahon an resulta han piniliay ha Samar ngan Leyte. Mayda mga report han mga yunit han BHB nga nagtutudlok ha makusog nga presensya han militar ha kairayahan han Matugiunao, Gandara, San Jorge, Motiong, Paranas, Pinabacdao, Basey ngan Borongan. Ginpugngan liwat han militar pagbotos an maabot 80 nga pamilya ha bungto han Tabango, Leyte.

Hugot nga ginkokondena han NDF-EV an martial law tactics ngan panlilimbong ha eleksyon nga ginhihimo han 8th Infantry Divison. Ginkukumpira hini an impormasyon nga an kabangisan ngan korapsyon han presente nga piniliay an pinakagrabe tikang han 1986 snap elections ha panahon han pasista nga diktadura nga Marcos. Sugad han naglabay, an maskara han demokrasya ilarum han naghahadi nga sistema in ha katapus-tapusan mahuhukasan hadton mayda pinakadamo nga armas, goons ngan salapi agud la makagdominar ha reaksyunaryo nga eleksyon.

An mga insidente nga iginsasayop ha BHB, kundi balitaw hinimuan han mga grupo han warlord ngan pinakadako nga reaksyunaryo nga armado nga grupo - an AFP - in ha kamatuoran nagpapadig-on la han tindog han rebolusyonaryo nga kagiusan nga an reaksyunaryo nga eleksyon in nangunguwat ngan nagbibiktima la ha katawhan ngan diri naghahagudalan ngadto ha tinuod nga pagbabag-o. Gin-aaghat namon an katawhan nga ibuksas ngan atuhan an intimidasyon ngan panlilimbong nga ginpapanguluhan han militar yana ngan magmabinantayon kontra ha nagpapadayon nga kabangisan ngan panlilisbot. ###

Back to top