KINAHANGLAN NGA HUNONGON ANG KAMPANYANG KASILAG, PAGPAMATAY UG PAGPANGHASI BATOK SA MGA PROGRESIBONG PARTIDO

Prof. Jose Ma. Sison
National Democratic Front of the Philippines
Chief Political Consultant
Mayo 02, 2004

Tinalawan ug salawayon ang kampanya sa kasilag, pagpamatay ug pagpanghasi nga gibuhian sa rehimeng Macapagal-Arroyo, ilabina sa national security adviser niini nga si Norberto Gonzales ug sa mga opisyal sa militar ug kapulisan batok sa mga progresibong partido sa eleksyong party list ug kinahanglan kining hunongon gilayon.

Ang Bayan Muna, Anakpawis ug Anakbayan ang nag-unang nahiagom sa mga pagpamatay nga kalambigit sa eleksyon nga binuhatan sa mga operatiba sa militar, kapulisan ug paramilitari. Aduna sila'y moral ug pangpolitikang integridad ug kusog aron ihingusog nga hunongon ang kampanyang pagpanghasi sa estado ug kab-oton ang hustisya.

Kinahanglan nga hataga'g pagtagad ni Ms. Gloria Macapagal-Arroyo kini nga hangyo. Ang mabagang masa sa katawhan, lakip ang mga organisasyon sa tawhanong katungod, ecumenical ug uban pa mikuyog sa mga progresibong partido sa paghingusog niining hangyo-a. Gikonsidera nga seryoso ug hinanali kining hangyo-a sa pangulohan ug negotiating panel sa National Democratic Front of the Philippines (NDFP).

Ang nagpadayon nga kriminal nga kampanya batok sa mga progresibong partido anaay mga seryoso nga implikasyon ug sangputanan. Hingpit niining giwagtang ang unsamang pagsalig sa nagharing sistema ug sa elektoral nga proseso niini. Gibutyag niini ang reaksyonaryo, malimbongon ug masalikwayon (exclusionary) nga kinaiya sa eleksyon sa Mayo 2004. Giguba niini ang unsamang pagsalig nga natukod sa negosasyong kalinaw sa GRP ug NDFP. Gihataga'g katarungan niini ang pagpadayon ug pagpakusog sa rebolusyonaryong armadong pakigbisog sa katawhan alang sa nasudnong kalingkawasan ug demokrasya.

Gipakita sa mga nag-unang surbey sa eleksyon nga ang mga progresibong partido mahimong modaog og dili mokubos sa 10 hangtud 12 ka mga pwesto. Busa target sila karon sa usa ka opisyal nga kampanya sa pagpanglimbong ug terorismo. Ugaling molampos kining kampanyaha nga pakyason sila, mahimong mayor nga pwersa ang mga progresibong partido aron ibutyag ang kalataw-anan nga kinaiya sa eleksyon ug ang min� nga ilusyon sa demokrasya ug alang sa pagmobilisa sa katawhan batok sa malimbungon nga resulta sa eleksyon. ###

Back to top