Kampanya sang Kaakig, Pagpamatay kag Pagpamahog batuk sa mga Progresibong Partido Dapat Tapnaon

Prof. Jose Ma. Sison
National Democratic Front of the Philippines
Chief Political Consultant
Mayo 02, 2004

Ang kampanya sang kangil-ad, pagpamatay kag pagpamahog nga ginalunsar sang rehimeng Macapagal-Arroyo, ilabi na ni National Security Adviser Norberto Gonzales kag mga upisyal sang militar kag pulis, batuk sa mga progresibong partido sa piniliay sa party list maluibon kag indi mabatun-baton kag dapat matapna sa gilayon.

Pangunahon nga ginahan-usan sang bunal ang Bayan Muna, Anakpawis kag Anak ng Bayan kaangot sa eleksyon nga pagpamatay nga ginabuhat sang militar, pulis kag paramilitaryang operatiba. Sila ang may moral kag pulitikal nga integridad kag kusog sa pagdemanda nga dapat tapnaon na ang kampanya sang kakugmat kag ipatuman ang hustisya.

Dapat pamatian ni Gg. Gloria Macapagal-Arroyo ang ining demanda. Ang malapad nga masa sang pumuluyo, lakip ang mga organisasyon sang tawhanon nga kinamatarung, simbahan kag iban pa, nag-upod na sa mga progresibong partido sa pagduso sining demanda. Ang pamunuan kag negotiating panel sang National Democratic Front of the Philippines (NDFP) nagasigahum nga seryoso kag may pagka-gilayon ining demanda.

Ang nagapadayon kriminal nga kampanya batuk sa mga progresibong partido may mga seryosong implikasyon kag epekto. Lubos sini nga ginabuyagyag ang kalainan sang nagaharing sistema kag sang elektoral nga proseso sini. Ginahayag sini ang reaksyunaryo, mapaniplang kag makitid nga kinaiya sang piniliay sa Mayo 2004. Ginaguba sini ang anuman nga kumpyansa nga nahimo sa tunga sang mga negosasyon pangkalinungan sang GRP-NDFP. Ginahatagan kinamatarung sini ang pagpadayon kag pagpaigting sang rebolusyonaryong armadong paghimakas sang pumuluyo para sa pungsodnon nga kahilwayan kag demokrasya.

Ginapakita sang mga pangunahon nga poll survey nga mahimo magadaog ang mga progresibong partido sang indi magnubo sa 10 asta 12 ka pwesto. Gani, target sila subong sang isa ka upisyal nga kampanya sang pagpaniplang kag terorismo. Kon ining kampanya magmadinalag-on sa pagpaslaw sa ila, ang mga progresibong partido amo ang mangin pangunahon nga pwersa sa pagbuyagyag sa indi mapatihan nga kinaiya sang eleksyon kag sa paltik nga ilusyon sang demokrasya kag sa pagmobilisa sang pumuluyo batuk sa mga indi mapatihan nga resulta sang piniliay. ###

Back to top