NGANO ANG HAGIT NI FPJ NGADTO KANG GMA HIKABSAN OG HANGIN UG NAGKAHUYANG

Prof. Jose Ma. Sison
National Democratic Front of the Philippines
Chief Political Consultant
Abril 23, 2004

Ang mga nanguna sa kasamtangang panaglumbang elektoral alang sa pagka-presidente sa Gobyerno sa Republika sa Pilipinas mao ang gamhanang naglingkud nga presidente nga si Gloria Macapagal-Arroyo (GMA) ug ang kunohay'ng sikat nga artista sa pelikula nga si Fernando Poe Jr. (FPJ).

Mas nailhan ang duruha alang sa ilang mga negatibong aspeto ug bulnerabilidad kaysa ilang mga positibong kwalipikasyon alang sa taas nga posisyon nga ilang gipakigtigian. Gisalamin nila ang pagdaus-os sa nagharing sistema nga nahiagom sa krisis.

Bulnerable sa pagmakmak si GMA tungod sa iyang pagpatuman sa katungdanan sa miaging kapin tulo ka tuig. Si FPJ bulnerableng masalikway gilayon isip tawo nga walay bisan diyut nga pagpangandam-intelektwal ug kasinatian sa politika alang sa posisyon sa pagkapresidente.

Sukad sa sinugdanan sa kampanya, gisalikway na sa gitawag nga ABC'ng tipo sa media audience si FPJ isip dautang komedya sa katawhan. Sa pagkatinuod, naguul sila nga ang D ug E nga tipo sa media audience basin pilion siya nga presidente tungod sa lunlon pag-ulog-ulog sa masa sa usa ka bayani sa pelikula.

Apan ang naghagong masa dili angay'ng pakamenosan isip walay kaalam. Sa pagkatinuod, sila ang pinakamaayong tinubdan sa pagkat-on. Kung anaa sila'y higayon nga paminawon ang tanang paglantaw, gihait nila ang ilang kaamgohan sa ilang kaugalingong kahimtang ug panginahanglan ug makahimo sila og mga kinaadmanong desisyon.

Igo-igo na ang gidagan sa kampanya aron masuta sa naghagong masa nga si FPJ menos dili lamang kang GMA sa hisgutanan sa kaandam ug kasinatian kundili sa suud niyang amigo nga si Joseph Estrada dihang milansar kini sa pagkapresidente niadtong 1998.

Dili lamang yanong artista sa pelikula si Estrada niadto. Nakabataon siya'g posisyon isip mayor ug senador ug naglingkud siya isip bise presidente, makasulti siya'g maayo ilabina sa Tagalog ug madaugon niyang gihulagway ang kaugalingon isip "Erap para sa Mahirap" (Erap alang sa Kabus).

Sa tataw nga pagtandi kang Estrada, bisan kanus-a pa man wala napili si FPJ sa unsamang pangpublikong pangatungdanan ug wala siya nagmadaugon nga ihulagway ang kaugalingon isip kampeon sa mga kabus gawas na lang sa pelikula. Dili siya tigpanumbaling, hambogon siya ug putongon. Kasagaran masurang-surangon siya sa pagtubag sa mga pangutana mahitungod sa mga palisiya. Hapit dili siya makakompleto og sentence sa Tinagalog man o Iningles.

Kadtong mga nagpakamenos sa kaalam sa masa kasagaran nahikalimot nga sa linumbayay sa politika sa Pilipinas, anaay mga patriyotiko ug progresibong pwersa, lakip na ang mga rebolusyonaryo, nga mitabang sa naghagong masa sa mamumuo ug mag-uuma nga sabton ang kahimtang sa Pilipinas ug mga isyu mahitungod sa ekonomiya, politika, kultura ug uban pa.

Dugay nang gibutyag sa mga progresibong partido sa party list nga walay unod ang programa ni FPJ nga makapabali sa kahimtang sa Pilipinas. Ug pinakadautan pa, ang sama nila Estrada, mga Marcos ug uban pang giagup-agupan nang manglungkabay ug tiglapas sa tawhanong katungod maoy nagpaluyo kang FPJ ug migamit kaniya isip pahoy.

Himatikdan usab sa mga progresibong partido sa party list nga si FPJ naghingapin ang pagka-makaugalingon sa iyang mentalidad ug estilo sa pangampanya ug pakig-atubang sa mga tawo. Gipakita niya nga wala siya manginahanglan og tabang sa kang kinsaman kay papyular na siya kaayo ug busa siguro nang modaug.

Wala gani niya ilha ang kusog nga swing-vote (labyog nga pagboto) sa mga progresibong partido ug wala niya sila duola alang sa pakigsinuportahay. Nagpasagad siya bisan sa paghiusa sa mga tawo nga direktang nagpalibot kaniya ug pakyas siya sa pagtukod og kompleto nga nasudnong makinarya sa mga kandidato ug tigpangampanya.

Taliwala sa mga naplastar sa ibabaw, dili ikatingala nga ang hagit ni FPJ ngadto kang GMA hikabsan na og hangin ug nagkahuyang. Gikompirma kining tendensyaha sa mga taho sa kampanya sa mga progresibong partido. Gisalamin kining tendensyaha sa tanang mga seryosong surbey sa eleksyon, lakip na sa Ibon Databank. Busa, bisan ang mangtas nga tiglapas sa tawhanong katungod nga si Gen. Panfilo Lacson mibalibad nga mahimong bise presidente ni FPJ ug naghingusog nga magpabilin isip kandidato sa pagka-presidente.

Back to top