Ang tubag sa NDF-Mindanao sa pamahayag sa mga obispo ug NASSA

Jorge "Ka Oris" Madlos
Spokesperson
NDF-Mindanao
Abril 18, 2004

Ang NDF-Mindanao buot mopresentar sa iyang baruganan kalabot sa mga isyu nga gipadayag diha sa pamahayag niadtong Abril 16, 2004 nga gipirmahan sa 42 ka mga Katolikong Obispo, 7 kanila gikan sa Mindanao ug National Secretariat for Social Action, Justice and Peace (NASSA).

Tinuod, hugaw ang piliay sa atong nasud. Sa tinuod lang ang reaksyonaryong eleksyon mas nagkadunot ug walay paglaum bisan pa man sa wala pa gipatuman ang rebolusyonaryong pamuhis sa rebolusyonaryong kalihukan.

Ang eleksyon sa Pilipinas wala makapauswag bisan gamay sa panginabuhi sa katawhan, unsa pa kaha ang pagsulbad sa pundamental nga problema sa nasud? Tataw kaayo ang reaksyunaryong eleksyon nagasilbe lang isip demokratikong maskara aron tabunan ang pagmonopolyo sa pulitika sa nagharing hut-ong.

Ang rebolusyonaryong pagbuhis sama sa Permit To Campaign (PTC) pagpangilkil ba? Dili. Kini usa ka makatarunganong katungod sa usa ka nagtunhay ug nagkadaku nga rebolusyonaryong gobyerno sa pagpatuman sa pamuhis apil na ang PTC.

Mahitabo ba ang pagkapakyas sa eleksyon tungod sa Permit To Campaign sa rebolusyonaryong gobyerno? Ug kini ba ang makababag sa kahigayonan sa ubang mga kandidato sa pagdaug? Dili. Halos tanan sa mga kandidato sa Mindanao nakatuman sa mga rekisitos sa PTC ug busa walay ni si bisan kinsa kanila nga nahikawan sa kahigayonan sa pagdaug gawas niadtong pipila nga nagdumili pagdawat sa kamatuoran nga ang rebolusyonaryong kalihukan nagakakusog na. Ang pagkapakyas sa eleksyon mahitabo kung adunay subsob nga mga operasyong militar ug mga pagpanglimbong sa eleksyon sa bisan asa nga partido.

Sa hisgutanan sa belligerency status. Wala gyud kini mahisguti sa The Hague Joint Declaration nga maoy giyang gambalay sa negosasyon sa kalinaw tali sa GRP ug NDF. Wala kini mahisguti sa bag-o lang nga panaghisgut sa Oslo. Bisan pa man sa kamatuoran nga nagtunhay na ang bag-ong soberanyang rebolusyonaryong gobyerno inanay nga nagatubo gikan sa kabukiran, dili kami o ang GRP ang modeklara sa NDF isip belligerent. Ang belligerency status mao ang resulta nga nakab-ot sa rebolusyonaryong kalihukan sa paglunsad sa malungtarong pakigbisog sa katawhan nga diin giila sa internasyunal nga komunidad.

Ang rebolusyonaryong pagbuhis nagsubay sa linyang "gikan sa masa ngadto sa masa." Busa, ang tanang makuha gikan sa rebolusyonaryong pagbuhis mabalik pag-usab alang sa kapuslanan sa masa pinaagi sa pagpatuman sa reporma sa yuta, panglawas, edukasyon ug uban pang katilingbanong serbisyo. Lakip na usab ang mga armas ug lohistikang militar alang sa ilang kasundaluhan. Tinuod nga nagapalit kami'g armas ug uban pang himan militar gigamit ang kwartang nakuha gikan sa rebolusyonaryong pagbuhis apan dili aron dauton ang interes sa masa kundi aron dugang pahuyangon ang reaksyunaryong AFP ug mas pakusgon pa ang tinuod nga sundalo sa katawhan nga nagalunsad sa usa ka makatarunganong gubat batok sa dili-makatarunganong gubat sa mga sinuhulang AFP.

Ang pagkakaron nga mga proseso sa eleksyon makakunhod ba sa gintang tali sa adunahan ug kabus? Ang PTC ba usa ka babag sa pagpakunhod niini nga gintang? Ang reaksyunaryong eleksyon usa ka dula nga gisalmotan sa mga adunay guns, goons ug gold. Gani, kadaghanan sa ila nakatuman na sa mga rekisitos sa PTC nga naglakip usab sa paghatag og suporta sa mga isyu ug benepisyo sa katawhan. Bisan pa ang pinakamenos nga mga kandidato nakatuman na sa PTC ug nakapahigayon na og hapsay nga kampanya sa teritoryo sa NDF, dili makahatag og garantiya nga makunhoran ang gintang tali sa mga adunahan ug kabus.

Ang PTC ba nagadasig sa korapsyon? Gikan sa panahon sa Commonwealth hangtud karon, ang kultura sa korapsyon kabahin na sa tanang itoy ug reaksyunaryong rehimen. Ang PTC nga usa ka lehitimo nga panggamhanang responsibilidad sa rebolusyonaryong kalihukan dili angayang hikawan tungod lang sa hulga nga ang PTC mopasamot sa korapsyon.#

Back to top