Nagahimo Sang Kontrabelusonaryong Duha Ka Taktika SI Macapagal-Arroyo Batuk Sa Pumuluyong Pilipino Kag Rebolusyonaryong Pwersa

Prof. Jose Ma. Sison
National Democratic Front of the Philippines
Chief Political Consultant
Abril 07, 2004

Ginaakusahan ko si Gloria Macapagal-Arroyo sang sa paggamit sang kontrarebolusyonaryong duha ka taktika sang kalakasan kag paniplang batuk sa pumuluyong Pilipino, mga rebolusyonaryong pwersa kag mga ligal nga demokratikong pwersa.

Sa isa ka bahin, kuno interesado siya subong sa pagpakignegosasyon pangkalinungan sa National Democratic Front of the Philippines(NDFP) pagkatapos niyang suspendihon sang wala pat-ud ang mga pormal nga agsugilanon halin 2001 asta 2003. Sa pihak nga bahin, alagisod niya nga ginalunsar ang mga labing malauton nga atake militar kag saywar.

Terible na gid katama ang ginahimo nga wala untat nga pagpamatay sang mga ginapaboran nga militar kag pulis sang rehimeng Macapagal-Arroyo. Pero ang idu-buang nga mga pagtaghol kag mga maathag nga kabutigan sang National Security Adviser Norberto Gonzales patimaan nga magadugang pa ang malain nga bagay halin sa rehimen agud lupigon ang pumuluyo kag tanan nga organisadong pwersa nga ginakabig niya nga kaaway.

Maathag nga desidido ang rehimeng nga gamiton ang poder pangpulitika, ilabi na ang mga mapiguson nga makinarya kag pinansyal nga resorsa sang estado, agud dayaon ang eleksyon sa Mayo.Sa sini, ginahimo ni Gonzales ang tanan para magsabwag sang mga kabutigan sa mga pag-atake niya batuk sa akon kag sa pagdalahig sa Partido Komunista, pagpakahuya kag pagpanamad sa mga progresibong partido nga ara sa party list. Ginahawan sang rehimen ang dalan para sa lapnagon nga dinayaay batuk sa mga partido nga ini kag mayormente batuk sa mga karibal sa pagkapresidente ni Macapagal-Arroyo.

Ang anum ka progresibong partido elektoral nga ginasamaran ni Gonzales ginasigahum nga makaganar sang 16 tubtub 18 porsyento nga boto. Kinakakulbaan ang indi mahikayan nga ikasarang nga impluwensya ang resulta sang piniliay bilang "swing vote." Kag abang sila sa padihot ni Macapagal-Arroyo nga maghimo sang lapnagon pagdinaya batuk pangunahon sa mga mayor nga partidong oposisyon.

Malisyoso nga manugsamad sang dungog si Gonzales. Maabtik sini ginapresentar sa publiko sang anuman nga bagay magamit sa pagpagguwa niya nga ginaangot ko kuno sa likum nga rebolusyonaryong kahublagan sa anuman nga progresibong partido elektoral. Wala basehan ang iya mga akusasyon kag daw bata-bata nga nagahimo sang wala basehang nga intriga. Ginahimo niya ang tatlo ka pahayag sa midya sining karon lang daw may pahanugot ni Macapagal-Arroyo.

Madamu ang nagakatingala kon paano nangin National Security Adviser si Norberto Gonzales sa pihak sang waay naman siya sang ikasarang sa halambalanon sa halambalanon sa pungsodnon nga seguridad kag madugay na siya nagasakdag sang paltik nga sosyal demokrasya. Sa subong, maathag na ang kamatuoran. Indi lamang siya hugot nga ginrekomendar ni Jesuit provincial Fr. Intengan, rekomendado man siya mismo sang CIA, nga madugay na nga nagagamit sa iya bilang asset sa paniktik kag impiltrador sang Moro National Liberation Front, ilabi na sa panahon ni Nur Misuari bilang tagapangulo.

Ang mga hulag ni Gonzales isa ka maayo nga indikasyon sang mga matuod nga intensyon sang imperyalismong US kag sang papet nga rehimeng Macapagal-Arroyo. Indi lamang siya isa ka espiya sang rehimen, espiya man siya sang nagaisahanon nga superpower. Kabarkada niya ang mga idu-ido nga upisyal nga nagaproponer sa gubyernong US nga ilista nga "terorista" ang PKP, BHB kag ang NDFP Chief Political Consultant nga nagalapas sa The Hague Joint Declaration kag iban pa nga mga kasugtanan sa mga sugilanon pangkalinungan sang GRP-NDFP.

Gintumod ko ang prinsipyo sang pungsodnon nga soberanya sa The Hague Joint Declaration, sang Joint Agreement on Safety and Immunity Guarantees, ang mga kinamatarung nga gin-aprubahan sa Comprehensive Agreement on Respect for Human Rights and International Humanitarian Law kag ang doktrina nga Hernandez nahanungod sa mga kasal-anan sa pulitika.

Bilang sekretaryo para sa mga special operations, nagatungod sang yabi nga papel si Gonzales sa pagparalisa sa mga negosasyon pangkalinungan halin 2001 asta 2003. Subong nga ginbuhian siya batuk sa mga rebolusyonaryong pwwersa nga ginatiglawas sang NDFP, magaatras bala liwat si Macapagal-Arroyo sa mga negosasyon pangkalinungan, partikularmente sa gintalana nga ikatlo nga hugnat sang pormal nga pagsugilanon sa Abril 26 tubtub 29, 2004? Maathag nga ginabutang sa peligro ni Gonzales ang pagpadayon sang mga negosasyon pangkalinungan kag ginakontra niya ang una kag ikaduha nga pormal nga pagsugilanon sa Oslo.###

Back to top