Mas damo nga taktikal nga opensiba kahuman han sirot nga reyd ha San Jose de Buan

Jose Sumoroy
Spokesperson
Efren Martires Command
New People's Army-Eastern Visayas
Marso 28, 2004

Ha pagselebrar naton han ika-35 nga anibersaryo han pagkatukod han Bagong Hukbong Bayan, gindedeklara han Efren Martires Command ha Sinirangan Bisayas nga maglalansar ini hin mas damo nga kaya igdaug nga mga taktikal nga opensiba ha pinakaagsob nga makakaya. An pinakalab-as nga madinaugon nga taktikal nga opensiba han BHB ha rehiyon amo an reyd han Marso 17 ha Alpha Company han 34th Infantry Battalion ngan istasyon han PNP ha San Jose de Buan, W. Samar. Trese nga sundalo han Army ngan usa nga pulis an namatay ha reyd, ngan nakakumpiska an BHB hin duha nga M16, tulo nga M14, ngan pito nga .38 ngan .45 kalibre nga pistola. Tulo nga hinigugma nga Pula nga mangaraway an namartir ha taktikal nga opensiba.

An Alpha Company han 34th IB an prinsipal nga target han reyd ngan diri an istasyon han PNP ha munisipyo. Gindemanda han katawhan ha Samar nga masirutan ini nga ura-ura kapasista nga yunit para han pauro-utro nga pagbayolar han CARHRIHL nga kasarabutan ha tawhanon nga katungod giutan han National Democratic Front of the Philippines ngan han reaksyunaryo nga gubyerno. Lakip ha mga kabangisan ngan pangangabuso han 34th IB Alpha Company han mga tawhanon nga katungod amo an:

Terorista nga pagpatay han mga inosente nga sibilyan nga gin-aakusar nga mga tagasuporta han BHB, sugad han 60-anyos nga hi Fulgencio Gabin han Brgy. Gusa, San Jose de Buan han Hunyo 6, 2003, ngan han 30 anyos nga hi Jossie Carables han Barangay Totoringon, Catbalogan han Nobyembre 25, 2003;

Pagtalapas han mga balaud ha gerra dida han pagtamas-tamas han patay nga lawas ni Carlito �Ka Terado� Salingsing, kanay ulo in ginpugot kahuman niya mamatay ha engkwentro han Hulyo 23, 2003 ha Brgy. Naguma, Calbayog City, W. Samar;

Pagkidnap ngan pagtortyur han gin-aalegar nga mga tagasuporta han BHB, ngan pagtarhug ngan pagkastigo han iba pa nga mga inosente nga sibilyan ha ira mga operasyon militar;

Pwersado nga pagpapatrabaho ha mga parag-uma ha ira mga kampo militar;

Waray-renda nga pandedestroso han kanan katawhan panginabuhi pinaagi han paghihibang han mga pananum ngan hayop pan-uma ha mga operasyon militar;

Pagpangulo han illigal logging ha sinasakupan han ira responsibilidad kakunsabo an mga illegal loggers nga nakabase ha Brgy. Buray, Paranas ngan Catbalogan; ngan

Pangunguna ha mga korap ngan kontra-sosyal nga aktibidad sugad han waray-wantas nga huygo, agsob nga irignom ngan kahubog, ngan iba pa nga mga krimen ha mga barangay palibot han ira kampo.

Karuyag liwat ig-anunsyo han Efren Martires Command an masunod nga mga magdinaugon nga aksyon militar han Bagong Hukbong Bayan ha naglabay nga duha kabulan:

Marso 26, 2004 -- gin-atake han mga Pula nga mangaraway han Mt. Amandewin Command an istasyon han Regional Intelligence Group-8 ha Lake Danao, Ormoc City, diin napatay an duha nga pulis.

Marso 2, 2004 -- Ha depensiba nga aksyon, nahimo han mga Pula nga mangaraway han Mt. Amandewin Command nga patayon an siyam nga elemento han 19th Infantry Battalion ha usa nga reyd han militar ha kampo han BHB ha Brgy. Wague ha Leyte, Leyte. Usa nga Pula nga mangaraway an namatay samtang talwas nga nakaatras an bug-os nga yunit han BHB.

Pebrero 18, 2004 -- Tungod kay naalerto han ira early warning device, nahimo han 15 nga Pula nga mangaraway han Lupito Mingote Command nga maagaw an inisyatiba dida han reyd han militar ha Dolores, Eastern Samar. Lugod, lima nga elemento han Bravo Company han 14th Infantry Battalion an namatay. Duha han mga kaswalti han kaaway in napatay han BHB, samtang ha karigumok an tulo pa nga iba in napusil mismo han ira igkasi sundalo ha mis-engkwentro.

Pebrero 13, 2004 -- ginsirutan han mga Pula nga partisano han Florencio Elairon Command hi Loidesito Labtic, usa nga ahente han intelidyens han 52nd Infantry Battalion ha Brgy. Aguinaldo, Gen. MacArthur, E. Samar. Labot han pagsiruti ha iya hin kamatayon tungod han pagigin espiya han militar, napamatudan han husgado han katawhan nga salaan hi Labtic han pagpatay ngan sugad man han pagpartisipar ha masaker ha Brgy. Osmena han nasabi nga bungto.

Ginpapahimatngunan han Efren Martires Command an pinakalanong nga mga yunit han 8th Infantry Division nga magigin prinsipal nga target hira han mga taktikal nga opensiba han BHB ha rehiyon. An mga yunit han AFP ngan PNP ha pankabug-osan, labot han pinili nga personnel nga diri kombatant, in ginkokonsidera nga mga lehitimo nga target militar, bisan kun tipatip nga gintitimbang ngan ginpapamatian anay an opinyon han katawhan antes iglansar an anuman nga opensiba nga aksyon militar.

Gin-aaghat han BHB an katawhan nga magsalawad han ira mga reklamo ngan obserbasyon hiunong han mga lanong nga yunit han militar. Waray taktikal nga opensiba nga magmamadinaugon kun waray an suporta ngan partisipasyon han katawhan. Hin magkabunyog, an BHB ngan masa han katawhan in makakaungbaw ha anuman nga depensa han kaaway ngan mga opensiba nga maniobra hini. Aton papintason an gerra han katawhan ha urusa nga pagkig-away para ha nasyunal nga kagawasan, demokrasya ngan kamurayawan!

Back to top