Malisyoso ngan iresponsable an pahayag ni Lt. Col. Feliciano kontra han pagtanggal han "terrorist" listing han CPP-NPA

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Marso 26, 2004

Reference:
Mr. Roy Santos, NDF-EV media liaison officer
[email protected]

Iresponsable hi Lt. Col. Feliciano, nga taga-Civil Relations Group han CentCom han Armed Forces of the Philippines, para magdeklara nga imposible matanggal an Partido Komunista han Pilipinas (PKP)- Bagong Hukbong Bayan (BHB) ha listahan han mga "terorista nga organisasyon" tungod kulaos han serye han mga magdinaugon nga taktikal nga opensiba han BHB.

An sugad nga iresponsable nga yakan ni Col. Feliciano in nagpapakita la han lunod-patay nga intensyon han AFP nga sabotahion an negosasyon pankamurayawan. Ha balayan han utro nga nagpapadayon nga pormal nga erestorya pankamurawanan giutan han Gubyerno han Republika han Pilipinas (GRP) ngan National Democratic Front of the Philippines (NDFP), obligasyon han GRP - nga ginpapailaruman ni Col. Feliciano ngan bug-os nga AFP - nga maghimo hin mga positibo ngan diplomatiko nga pitad agud matanggal an CPP, NPA, ngan NDFP chief political consultant nga hi Jose Maria Sison ha listahan han mga "terorista". Kaangayan la, tungod kay an GRP man ngani mismo an todo-todo nga nagkampanya ha Europa ngan US para mailista an CPP, NPA ngan hi Jose Ma. Sison komo "foreign terrorists", pinaagi han hadto-anay DFA Sec. Blas Ople.

Malisyoso nga karuyag igladawan ni Col. Feliciano nga mga "terorista" nga akto an serye han mga magdinaugon nga taktikal nga opensiba han BHB. Subay ha mga internasyunal nga balaud ngan pagsurundon ha gerra ngan mga kalugaringon pagsurundon han BHB, sahid mga lehitimo nga target an gin-atake han BHB ha iya mga aksyon militar - mga kombatant han kakontra nga gapil ha gerra sibil, labi na an mga abusado nga tropa han AFP ngan PNP nga may utang nga dugo ha katawhan. Sugad man, hugot nga ginhahasog han BHB an disiplina ha kondukta ha gerra - ha pagpanalipod han kalibrehan han mga sibilyan ngan pagrespeto ha mga katungod han mga hors de combat, lakip na an mga priso-ha-gerra. Dugang pa, natagamtaman han BHB an haluag ngan hilarum nga suporta han katawhan nga ngani, amo an nagin yawe ha kadaugan han mga taktikal nga opensiba. An sugad nga mga punto in diri gud masesering para ha AFP han hilaba ngan madugo nga rekord hini han pangatake, panmatay, pangangabuso, pagtortyur, pagsikmit han mga sibilyan ngan pagtamas-tamas han mga katungod han mga kapturado nga BHB.

Para han mga iresponsable nga pahayag ni Col. Feliciano, tinuod la nga pinakamaupay hiya para han iya katungdanan komo taga-Civil Relations Group han CentCom han AFP - nga an solo nga papel han pag-iksister amo an pagpasamwak han disimpormasyon ngan pakaraut hiunong ha rebolusyonaryo nga kagiusan, ha pakyas nga pag-antum nga makakabig han AFP an "huna-huna ngan kasing-kasing" han publiko pinaagi han pagbuwa ngan panguwat.#