Pagduaw sa hepe nga imperyalista ug numero-unong terorista, nagpasibaw lamang sa neokolonyal nga kinaiya sa paghari ug sistema sa Pilipinas

Gregorio "Ka Roger" Rosal
Spokesperson
Communist Party of the Philippines
Oktubre 16, 2003

Ang pagduaw karong Oktubre 18 ni US Pres. George Bush nagpasibaw lamang sa neokolonyal nga kinaiya sa paghari ug sistema sa Pilipinas. Wala kini'y unsamang idulot nga kaayohan sa katawhang Pilipino. Dili kini makahatag og yuta sa mga mag-uuma nga walay kaugalingong yuta nga tikaron. Dili kini makahatag og panginabuhian sa mga walay trabaho. Dili kini makahatod og kalan'on sa lamesa sa mga gipanggutom. Dili kini makatukod og panimalay alang sa mga kabus nga nagsinardinas sa mga payag-payag nga sangkad og taptap.

Bugtong ang mga itoy, dagkong komprador, burukrata kapitalista, pasista, mga nagpahimulos ug nanaugdaug sa katawhan anaay hinungdan aron harianong saulogon ang pagduaw kanila sa ilang halangdon nga agalon ug gisimbang ginoo-ang imperyalistang hepe ug numero unong terorista sa kalibutan.

Magpakabusong sila sa puloan ka milyong piso nga makabuhong nga paghalad nila kang Bush. Sa pagpanguna sa pangulong papet nga si Gloria Arroyo, saulogon nila ang usa ka siglo nga kolonyal ug semikolonyal nga paghari sa gamhanang America ug ang mga pinaka-ulahing konsabohanay ug paatik nila sa binagaay'g nawong nga pagpasamot sa pagpahimulos ug pagpanglupig sa katawhan. Samtang nagmantika ang ilang mga simod, manganta sila sa mga himaya sa imperyalistang "globalisasyon" ug maghatag-dungog sa "gubat batok-terorismo." Samtang gipakayab-kayab ang bandera sa US, palakpakan unya nila ang teroristang pagpangataki ug akupasyon sa US diha sa Afghanistan ug Iraq ug ang armadong pagpanginlabot dinhi sa Pilipinas ug uban pang dapit sa kalibutan.

Nagkuyog-kuyog sila nga nangalyupong moluhod sa ilang agalon nga hataga'g limos ang ilang mga sakop-buhong alang sa kaugalingon nilang bulsa ug pagpatagbaw, sensilyo nga pangdungag sa buslot nga bulsa sa gobyerno ug pipila nga nauranay nang kahimanang militar aron pangpukan sa mga nag-alsang katawhan. Bugti niini, andam sila nga ihalad ang tanan-bisan na gani ang dyutay'ng nabilin nga kagawasan sa Pilipinas. Andam sila nga pasudlon ang mga tropang pangkombat ug binuta nga dawaton ang pagyatak sa nasudnong soberanya. Andam sila nga mosulod sa mga salikwaot nga kasabutan nga maghatag pa og dugang pribilehiyo ug kabulahanan alang sa langyaw'ng monopolyo-kapitalista. Andam sila nga usbon ang mismong konstitusyon sa gobyerno aron dugangan pa ang gamhanang katungod nga neokolonyal sa US sa Pilipinas.

Walay mas haom nga pagtagbo kang George W. Bush kundili ang kutob-sa-maabot nga pagpamahayag ug kasuko ug protesta batok sa tanang krimen sa imperyalismong US ug pagyatak sa atong nasudnong kagawasan. Isip kasamtangang hepe nga imperyalista, kinahanglan siya nga papanubagon, lakip sa iyang kuyog-baboy nga mga itoy, sa gatusan ka libo nga mga tagilungsod nato nga gipangbugtoan og kinabuhi sa mga tropang Amerikano niadtong 1898-1913, sa paglungkab sa atong mga kinaiyanhong bahandi ug pagpahimulos sa barato kaayong kusog-pamuo sa naghagong masa, sa pag-ilog sa puloan ka libo nga hektaryang kayutaan, sa pagpahamtang og mga palisiya ug kasabutan nga nagpa-unlod sa ekonomiya sa Pilipinas sa nagkalalom nga krisis ug grabing nagpig-ot sa katawhan.

Angay nga masaksihan sa tibuok kalibutan nga ang katawhang Pilipino dili mga aghop nga karnero nga moyukbo na lamang atubangan sa pinakagamhanang imperyalista ug terorista. Angay nga masaksihan sa tibuok kalibutan ang dinaghang pagsunog sa mga bandera sa US-simbolo sa nasudnong pagpanglupig dinhi sa Pilipinas, simbolo sa pagpanaugdaog diha sa naghagong masa sa tibuok kalibutan.

Angay nga palanogon sa katawhang Pilipino ang ilang nagdilaab nga protesta sa gipasamot nga semikolonyal nga pagpahimulos ug pagpanglupig sa imperyalismong US dinhi sa Pilipinas ilabina niining miaging mga katuigan, duyog sa makasisilag nga pagpaka-itoy sa rehimeng Arroyo. Aron maka-ipsot sa grabing resesyon nga milikos sa ilang ekonomiya, gipasamot sa imperyalismong US ang pagpanaugdaog ug pagpahimulos sa Pilipinas ug uban pang semikolonyal nga nasud sa tinguhang mas hugot nga kontrolon ang suplay sa mga hilaw'ng materyales ug kinaiyanhong bahandi ug makapuga og mas dakong ginansya gikan sa singot ug kahago sa proletaryado ug uban pang mga pinahimuslang hut-ong. Pinaagi sa doktrinang "anti-terorismo," giyatakan niini ang tanang nagtunhay nga palisiya sa sibilisadong internasyonal nga pakiglinambigitay, sama sa pagtahod sa soberanya ug kaugalingnan sa mga nasud, angay-angay nga pakiglinambigitay, walay panginlabotay sa mga internal nga hisgutanan sa ubang nasud ug walay sinulongay sa ubang nasud aron ipahamtang ang Pax Americana sa tibuok kalibutan.

Angay nga ipakita sa katawhang Pilipino ang ilang nagkahiusang baruganang patriyotiko ug tinguhang makalingkawas gikan sa pagkapot sa imperyalismong US. Ang mga dili angay nga kasabutan kinahanglang ibasura. Angay nga isinggit: Ibasura ang Mutual Defense Treaty! Ibasura ang Visiting Forces Agreement! Ibasura ang Mutual Logistics Support Agreement! Batokan ang mga lakang nga magpanumbalik ngadto sa nasud sa mga base militar sa US-malangkubon man o gamay, permanente man o dili.

Batokan ang mga balaud ug kasabutan nga naghatag og dalan sa pagpahimulos sa mga langyaw sa atong ekonomiya: Philippine Mining Act, Bank Liberalization Law ug uban pang maki-imperyalistang balaud sa ekonomiya, ingon man usab ang plano nga hatagan og "angay" nga konstitusyonal nga katungod nga sama sa Parity Rights ang mga dagkong langyaw'ng kapitalista sa pagpanag-iya ug katungod sa atong yuta, kinaiyanhong bahandi ug mga estratehikong industriya ug serbisyo, duyog sa dugang pagkontrol sa kinatibuk-an sa ekonomiya sa Pilipinas.

Isalikway ang doktrinang "anti-terorismo" sa US nga binuta nga gisuportahan sa rehimeng Arroyo. Sa altar sa "anti-terorismo," gibugto ug gisakripisyo ang panaghisgot-kalinaw ug gikunit-kunit ang napulo ka mga kasabutan tali sa gobyerno ug sa National Democratic Front. Gideklarar niya ang kaugalingong teroristang gubat ug gimando ang kaylap nga militarisasyon sa kabanikanhan. Sa kapakyasan nga pukanon ang rebolusyonaryong armadong kalihukan, gition sa militar ang ilang mga pusil ug kanyon ngadto sa minilyon-milyong mga tawo nga mibarog ug nakigbatok. Walay pugongpugong ang mga pagmasaker, pagsalbids, pagtortyur ug uban pang paglapas sa tawhanong katungod. Walay giilang balaud ang teroristang gubat ni Arroyo. Walay kaulaw nga gihingusog ni Arroyo ang armadong pagpanginlabot sa US sa rebolusyonaryong gera sibil sa Pilipinas ug sa anti-Moro nga gubat sa hinungog nga pagtuo nga mahuraw niini ang mga rebolusyonaryong pwersa.

Makasisilag ang naghingapin nga enggrandeng pagpangandam nga gihimo sa rehimeng Arroyo aron sugaton si George W. Bush. Gipakita ni Gloria Arroyo ang hingpit nga palapala nga pagyukbo niini sa iyang agalon ug ginoo. Tumang makasisilag ang pagladlad sa pulang tapete (red carpet) alang kang Bush samtang gipamungkag ang mga payag-payag sa mga kabus ug gipamunalan og garuti ang mga nagprotesta.

Makasisilag ang rehimeng Arroyo sa paghatag og sulabing pasidungog kang Bush samtang gimakmak siya sa katawhan sa tibuok kalibutan ug bisan sa katawhang Amerikano tungod sa iyang pasistang pagpanghulhog og gubat, imperyalistang pagpamig-ot ug pagpanglingla ug pagpamakak.

Apan pagabayran og mahal ni Arroyo ang pagpakabuta niya niining tanan. Duyog sa kasilag sa katawhan sa kalibutan ug paghukom sa kasaysayan sa diyos-diyos niya nga si Bush, ingon man usab nga hukman si Arroyo sa Pilipinas sa iyang hungog nga pag-ikog-ikog sa imperyalistang agalon ug hingpit nga pagpaantos sa katawhang Pilipino.

Back to top