Pagbisita han hepe nga imperyalista ngan numero-uno nga terorista, nagpapalandaw la ha neokolonyal nga kinaiya han paghahadi ngan sistema ha Pilipinas

Gregorio "Ka Roger" Rosal
Spokesperson
Communist Party of the Philippines
Oktubre 16, 2003

An pagbisita ha Oktubre 18 ni US Pres. George Bush in nagpapalandaw la ha neokolonyal nga kinaiya han paghahadi ngan sistema ha Pilipinas. Waray ini bisan anuman nga idudurot nga kaupayan ha katawhan Pilipino. Diri ini maghahatag hin tuna ha mga parag-uma nga waray kalugaringon nga tuna nga ginhuhulad. Diri ini maghahatag hin panginabuhi ha mga waray trabaho. Diri ini magdudul-ong hin pagkaon ha lamesa han mga nagugutom. Diri ini magtitindog hin urukyan para ha mga kablas nga naghuhuruot ha mga tinangkop-tangkop nga payag.

An mga papet, dagko nga komprador, burukrata kapitalista, pasista, mga naniniyupi ngan nanalumpigos ha katawhan gud la an mayda rason para engrande nga igselebrar an pagbisita ha ira han ira ginhahangad nga amo ngan ginsisimba nga diyos-an imperyalista nga hepe ngan numero uno nga terorista ha kalibutan.

Magpapakabusog hira ha tagnapulo kamilyon piso nga bangkite nga ihahalad nira kan Bush. Ha pangunguna han puno nga papet nga hi Gloria Arroyo, igselebrar nira an usa nga siglo han kolonyal ngan baga-kolonyal nga paghahadi han gamhanan nga America ngan an pinakaurhi nga mga kunsabohay ngan larang nira ha waray-awod na nga pagpapagrabi han paniniyupi ngan pananalumpigos ha katawhan. Samtang nagmamantika an ira mga baba, kakanta hira han mga hosanna ha imperyalista nga "globalisasyon" ngan magdadayaw ha "gerra kontra ha terorismo". Samtang ginpapalaypakay an bandera han US, papalakpakan nira an terorista nga panginginlabot ha Pilipinas ngan iba-iba nga dapit han kalibutan.

Upod-upod hira nga mapangamuyo nga maluhod ha ira amo nga tagan-limos an iya mga ginsasakop-damo para ha kalugaringon nga bulsa ngan pagpapatakas, sensilyo nga pandugang ha buslot nga bulsa han gubyerno ngan pira nga kadaan nga kagamitan militar agud ipanmuypoy ha mga nag-aalsa nga katawhan. Kabalyo hini andam hira nga ighalad an ngatanan-bisan an gigugutii nga nabibilin pa nga katalwasan han Pilipinas. Andam hira nga pasakbon an mga dayuhan nga tropa nga pankombat ngan nakapiyong nga karawaton an pagtatamak ha nasudnon nga soberanya. Andam hira nga sumakob ha mga kiling nga kasarabutan nga maghahatag hin dugang pa nga mga pribilehiyo ngan benepisyo para ha mga dayuhan nga monopolyo kapitalista. Andam hira nga bag-uhon an mismo nga konstitusyon han gubyerno agud dugangan pa an gamhanan nga katungod nga neokolonyal han US ha Pilipinas.

Waray maangay nga pagtapo kan George W. Bush kundi an ubos-kaya nga pagpapahayag han kangalas ngan protesta kontra ha ngatanan nga krimen han imperyalismo nga US ngan pagtamak hini ha aton nasudnon nga katalwasan. Komo presente nga hepe nga imperyalista, kinahanglan hiya nga pababatunon, upod na an iya mga sunod-sunoran nga tuta, ha gatos-gatos kayukot nga kinabuhi han mga kataginasud naton nga ginpatay han mga tropa nga Amerikano hadton 1898-1913, ha pagkawat han aton mga rekursos-naturales ngan paniniyupi ha gibabaratohi nga kusog-pagtrabaho han masa nga anak-ha-balhas, ha pag-agaw han gatos-gatos kayukot nga ektarya nga katunaan, ha pagpapahamtang han mga palisiya ngan kasarabutan nga nagpapaunlod ha ekonomiya han Pilipinas ha tikahilarum nga krisis ngan grabi nga nagpakuri ha katawhan.

Maangay nga masaksihan han bug-os nga kalibutan nga an katawhan Pilipino diri mga buotan nga karnero nga maduko atubangan han pinakagamhanan nga imperyalista ngan terorista. Maangay nga masaksihan han bug-os nga kalibutan an tagdamo nga paglarab ha mga bandera han US-simbolo han nasudnon nga pananalumpigos ha Pilipinas, simbolo han pananalumpigos ha masa nga anak-han-balhas ha bug-os nga kalibutan.

Maangay nga paaningalon han katawhan Pilipino an ira nangangalas nga protesta ha ginpagrabi nga paniniyupi ngan pananalumpigos nga baga-kolonyal han imperyalismo nga US ha Pilipinas labina hini nga naglabay nga mga tuig, kadungan han nakakapandiri nga pagpapakapapet han rehimen Arroyo. Agud makalakbay ha grabi nga resesyon nga nakasangbod ha ira ekonomiya, ginpagrabi han imperyalismo nga US an paniniyupi ngan pananalumpigos ha Pilipinas ngan ha iba pa nga nasud nga baga-kolonyal ha tinguha nga mas hugot nga kontrolon an suplay han mga hilaw nga materyales ngan rekursos-naturales ngan makapuga hin mas dako nga tubo tikang ha balhas ngan pagal han proletaryado ngan iba pa nga klase nga tiniyupi. Gamit an doktrina han "anti-terorismo", agud ipahamtang an Pax Americana ha bug-os nga kalibutan gintamakan hini an ngatanan nga naiksister nga palisiya ha sibilisado nga pakikigsumpay pankalibutan, sugad han pagrespeto ha soberanya ngan kalugaringnan han mga nasud, patas nga pagsusumpayan, di panginginlabot ha mga pansakob nga karukayaknon han iba nga nasud ngan di pananalakay ha iba nga nasud.

Maangay nga ipaabat han katawhan Pilipino an ira nagkakaurosa nga katindog nga patriyotiko ngan tinguha nga matalwas tikang ha mga kulo han imperyalismo nga US. An mga di-patas nga kasarabutan kinahanglan nga ibasura. Naaangay nga iguliat: Ibasura an Mutual Defense Treaty! Ibasura an Visiting Forces Agreement! Ibasura an Mutual Logistics Support Agreement! Atuhan an mga pitad nga magbabalik ha nasud han mga base militar han US-hiluagan man o guti, permanente man o diri.

Atuhan an mga balaud ngan kasarabutan nga naghahatag-dalan ha paniniyupi han mga dayuhan ha aton ekonomiya: Philippine Mining Act, Bank Liberalization Law, ngan iba pa nga maka-imperyalista nga balaud ha ekonomiya, sugad man an larang nga tagan hin "patas" nga konstitusyonal nga katungod ala-Parity Rights an dagko nga dayuhan nga kapitalista ha pananag-iya ngan katungod ha aton tuna, rekursos-naturales ngan mga estratehiko nga industriya ngan serbisyo, kadungan han dugang nga pagkontrol ha kabug-osan han ekonomiya han Pilipinas.

Isalikway an doktrina han "anti-terorismo" han US nga buta nga ginsusuportahan han rehimen Arroyo. Ha altar han "anti-terorismo", pinatay ngan ginsakripisyo ni Arroyo an erestorya pankamurayawan ngan pinan-gugusi an napulo nga kasarabutan giutan han gubyerno ngan han National Democratic Front. Gindeklarar niya an kalugaringon nga terorista nga gerra ngan ginmando an hiluagan nga militarisasyon ha kabaryohan. Ha kapakyasan nga pirdihon an rebolusyonaryo nga armado nga kagiusan, gintataga han militar an ira mga pusil ngan kanyon ha milyon-milyon nga katawhan nga natindog ngan naato. Waray-alang an mga pagmasaker, pagsalbeyds, pwersado nga tagdamo nga pagpapa-ebakwet, food blockades, iligal nga pag-aresto, pagtortyur ngan iba pa nga pagtalapas ha katungod pantawo. Waray ginkikilala nga balaud an terorista nga gerra ni Arroyo. Waray kaawod nga igin-insister ni Arroyo an armado nga panginginlabot han US ha rebolusyonaryo nga gerra sibil ha Pilipinas ngan ha gerra nga anti-Moro ha tuyaw nga pagkakasering nga mahahadlok hini an mga rebolusyonaryo nga pwersa.

Nakakapandiri an ura-ura nga pagkagarbo han pag-aandam nga ginhihimo han rehimen Arroyo ha pagtapo kan George W. Bush. Ginpapakita ni Gloria Arroyo an hul-os nga panlulubi nga pagyukbo hini ha iya amo ngan diyos. Hul-os nga nakakangalas an paglalatag han pula nga alpombra para kan Bush samtang gindemolis an mga barong-barong han mga kablas ngan ginpinanbalbag han batuta an mga nagpoprotesta.

Nakakapandiri an rehimen Arroyo ha paghahatag hin hul-os nga pagdayaw kan Bush samtang gintuturisok hiya han katawhan ha bug-os nga kalibutan ngan bisan han katawhan Amerikano tungod ha iya pasista nga panunulsol han gerra, imperyalista nga panrurungasdungas ngan pangunguwat ngan pambubuwa.

Pero pagbabaydan hin mahal ni Arroyo an pagbubuta-butaan niya hini ngatanan. Kadungan han pandiri han katawhan han kalibutan ngan paghusga han kasaysayan ha diyos-diyos niya nga hi Bush, sugad liwat nga paghuhusgahan hi Arroyo ha Pilipinas ha iya lurong nga pagsusunod-sunoran ha imperyalista nga amo ngan hul-os nga pagpapakuri ha katawhan Pilipino.

Back to top