Gloria Macapagal-Arroyo, numero unong ma�t

Gregorio "Ka Roger" Rosal
Spokesperson
Communist Party of the Philippines
Oktubre 05, 2003

Numero unong ma�t (hipokrita) si Macapagal-Arroyo sa pagbungat nga napugos lamang siya nga mag-usab sa hunahuna tungod sa "labaw'ng taas nga tinguha" ug dawaton isip "dakong sakripisyo" ang paghukom nga molansar sa 2004. Makasuka ang iyang dayag nga pagpamakak atubangan sa katawhan nga matag adlaw'ng nakatagamtam og grabing pag-antus tungod sa pagka-itoy, militarismo, korapsyon ug pagka-inutil sa iyang rehimen. Nahikyad atubangan sa katawhang Pilipino kung unsa kadako ang pahimulos ni Arroyo ug iyang mga kakunsabo sa gahum sa padayon niyang paglingkod sa trono sa Malakanyang.

Wala na'y bag-o ug makakugang sa pag-anunsyo ni Gloria Macapagal-Arroyo sa paghukom niyang molansar sa moabot nga eleksyon sa 2004. Dugay nang nahibaw-an kaayo sa tibuok katawhan ang iyang pagkagumon sa gahum nga iyang hingpit nga gipahimuslan. Busa gitalikdan na siya sa mga kanhi niyang kaalyado nga nakaamgo. Ang kamatuoran, dili kayahon ni Arroyo nga talikdan ang minilyon-milyong piso nga gihakop niya ug sa iyang bana bunga sa korapsyon ug dagkong mga pribilehiyo sa negosyo. Dili kayahon ni Arroyo nga talikdan ang hunghong kaniya sa ginoo niya nga si US President George W. Bush nga iyang binutang gisimba ug gi-alagaran, bisan nga siya mismo nameligro na usab sa iyang pangatungdanan.

Ug unsa ang maani sa katawhang Pilipino sa tinguha ni Arroyo nga magpabilin pa og dugang unom ka tuig? Walay pagduhaduha nga magdala lamang kini og dugang kalisdanan ug pag-antus sa katawhang Pilipino, mas grabing korapsyon ug dugang pagkabundat sa magtiayong Arroyo, mga anak ug kakunsabo nila, labaw'ng pagpakapapet sa imperyalismong US ug pagsamot sa armadong interbensyon niini sa Pilipinas ug dugang pagkusog sa teroristang kabangis sa estado ug kamangtas-militar batok sa katawhan.

Siguro gyud nga hingpit nga pagsukol sa katawhang Pilipino ang moharong sa gi-anunsyo ni Arroyo. Alang sa katawhan, taas na kaayo ang hapit tulo ka tuig nga paglingkod ni

Arroyo sa trono kung balansihon ang gibug-aton ug gidaghanon sa mga problemang nagadat-og sa ilang mga abaga ubos sa iyang rehimen.

Nagdilaab na ang gibati sa katawhan. "Dagan, Gloria, dagan! Modagan ka paingon sa layo! Pahawa, Gloria, hawa! Mopahawa ka na sa Malakanyang!" Kini ang singgit sa mga gipanggutom. Singgit sa mga walay panginabuhian, sa mga nabuhi nga kakha-tuka, sa kabatan-onang wala maka-eskwela, sa mga estudyanteng matngon sa pagpanglupig ug kalisdanan, sa mga yanong titser ug empleyado, sa mga nag-alingasang sundalo, sa mga naalkansing negosyante. Kini ang singgit sa katawhang Pilipino!

Mitraydor si Arroyo sa EDSA 2. Ang mga kaso sa korapsyon sa iyang pamilya ug pinakasuud nga amigo ug kakunsabo sa politika nangalisbo sama sa dagkong mga kaso sa korapsyon sa gikasilagan ug gipalagpot nga rehimeng Estrada. Samtang sila nagbutirik, ni kausa ug ni diyut wala patas-a ang pinudyot nga suhol sa mga mamumuo ug yanong empleyado. Gilubong na sa kalimot ang reporma sa yuta ug sukwahi niini, gihataga'g dalan ang kaylap nga paghakop sa yuta sa mga dagkong agalong yutaan ug langyaw'ng korporasyon ug ang rekonsentrasyon sa pagpanag-iya sa yuta sa mga agalong yutaan, usurero ug burgis komprador.

Mitraydor si Arroyo sa nasudnong interes. Gibugaw niya ang nasudnong soberanya aron lamang patuyangan ang kamanyahan sa iyang imperyalistang agalon ug mga armadong tropa niini. Labaw pa niyang gibikaka ang ekonomiya aron hakog nga lungkabon kini sa mga dagkong kapitalistang langyaw.

Mitraydor si Arroyo sa demokrasya ug kalinaw! Gibasura niya ang panaghisgot-kalinaw sa National Democratic Front ug ang tanang mga napirmahan nang kasabutan. Gipatigbabaw niya ang hukom sa mga militarista nahasubay sa doktrinang "kontra-terorismo" sa imperyalismong US. Kabangis ang tubag sa mga demonstrasyon. Ang mga nagpahayag pinugsanay'ng gipahilom.

Siguro gyud nga isalikway sa katawhan si Gloria Arroyo sa 2004-ugaling moabot pa siya sa eleksyon. Ipakita sa katawhan ang naghingaping pagkasilag kaniya, bisan na kung tugkaron, wala man usab sila'y kapilian.

Milagro lamang sa dagway sa sulabing pagpanglimbong, pagpanghagis, pagpanuborno ug pagmaniobra sa US ang mahimong mopadaog kaniya sa eleksyong 2004. Maingon pa man, ang pagpadayon ug pagsamot sa mga palisiya ug lakang nga ipatuman niya mao usab ang mobunga og dugang paggrabi sa krisis sa panginabuhian ug politika sa nasud, motay-og sa iyang rehimen ug mopadilaab sa mas grabi ug kaylap pang pagsukol sa katawhan. Sa pagpamilit ni Arroyo nga magpabilin sa gahum, labaw niyang gihagit ang katawhan nga lumpagon ang iyang rehimen ug duyog niining dugang pahuyangon ang tibuok nagharing sistema. ###

Back to top