Gloria Macapagal-Arroyo, numero uno nga ipokrita

Gregorio "Ka Roger" Rosal
Spokesperson
Communist Party of the Philippines
Oktubre 05, 2003

Numero uno nga ipokrita ni Macapagal-Arroyo iti panagkuna na a napilitan laeng a baliwan ti panunot na gapu iti �nangatngato a tarigagay� ken awaten na kas �dakkel a sakripisyo� ti desisyon a tumaray no 2004. Di mairusuk ti bitla na a nakaparparang a panaglangsot iti sango ti umili nga inaldaw nga aglaklak-am ti nakadagdagsen a kinarigat iti kinaaso-aso, militarismo, korapsyon ken kinainutil ti rehimen na. Sipaparang iti sangkailian a Pilipino no kasano kadakkel ti nam-ay a laklak-amen ni Arroyo ken dagiti kakumplot na iti poder iti agtultuloy a panagtugaw na iti trono ti Malakanyang.

Awanen ti baro ken nakaskasdaaw iti panaganunsyo ni Gloria Macapagal-Arroyo iti desisyon na a tumaray iti umay nga eleksyon no 2004. Nabayagen nga ammo ti intero a sangkailian ti kina-adik na iti poder a naan-anay a nagnam-ayan na. Ngarud taltallikudanen isuna dagiti addaan panunot a dati na a kaalyado.

Ti agpayso, saan a kabaelan ni Arroyo a tallikudan ti milyun-milyon a piso a ginamgam na ken ti asawa na a bunga ti korapsyon ken dagiti dadakkel a pribilehiyo iti negosyo. Saan a kabaelan ni Arroyo a tallikudan ti arasaas kaniana ti diyos na a ni US President George W. Bush a bulag a daydayawen ken pagserserbian na.

Ken ania ti magun-od ti sangapagilian a Pilipino iti panaggagar ni Arroyo nga agtalinaed pay iti innem a tawen? Awan duadua a ti ited laeng daytoy ket lallalo a kinarigat ken panagsagaba ti umili a Pilipino, napalpalalo a korapsyon ken lallalo a panagbukatot ti agassawa nga Arroyo, dagiti annak ken dagiti kakumplot da, nakarkaro a kinaaso-aso iti imperyalismo nga US ken napalpalalo nga armado nga interbensyon na iti Pilipinas ken lallalo a panagirteng ti terorista a kinaranggas ti estado ken kinaranggas militar laban iti umili.

Sigurado a todo-todo a panaglaban ti isabat ti umili a Pilipino iti anunsyo ni Arroyo. Para iti umili, atiddog unayen ti dandani tallo tawen a panagtugaw iti trono ni Arroyo no timbangen ti kinadagsen ken kinaadu dagiti problema a mangbegbegbeg kadagiti abaga da iti babaen ti rehimen na.

Bumbumtaken ti gura ti umili. "Taray, Gloria! Tumaray ka a paadayo! Alis, Gloria, alis! Umikkat kan iti Malakanyang!" Daytoy ti pukkaw dagiti mabisinan. Pukkaw dagiti awanan panggedan, dagiti agbibiag iti sangasaangan-sangasapulan, dagiti kabataan a saan a makapagadal, dagiti estudyante a mulat iti pannakaidadanes ken kinarigat, dagiti ordinaryo a titser ken empleyado, dagiti maburburiburan a soldado, dagiti maluglugi a negosyante. Daytoy ti pukkaw ti sangkailian a Pilipino!

Nagtraydor ni Arroyo iti EDSA 2. Dagiti kaso ti korapsyon ti pamilya na ken asideg a gagayyem ken kakumplot na iti pulitika ket nakalalaes a kas iti dadakkel a kaso ti korapsyon ti kagurgura ken napatakias a rehimen nga Estrada. Kabayatan nga agbusbussog da, uray naminsan ken uray la koma sangabassit ket saan na nga inggato ti nakabasbassit a sueldo dagiti mangmangged ken ordinaryo nga empleyado. Inkali na iti tanem ti reporma iti daga ken kabaliktad daytoy ket pinalubosan na ti nasaknap a panaggamgam ti daga dagiti dadakkel nga apo't daga ken ganggannaet a korporasyon ken rekonsentrasyon ti panagtagikua ti daga dagiti apo't daga, usurero ken burges kumprador.

Nagtraydor ni Arroyo iti nailian nga interes. Inlako na ti nailian a soberanya tapno laeng mapagustoan ti pagayatan ti imperyalista nga amo na ken dagiti armado a tropa na. Lallalo na pay nga inlukat ti ekonomya tapno daytoy ket kasla aso nga agtiwel a gammatan dagiti dadakkel a kapitalista a ganggannaet.

Nagtraydor ni Arroyo iti demokrasya ken kappia! Imbasura na ti tungtongan iti kappia iti National Democratic Front ken iti amin a napirmaanen a katulagan. Pinarimbaw na ti desisyon dagiti militarista segun iti doktrina a "kontra-terorismo" ti imperyalismo nga US. Kinaranggas ti sungbat na kadagiti demonstrasyon. Dagiti agibutbutaktak ket pilit da a pagulimeken.

Sigurado nga ilaksid ti umili ni Gloria Arroyo iti 2004--no dumanon pay isuna iti eleksyon. Ipakita ti umili ti agngarngariet a panaggura da kenkuana, uray no ar-arigen ket awan met unay ti mabalin da a mapagpilian.

Milagro laeng iti porma a sobra-sobra a panagswitik, panangranggas, panagpasuksuk ken maniobra ti US ti mabalin a mangpangabak kaniana iti eleksyon 2004. Uray no kasta, ti panagtultuloy ken panagkaro dagiti patakaran ken addang nga ipatungpal na ti mangiduron met laeng iti lallalo a panagsuwek ti krisis iti kabiagan ken pulitika ti pagilian, manggunggon iti rehimen na ken mangrubrob ti napingpinget ken nasaksaknap pay a panaglaban ti umili.

Iti panagpilit ni Arroyo nga agtalinaed pay iti poder, lallalo na a kariten ti umili nga ibagsak ti rehimen na ken kagiddan daytoy ket lallalo a pakapsuten ti intero nga agturturay a sistema.

Back to top