Ang pasistang kamangtas sa rehimeng Arroyo ang nagtudlo sa kabatan-onan nga kinahanglang moanib sa NPA

Gregorio "Ka Roger" Rosal
Spokesperson
Communist Party of the Philippines
Setyembre 29, 2003

Sa pangalan sa Partido Komunista sa Pilipinas, buot nakong ipahayag ang akong nagdilaab nga kasilag ngadto sa militaristang rehimeng US-Arroyo ug AFP sa trinaydor nga pagdagit, pagtortyur ug pagpatay niining Septembre 22 sa Compostela Valley kanila Lito Doydoy, Marjorie Reynoso, Jonathan Benaro ug Ramon Regase, mga kabatan-onang aktibista nga membro sa Anakbayan, Anak ng Bayan Youth Party ug Sangguniang Kabataan.

Sila ang pinaka-ulahing mga biktima sa larga-tudong teroristang gubat sa rehimeng US-Arroyo. Dili sila armado ug dili makatarunganon ang pagpatay kanila. Segurohon sa Bagong Hukbong Bayan nga masilotan ang mga irong buang nga personel sa rehimeng US-Arroyo nga nagmando ug naghimo niining mangilngig nga krimen.

Sama sa pagpatay kanila Eden Marcellana ug uban pang mga aktibista sa nagkalain-laing dapit, sila Doydoy gipatay sa rehimeng US-Arroyo sa pagtuo nga mahimo niining hadlukon ang katawhan ug ilayo sila sa dalan sa rebolusyon. Partikular nga gipunting sa rehimeng US-Arroyo ang pasistang kamangtas niini ngadto sa mga kabatan-onan nga dinaghang nagpamembro sa NPA ug naghatag og mahinungdanon kaayong tampo sa pagpaasdang sa rebolusyonaryong pakigbisog sa katawhan.

Ang pagpatay sa upat nga kabatan-onang aktibista sa Compostela Valley nagpatataw sa kawalay interes ni Arroyo nga tubagon ang mga mulo sa mga kabatan-onan ug sa ilang mga ginikanan. Sa padayong pagpaka-itoy sa imperyalismong US, pagsamot sa korapsyon ug paggrabi sa pasistang kamangtas batok sa katawhan ubos sa malupigon ug mapahimuslanong paghari sa rehimeng US-Arroyo ug sa mga reaksyonaryong hut-ong, walay nabilin nga paglaom ang mga kabatan-onang anak sa mga mamumuo, mag-uuma ug uban pang naglisud nga katawhan nga makahaw-as sa gikaunloran nilang kalisdanan ug pagkadinaugdaog.

Sayop kaayo ang rehimeng US-Arroyo kung gituohang mapugngan ang pag-asdang sa rebolusyonaryong kalihukan pinaagi sa pasistang pagpangdagmal diha sa katawhan. Samtang labaw'ng migamit ang militar og pasismo sa pagpaningkamot nga kontrolon ang kabanikanhan, labaw usab nga nawala ang reaksyonaryong gahum sa kasingkasing ug diwa sa katawhan. Samtang labaw'ng nagkataas ang talaan sa mga biktima sa harasment, iligal nga pagpangaresto ug detensyon, mga pagpamatay, pagpanortyur, pagpangmasaker ug uban pang pasistang pagpangabuso, labaw usab nga nagkakusog ang tinguha sa katawhan nga mosukol.

Ang pasistang kabangis sa rehimeng US-Arroyo nagpasi-amgo sa mga kabatan-onan nga kinahanglang mopamembro sa NPA. Sa kamatuoran, sa mga lugar nga nagdulot og grabing militarisasyon ang larga-tudong gera sa rehimeng US-Arroyo, nagkadaghan ang kabatan-onang nagpamembro sa rebolusyonaryong kalihukan ug nagpasakop sa NPA.

Bugtong nasudnon-demokratikong rebolusyonaryong kalihukan ang naghatag og paglaom sa mga kabatan-onang Pilipino nga makakab-ot og buhong, malambuon, makatarunganon ug gawasnong kaugmaon. Busa sa ingon, linibo-libong kabatan-onan ang nagpamembro sa mga rebolusyonaryong organisasyon nga sama sa Kabataang Makabayan sa sulod ug gawas sa mga sonang gerilya. Ang kadaghanan sa mga manggugubat sa Bagong Hukbong Bayan mga kabatan-onan. Ang bag-ong dugong gidala nila naghatag og walay kinutubang kalagsik sa NPA. ###

Back to top