An pasista nga kabangis han rehimen US-Arroyo an nagtututdo ha mga batan-on nga kinahanglan umapi ha NPA

Gregorio "Ka Roger" Rosal
Spokesperson
Communist Party of the Philippines
Setyembre 29, 2003

Ha ngaran han Partido Komunista han Pilipinas, karuyag ko nga ipahayag an nagbabaga nga kangalas ha rehimen US-Arroyo ngan AFP ha pagtraydor ngan paghugot, pagtortyur ngan pagpatay hiton Setyembre 22 ha Compostela Valley kanda Lito Doydoy, Marjorie Reynoso, Jonathan Benaro ngan Ramon Regase-mga batan-on nga aktibista nga kaapi han Anakbayan, Anak ng Bayan Youth Party ngan Sangguniang Kabataan.

Hira an pinakaurhi nga mga biktima han terorista nga makusog nga gerra han rehimen US-Arroyo. Diri hira armado ngan waray katadungan an pagpatay ha ira. Sesegurohon han Bagong Hukbong Bayan nga masisirutan an mga tuyaw nga ayam nga tawohan han rehimen US-Arroyo nga nagsugo ngan naghimo hini nga makangingirhat nga krimen.

Sugad han pagpatay kanda Eden Marcellana ngan iba pa nga mga aktibista ha iba-iba nga lugar, hira Doydoy pinatay han rehimen US-Arroyo ha pagkakasering nga mahihimo hini nga hadlukon an katawhan ngan ihirayo hira ha dalan han rebolusyon. Partikular nga gintatadong han rehimen US-Arroyo an pasista nga kabangis hini ha mga batan-on nga tagdamo nga umapi ha NPA ngan naghahatag hin giimportantehi nga bulig ha pagsulong han rebolusyonaryo nga pakigbisog han katawhan.

An pagpatay ha upat nga batan-on nga aktibista ha Compostela Valley nagpapalandaw ha kawarayan hin interes ni Arroyo nga batonon an mga araba han mga batan-on ngan han ira mga kag-anak. Ha padayon nga pagpapakapapet ha imperyalismo nga US, paggrabi han kurapsyon ngan paggrabi han pasista nga pandarahug kontra ha katawhan ilarum han magtalumpiguson ngan magtiyupion nga paghahadi han rehimen US-Arroyo ngan han mga reaksyunaryo nga klase, waray nasasalin nga paglaum an mga batan-on nga anak han mga trabahador, parag-uma ngan iba pa nga nagkukuri nga katawhan nga makatalwas ha naluludluran nira nga kakurian ngan pananalumpigos.

Sayop kaupay an rehimen US-Arroyo kung nakakasering nga mapupugngan hini an pagsulong han rebolusyonaryo nga kagiusan pinaagi han pasista nga pandarahug ha katawhan. Samtang labaw nga gumagamit an militar han pasismo ha pananalinguha nga kontrolon an kabaryohan, labaw naman nga nawawara an reaksyunaryo nga gahum ha kasingkasing ngan diwa han katawhan. Samtang labaw nga naghihilaba an listahan han mga biktima han harasment, iligal nga pag-aresto ngan detensyon, mga pagpatay, pagtortyur, pagmasaker ngan iba pa nga pasista nga pan-aabuso, labaw naman nga nagkukusog an paghihingyap han katawhan nga umato.

An pasista nga kabangis han rehimen US-Arroyo in nagtututdo ha mga batan-on nga kinahanglan nga umapi ha NPA. Kamatuoran, ha mga lugar nga nagdudurot han grabi nga militarisasyon an terorista nga makusog nga gerra han rehimen US-Arroyo, nagtitikadamo an mga batan-on nga nasakob ha rebolusyonaryo nga kagiusan ngan umaapi ha NPA.

An nasudnon-demokratiko nga rebolusyonaryo nga kagiusan gud la an naghahatag hin paglaum ha mga batan-on nga Pilipino nga magkamay-ada hin abunda, mauswag, makatadungan ngan talwas nga kabubuwason. Sanglit yukot-yukot nga batan-on an umapi ha mga rebolusyonaryo nga organisasyon sugad han Kabataang Makabayan pareho ha sakob ngan ha gawas han mga sona nga gerilya. An nakadadamo nga mangaraway han Bagong Hukbong Bayan mga batan-on. An bag-o nga dugo nga dara nira naghahatag han waray katapusan nga karayhak ha NPA. ###

Back to top