Abling sulat alang sa nahaubos nga mga opisyal ug sundalo sa AFP

Gregorio "Ka Roger" Rosal
Spokesperson
Communist Party of the Philippines
Setyembre 05, 2003

Minahal namong mga kaigsoonan ug kababayan sa AFP, PNP ug CAFGU,

Nagsulat kami kaninyo tungod kay nahibalo kami nga kadaghanan kaninyo, ilabina ang mga yanong sundalo sa AFP, naggikan usab sa hanay sa mga kabus, dinaugdaog ug pinahimuslan. Nasayod kami nga ang mga anak sa mga mamumuo, mag-uuma ug uban pang kabus sa inyong han-ay anaay pundamental nga pagsabot sa interes sa naghagong masa ug sa hinungdan nganong adunay armadong rebolusyon sa atong nasud karon. Nagsalig kami nga inyong basahon kining sulata, sabton ang mga nahaunod ug itisok sa kahiladman ang mga panawagan.

Siguro gyud nga nahibaloan ninyo ang kabangis ug pagpanggun-ob nga gidulot sa katawhan sa larga-tudong gubat nga ginapatuman sa AFP nahasubay sa mando ni Gloria Macapagal-Arroyo ug sa hulhog sa iyang agalon nga imperyalismong US. Nasayran ninyo�g maayo kini tungod kay kamo ang gihimong instrumento sa mga pasistang heneral ug mga kadagkoang opisyal sa AFP ug gigamit nga pambala�g kanyon sa largatudong teroristang gubat.

Gipala nila ang inyong pagkatawo. Kamo ang gimandoang mangbomba sa mga kabukiran ug komunidad sa mga mag-uuma, mang-udyakang sa ilang mga kabalayan, magpaulan og bala sa mga sibilyan ug manilab sa ilang mga payag, manortyur sa mga gikatahapan o gi-akusahang rebelde ug daghan pang uban nga pagpangdagmal sa walay ikapanalipod nga katawhan. Matag adlaw nagkataas ang talaan sa mga biktima sa mga gipahimo kaninyo nga pagpangabuso sa tawhanong katungod. Sa inyong mga yuniporme nagdihog ang dugo sa katawhan�mga mamumuo ug maguumang naggikan usab sa sabakan nga inyong gigikanan�samtang nagpabiling daw walay duhig ang mga istar sa inyong mga heneral ug nangapromote pa hinuon sila isip ganti sa gidaghanon sa gipamatay nga gikatahapang mga NPA o suporter niini. Gihimo kamong berdugo sa katawhan samtang sila nagpakalimpyo.

Wala bisan diyut nga pakigbati ang mga kadagkoang opisyal sa AFP sa inyong nahaubos nga mga opisyal ug yanong kasundalohan. Gibahog kamo sa pakigsangka sa NPA ug MILF bisan pa nga apiki ang inyong nahimutangan, busa kasagarang nahitabo nga hikabsan sa kinabuhi ang daghang ihap sa inyong samang sundalo. Nagkadagha�g maayo ang nangamatay sa mga sama ninyong sundalo tungod sa walay kahulogan nga paghandus kaninyo sa mga pakigsangkang siguradong pakyas. Ug aron hitakpan kini, gituis sa inyong mga opisyal ang tinuod nga panghitabo. Wala tugbangi og angayang pag-ila ug tabang ang inyong mga kaubanang nagbuhis og kinabuhi sa nataran sa panggubatan.

Nasayod kami sa inyong gitagamtam nga mga pagpangabuso sa kamot sa inyong mga opisyal. Gihimo kamong mga ulipon ug gitratar nga daw walay kaugalingong pangisip. Gidagmalan kung masayop o kaha basta makursonadahan lang sa daw nahungog ninyong mga opisyal. Kasagaran kasab-an ug binaboyon kung adunay dyutay lang nga dili nila higustohan. Isip usa ka mapanumpuong instrumento sa reaksyonaryong estado, kinaiya na ang kawalay demokrasya sulod sa AFP. Walay luna aron makapadayag kamo sa inyong mga interes ug mulo. Patak-omon ang inyong mga b�b� ug bisan mga mata ug hunahuna buot nilang sirad-an atubangan sa daghan ninyong hikit-an nga mga kadunot nilang binuhatan. Pinakangilngig ang pagpatay kanila Navy Ensign Pesta�o ug Air Force Lt. Jessica Chavez tungod sa ilang pagrebenta ug planong pagbutyag sa mga nakita nilang anomalya. Gitakpan kining maong mga krimen ug gipagawas na lamang nga naghikog ang mga biktima.

Bunga niining mga panghitaboa, ang AFP ang pinakadali nga madunot sa tibuok reaksyonaryong nagharing sistema. Nakapamuy-ad ang mga kadagkoang opisyal, napatunhay ang ilang interes ug kagustohan ug plantadahay na ang ilang korapsyon ug mga hiwing binuhatan. Gihimo pa kamo nga private army sa mga politiko ug protektor sa dagkong mga negosyo ug kayutaan, tig-eskort sa iligal nga mga troso ug mga ismagol nga produkto, tighakutay og mga �inimbargong� marijuana ug uban pang kontrabandong gipasimang nila ngadto sa ilang mga pribadong tagoanan. Gigamit kamo sa kidnapping ug pagpanghold-ap sa mga bangko. Gisugal nila ang inyong kinabuhi alang sa kahiwian ug kaayohan sa butod nga mga heneral.

Ug baylo sa unsa? Sweldo nga dili kapaigo aron mahatagan man lamang og disenteng kinabuhi ang inyong gipangmingaw nga pamilya. Dilatar nga sweldo nga gigamit us� sa mga kurakot ninyong opisyal diha sa pagnegosyo ug pagpanugal. Pinudyot nga sweldo kung itandi sa dakoay kaayong sweldo sa pinakataas ninyong mga opisyal o sa mas dako pang kantidad nga ilang giluklok sa bulsa sa korapsyon ug mga binuhatang kriminal.

Nanglimbawot ang balahibo sa among mga kauban sa mga mulo ug gipang-asoy sa mga nangabalo sa daghan ninyong mga kaubanan, nga sa proseso sa ilang pagpaloap sa mga benepisyo sa ilang mipanaw nga mga bana, hilabihan silang gilisudlisod ug labaw�ng dautan pa, pangulitawhan ug aduna pay gipanghimong kabit sa mga nagkontrol sa mga pensyon ug benepisyo.

Sama kaninyo, naminaw kami pag-ayo sa mga mulo sa mga sama kaninyong batan-ong opisyal ug yanong kasundalohan niadtong Hulyo 27 sa Oakwood Hotel. Sama kini sa pagpaminaw namo�g maayo matag adunay mga sama ninyong sundalo nga nagaduol kanamo aron mangayo og tabang ug tambag mahitungod sa ilang mga mulo sa korapsyon sa inyong mga opisyal ug mga pagpangabuso kaninyo ug sa katawhan. Ug sama sa kanunay namong giingon sa mga opisyal ug sundalong nagdangop kanamo, gipahayag namo niadtong Hulyo 27 ang pagsimpatiya sa Partido Komunista sa Pilipinas, sa NPA ug tanang rebolusyonaryong pwersa sa gipadayag nga mga mulo.

Gipatin-aw namo nga kining tanang mga mulo nagsalamin lamang sa pagkadunot, pagkamersenaryo, pagkapapet, pagkapasista ug dili demokratikong organisasyon sa AFP. Ang AFP nagsilbi sa interes sa pipila ka mga gamhanan sa katilingban, sa pagpanalipod sa interes sa langyaw�ng gahum ug sa dagkong mga asendero, dagkong mga negosyante ug dagkong mga politiko. Di ba kanunay nakapunting ang inyong mga pusil ngadto sa mga mag-uumang nakigbisog alang sa ilang katungod sa yuta? Di ba kanunay kamong gihimong instrumento aron sumpoon ang mga mamumuong nagwelga? Di ba ang nag-unang katungdanan sa AFP karon mao ang pagpildi sa nag-alsang katawhan ug pagpukan sa rebolusyonaryong armadong kalihukang nakigbisog alang sa mga gikinahanglang pundamental nga pag-usab sa katilingban?

Panultion nila nga ang AFP kinahanglang manalipod sa nasud batok sa mga hulga sa langyaw�ng gahum. Apan wala kini himoa bisan pa nga matag adlaw nagpahimulos ang mga langyaw sa ekonomiya sa nasud, nagpahimulos sa baratong suholan sa mga mamumuo; nag-angkon og mga lapad nga kayutaan sa mga mag-uuma; nanghukhok sa dako kaayong balayranan para sa mga pautang nga wala man usab nato mapahimusli; nangilog ug nangontrol sa nagkalain-laing mahinungdanong aspeto sa ekonomikanhong kinabuhi; nangyatak sa atong nasudnong patrimonya ug nagpa-unlod kanato sa nagakalalom nga huyong-huyong sa krisis sa ekonomiya; ug nanginlabot bisan sa mga pangsulod nga hisgutanang pangpolitika ug pangmilitar sa nasud. Dili lamang sa walay gipanghimo ang AFP aron depensahan ang nasudnong interes, mismo ang mga kadagkoang opisyal niini ang nagdani sa armadong pagpanginlabot sa US dinhi sa nasud, nagpanamastamas bisan sa giingon niining gipanalipdan nga konstitusyon nga nagdili sa pagsulod ug pagbase sa mga langyaw�ng tropa ug sa ilang mga armas nukleyar.

Sama sa kinabag-ang katawhan, ang kinabuhi ninyong mga nahaubos nga opisyal ug yanong kasundalohan sa AFP nagakasamot og kalisud samtang nagkagrabi ang krisis sa ekonomiya. Duyog niini, nagkasamot usab ang mga kaso sa anomalya sa militar ug sibil nga burukrasya tungod sa pagkamas-kamas sa mga kadagkoang opisyal nga pahimuslan ang ilang gahum ug tilokon ang nagakagamay nga bahandi sa nasud. Dunot sa kinailadman ang AFP ug labaw pa kining nagkadunot sa pagpanalipod niini sa dunot, itoy ug mapahimuslanong sistema.

Ang pinakadagkong mga traydor sa nasud ang nagmando kaninyo nga ipunting ang inyong mga pusil ngadto sa katawhang nakigbisog alang sa demokrasya ug soberanya sa nasud. Gigamit ang AFP, buot nilang pildihon ang pakigbisog sa katawhan. Gipakusog nila ang gubat-sibil sa desperasyong panalipdan ang kasamtangang madaugdaugong sistema. Ug walay laing gipangdaot ang larga-tudong teroristang gubat kundili ang katawhang Pilipino.

Taliwala niining tanan, panahon na aron kamo mobarog. Mobarog batok sa korapsyon! Mobarog batok sa larga-tudong teroristang gubat sa rehimeng Arroyo! Mobarog batok sa pagpaka-itoy ni Arroyo sa US! Mobarog alang sa demokrasya! Mobarog alang sa pagpalingkawas sa nasud sa pagkapot sa mga langyaw! Mobarog alang sa katawhan!

Ang mga mulo sa sama ninyong mga batan-ong opisyal ug yanong kasundalohan nga gidulot sa nagsulabing kadunot sa papet nga estado ug sa gikahimutangan nilang mersenaryong hukbo ang nagtukmod kanila nga mo-alsa niadtong Hulyo 27. Apan ang gidala nilang adyenda nagkulang sa unod, dili maayo ang ilang pamaagi, ug wala sila�y hugot nga lambigit sa demokratikong kalihukang masa ug suporta gikan sa mabagang katawhan. Mas dautan pa, ang mas mitataw pa mao ang lihok ug adyenda sa mga dagkong politikong kalambigit nila nga buot lamang mopuli sa nangatungdanan nga rehimen.

Paspas nga mihugno ang pag-alsa. Apan ang usa ka maayong butang nga gibunga niini mao ang makakugang nga pagbutyag ug pagpanghimaraot nila sa hitak nga korapsyon sa reaksyonaryong gobyerno ug AFP-PNP, grabing demoralisasyon sa han-ay sa mga nahaubos nga opisyal ug yanong kasundalohan, ug ang paglaraw sa Malakanyang ug AFP og terorismo ug pagpamomba sa Mindanao aron maagni ang suporta ug interbensyong militar sa US. Wala lamang niini buksi ang mata sa katawhan sa mga kadunot sulod sa militar, gihatagan usab kamo niini og inspirasyon ug kaisog nga mosulti ug mosukol. Padayon niining gitay-og ang AFP, PNP, gobyerno, nagharing sistema ug ang mga reaksyonaryong nagharing hut-ong.

Nagkadaghan na usab sa inyong han-ay ang mibangon na. Karong bag-o lang, duha ka platun sa CAFGU ug ang ilang mga handler sa AFP sa Agusan del Sur ang dungan nga miduol sa NPA. Dili na nila maagwanta ang pagpangabuso sa ilang mga opisyal ug ang pagpangabuso sa katawhan nga gipahimo kanila. Gitambagan ug gi-ayudahan pa sila sa katawhan sa maong lugar. Gisaulog sa katawhan didto kining panghitaboa ug gidayeg ang mga CAFGU ug sundalong mibalhin ngadto sa NPA.

Panahon na aron mobarog ug molihok kamo alang sa mga lehitimong kabulahanan ninyo ingon man sa katawhan. Mamahimo kamong:

1. Magtukod og mga sikretong grupo aron hisgutan ang inyong mga suliran ug mulo, ang tinubdan niini ug ang kalambigitan niini sa mga suliran sa katawhan ug sa tibuok nasud.
2. Magtukod og mga ligal nga kapunongan sa mga yanong sundalo, ihingusog ang katungod sa pagtukod niini ug aghaton usab ang pag-organisa sa inyong mga pamilya alang sa komun ninyong kabulahanan. Magpagula og mga abling sulat ug pamahayag ug modiskurso sa mga dayag nga porum. Gamiton ang nagkalain-lain pang dayag nga demokratikong talaytayan sa inyong pakigbisog alang sa inyong mga interes.
3. Magpalalom sa pakisusi ug pagtuon sa kahimtang sa AFP ug tibuok organisasyong militar, sa gobyerno ug sa atong nasud ug i-apud-apod kini sa mga public bulletin board ug sa nasud.
4. Magpadaghan ug mag-apud-apod og mga progresibong balasahon ug maglunsad og mga pagtuon ug panaghisgot mahitungod sa unod niini. Among gisugyot nga hugot ninyong tukion ug tun-an ang nasudnondemokratikong rebolusyonaryong programa sa National Democratic Front of the Philippines.
5. Dumilian ang pagpatuman sa mga iligal ug anti-katawhang mando sa inyong kadagkoang mga opisyal lakip ang mga operesyong pagpangukadyang sa mga komunidad sa mga mag-uuma, iligal nga pagpangaresto, pagtortyur, pagpamomba o pagpaarak diha sa mga sibilyan ug uban pang mga mando nga makadaot sa katawhan ug naglapas sa ilang mga demokratikong katungod. Mapangahason nga ibutyag ug batokan ang bisan unsang ingon niining binuhatan sa inyong mga labaw.
6. Taman nga nahisakop kamo sa AFP ug kuyog sa mga operesyon batok sa mga katawhan ug mga rebolusyonaryong pwersa, dako ang posibilidad nga mahisugamak kamo sa mga armadong panagsangka sa NPA. Sa ingong mga kahimtang, gidani namo kamo nga paningkamotan ninyo nga makahimo og mga pamaagi aron malikayan nga magkaengkwentro. Kung mahitabo man kini, gidani namo kamo nga magdeklara gilayon og hunong-buto ug ihatag ang inyong mga armas sa NPA. Dili bugti sa inyong kinabuhi ang panalipdan ang usa ka dunot nga organisasyon ug usa ka dunot nga sistema. Hinunoa ninyo ang inyong mga pamilya. Bahin sa NPA, ilhon ang inyong mga katungod ug itratar kamo�g maayo nahasubay sa mga internasyonal nga makatawo nga balaud ug mga kalagdaan sa gubat.
7. Samtang anaa sa sulod sa reaksyonaryong militar, sikreto nga makiglambigit ug molihok alang sa rebolusyonaryong kalihukan. Mamahimo kamong magpagawas og mga armas ug uban pang kahimanang militar, mohatag sa NPA og gikinahanglang impormasyon sa lihok sa militar ug uban pang tabang sa mga rebolusyonaryong pwersa.
8. Makiglambigit ug makighiusa sa dayag nga demokratikong kalihukang masa. Ilambigit ang inyong mga lehitimong mulo sa mga lehitimo usab nga mga mulo sa nagkalain-laing demokratikong sektor ug sa mabagang masa sa katawhan. Mas epektibo ninyong mapakigbisogan ang inyong mga interes kung nakalambigit ug nalangkob kini sa pakigbisog sa nagkalain-laing demokratikong sektor ug sa mabagang katawhan, ilabina nga ang mga gipakigbisogan nila mao usab ang mga pundamental nga interes ninyo, sa inyong pamilya ug mga kahut-ong.
9. Moanib sa rebolusyonaryong kalihukan. Ang inyong mga suliran isip mga nahaubos nga opisyal ug yanong kasundalohan, sa sangputanan nakalambigit sa mga suliran sa katawhang Pilipino ug mahukmanong masulbad lamang pinaagi sa rebolusyonaryong pakigbisog. Mopasakop sa NPA o dili kaha sa Milisyang Bayan o mga rebolusyonaryong organisasyong masa sa kabanikanhan o kasyudaran. Kung dili usab makaya ang bisan asa niini, mopahawa sa serbisyo sa reaksyonaryong militar ug magpakasibilyan na lamang. Mas maayo pa gihapon kini imbes nga magpadayon sa pag-alagad sa dunot nga papet ug reaksyonaryong militar.

Naglaom kami nga inyong tubagon kining among panawagan.

Hingpit nga matinuoron kaninyo, sa ngalan sa rebolusyonaryong katawhang Pilipino,

Gregorio �Ka Roger� Rosal
Tigpam�b�, Partido Komunista sa Pilipinas
5 Septembre 2003