Silulukat a surat kadagiti nababbaba nga opisyal ken soldado ti AFP

Gregorio "Ka Roger" Rosal
Spokesperson
Communist Party of the Philippines
Setyembre 05, 2003

Ingungoten mi a kakabsat ken kailian iti AFP ken PNP ken CAFGU,

Agsurat kami kadakayo gapu ta ammo mi a kaaduan kadakayo, aglalo dagiti ordinaryo a soldado ti AFP, ket naggapu met iti intar dagiti nakurapay, maidadanes ken magunggundawayan. Ammo mi a dagiti annak dagiti mangmangged, mannalon ken dadduma pay a nakurapay iti intar yo ket addaan batayan a pannakaawat iti interes ti anak ling-et ken iti gapu no apay nga adda ti armado a rebolusyon ti kakailian tayo itatta. Agtalek kami a basaen yo daytoy a surat, adalen dagiti linaon ken ipapuso yo dagiti panawagan.

Sigurado nga ammo yo ti kinarungsot ken panangdangran nga ipalpalak-am iti umili ti todo-gerra nga ipatpatungpal ti AFP segun iti mandar ni Gloria Macapagal-Arroyo ken iti duron ti amo na nga imperyalismo nga US. Ammo yo unay daytoy gapu ta dakayo ti araramaten dagiti pasista a heneral ken nangangato nga opisyal ti AFP ken us-usaren da a pambala iti kanyon ti terorista a todo gerra.

Punpunasen da ti kinatao yo. Dakayo ti mamandaran nga agbomba kadagiti taltalon ken komunidad dagiti mannalon, agasak kadagiti balay, agpatudo ti bala kadagiti sibilyan ken agpuor kadagiti kalapaw, agtortyur kadagiti masuspetsa wenno maakusar a rebelde ken adu pay a panagranggas iti awan laban na nga umili. Inaldaw ket umatatiddog ti listaan dagiti biktima ti ipapaaramid da kadakayo a panagabuso kadagiti karbengan kas tao. Kadagiti uniporme yo ket namantsaan ti agar-arubos a dara ti umili�dagiti mangmangged ken mannalon a naggapu met kadagiti aanakan a nagtaudan yo�bayat nga agtaltalinaed a kasla awan rugit dagiti estrelya dagiti heneral yo ken mapromote da pay kas premyo iti kaadu ti pinatay da a masuspetsa nga NPA wenno suporter daytoy. Ar-aramiden da kayo a berdugo ti umili bayat nga isuda ket agindadalus.

Awan uray bassit a panangisakit ti nangangato nga opisyal ti AFP kadagiti nababbaba nga opisyal ken ordinaryo a soldado. Isubsubo da kayo iti pannakilaban iti NPA ken MILF uray pay alanganin ti kasasaad yo. Isu a masansan a mapasamak nga adu ti matmatay ti adu a bilang dagiti kapada yo a soldado. Umad-adu nga umad-adu dagiti kapareho yo a soldado a matmatay gapu iti awan panangipateg a panangiduron kadakayo kadagiti labanan a sigurado a mapaay. Ken tapno kaluban daytoy, balbalinsuweken dagiti opisyal yo ti pudno a pasamak. Saan da nga ikkan ti rumbeng a panangbigbig ken tulong dagiti soldado a natay iti labanan.

Ammo mi ti laklak-amen yo a panagabuso iti ima dagiti opisyal yo. Ar-aramiden da kayo a katulong ken tratratoen da kayo a kasla awanan bukod a panunot. Saksaktan da kayo no agkamali wenno basta makursunadaan da kayo dagiti kasla agmauyong nga opisyal. Kadawyan a bugbugkawan ken tagibassiten da kayo no adda bassit laeng a dida magustoan.

Kas maysa a naranggas nga instrumento ti reaksyunaryo nga estado, natural ti kinaawan ti demokrasya iti uneg ti AFP. Awan ti gundaway tapno maiyebkas yo dagiti interes ken arungaing yo. Paulimeken da dagiti bibig yo ken uray dagiti mata ken panunot yo ket kayat da a serraan iti sango ti adu a makitkita yo a kinabulok da. Karurugitan ti inaramid da a panangpatay kada Navy Ensign Pesta�o ken Air Force Lt. Jessica Chavez gapu iti panagkedked ken ranta da a panangibutaktak kadagiti nakita da a korapsyon. Kinaluban da dagitoy a krimen ken pinaruar da a nag-suicide dagiti biktima.

Bunga ti kastoy a pasamak, ti AFP ti kapardasan a mabulok iti intero a reaksyunaryo nga agturturay a sistema. Aglaslastog dagiti nangangato nga opisyal, agrimrimbaw dagiti interes ken paggustoan da ken sipaparang ti korapsyon da ken dagiti rinuker a trabaho. Ususaren da kayo pay a tao da kadagiti korapsyon ken uray iti panangpataray kadagiti sindikato da. Ar-aramiden da kayo a private army dagiti pulitiko ken protektor ti dadakkel a negosyo ken daga, taga-escort kadagiti iligal a troso ken dagiti smuggled a produkto, tagabunag kadagiti �nakompiska� a marijuana ken dadduma pay a kontrabando nga ipalemmeng da iti pribado a bodega da. Us-usaren da kayo iti kidnaping ken panagholdap iti bangko. Itaytaya da ti biag yo para iti korapsyon ken pagnam-ayan ti bundat a heneral.

Ken kasukat ti ania? Sueldo nga umdas tapno maikkan man laeng ti disente a biag ti maulila a pamilya yo. Na-delay ti sueldo ta ususaren da pay kadagiti kurakot dagiti opisyal iti panagnegosyo wenno sugal. Sangabassit a sueldo no ikumpara iti nakadakdakkel a sueldo ti kangatoan nga opisyal wenno iti dakdakkel pay a gatad nga ibulbulsa da iti korapsyon ken kadagiti aramid a kriminal. Sumsumgar ti dutdot dagiti kakadua mi kadagiti arungaing ken istorya dagiti balo ti adu kadagiti kakadua yo, nga iti proseso ti panagala da kadagiti benepisyo ti natay nga asawa ket sobra a parparigaten ken nakarkaro pay ket ar-armen ken adda pay dagiti nagbalin a kabit dagiti mangkonkontrol kadagiti pensyon ken benepisyo.

Kapada yo, nainget kami a dimngeg kadagiti arungaing dagiti kapada yo nga ubbing nga opisyal ken ordinaryo a soldado idi Hulyo 27 iti Oakwood Hotel. Kapada daytoy ti nainget a panagdengngeg mi iti tunggal adda dagiti kapada yo nga umas-asideg kadakami tapno dumawat ti tulong ken balakad maipapan kadagiti asug da iti korapsyon dagiti opisyal yo ken dagiti panangabuso kadakayo ken iti umili. Ken kas iti kankanayon mi nga ibagbaga kadagiti opisyal ken soldado nga umas-asideg kadakami, impablaak mi idi Hulyo 27 ti pannakisimpatya ti Partido Komunista ti Pilipinas, ti NPA ken amin a rebolusyonaryo a puersa kadagiti inruar da nga arungaing.

Ilawlawag mi nga amin dagitoy nga arungaing ket sarming ti kinabulok, kinamersenaryo, aso-aso, pasista ken di demokratiko nga organisasyon ti AFP. Ti AFP ket agserserbi iti interes ti sumagmamano a nabileg iti gimong, iti panangsalaknib iti interes dagiti ganggannaet a poder ken ti dadakkel nga asendero, dadakkel a negosyante ken dadakkel a pulitiko. Saan ketdin a kanayon a nakaturong dagiti paltug yo kadagiti mannalon a lumablaban para iti karbengan da iti daga? Saan ketdin a kanayon kayo a maar-aramat tapno lippiten dagiti mangmangged nga agwelwelga? Saan ketdi a ti kangrunaan a rebbengen ti AFP itatta ket parmeken ti panagbaringkuas ti umili ken rebbeken ti rebolusyonaryo nga armado a tignayan a makidang-dangadang para kadagiti kasapulan a batayan a panagbalbaliw iti gimong?

Makunkuna a ti AFP ket kasapulan a mangsalaknib iti pagilian laban kadagiti pangta ti ganggannaet a bileg. Ngem awan ar-aramiden da uray pay no iti inaldaw ket gunggundawayan dagiti ganggannaet ti ekonomya ti pagilian, gunggundawayan da ti nalaka a sueldo dagiti mangmangged; gamgamgamen ti nalalawa a daga dagiti mannalon; pespespesen ti nagdakkel a bayad para kadagiti utang a di tayo met nagnam-ayan; ag-agawen ken konkontrolen ti nadumaduma nga importante nga aspeto ti biag a pang-ekonomya; iluges-luges ti nailian a patrimonya ken ilumlum da tayo iti umun-uneg nga umun-uneg a gayong-gayong ti krisis iti ekonomya; ken makibibiang uray kadagiti internal nga usapin a pulitikal ken militar iti pagilian. Saan laeng nga awan ti ar-aramiden ti AFP tapno salakniban ti nailian nga interes, mismo a dagiti nangangato nga opisyal daytoy ti mangal-allukoy iti armado a pannakibiang ti US iti pagilian, mangiluges-luges uray iti ibagbaga da a salsalakniban da a konstitusyon a mangiparit iti iseserrek ken panagbase dagiti ganggannaet a tropa ken dagiti armas nukleyar da.

Kapada ti adu nga umili, ti biag yo a nababbaba nga opisyal ken dagiti ordinaryo a soldado ti AFP ket rumigrigat a rumigrigat bayat a lallalo a kumarkaro ti krisis iti ekonomya. Kagiddan daytoy, kumarkaro a kumarkaro met dagiti kaso ti korapsyon iti uneg ti militar ken burukrasya a sibil gapu iti panagapura dagiti nangangato nga opisyal a pagnam-ayan ti bileg da ken ibusen ti bumasbassit a kinabaknang ti umili. Bulok iti kaunggan ti AFP ken lallalo pay daytoy a mabulbulok iti panangsalaknib na iti bulok, aso-aso ken manangidadanes a sistema.

Ti kadadakkelan a traydor iti umili ti mangmanmandar kadakayo nga iturong dagiti paltug yo iti umili a makilablaban para iti demokrasya ken soberanya ti pagilian. Usar ti AFP, kayat da a parmeken ti dangadang ti umili. Pair-irtengen da ti gerra-sibil iti desperasyon a salakniban ti agdama a manangidadanes a sistema. Ken awan sabali a perperdien daytoy todo-todo a gerra a terorista no di ket ti umili a Pilipino.

Iti sango amin dagitoy, panawenen tapno agtakder kayo. Agtakder laban iti korapsyon! Agtakder laban iti terorista a todo-todo a gerra ti rehimen nga Arroyo! Agtakder laban iti kina-aso-aso ni Arroyo iti US! Agtakder para iti demokrasya! Agtakder para iti panangwayawaya ti umili manipud iti gammat dagiti ganggannaet! Agtakder para iti umili!

Dagiti arungaing dagiti kapada yo nga ubbing nga opisyal ken ordinaryo a soldado gapu iti sobra a kinabulok ti aso-aso nga estado ken ti nakaipaunegan yo a mersenaryo a buyot ket nangiduron nga agaklas da idi Hulyo 27. Ngem ti awit-awit da nga adyenda ket kurang iti linaon, saan a nasayaat ti wagas da, awanan da ti nairut a silpo iti demokratiko a tignayan masa ken suporta manipud iti naruay nga umili. Ti dakes na pay, ti mas timmampok pay ket ti tignay ken adyenda ti dadakkel a pulitiko a kasilsilpo da nga aggandat laeng a sumukat iti nakatugaw a rehimen.

Napardas a natumba ti panagalsa. Ngem ti maysa a nasayaat a banag nga imbunga daytoy ket ti nakaskasdaaw a panangibutaktak ken panagkondena da iti nakapalpalalo a korapsyon iti reaksyunaryo a gubyerno ken AFP-PNP, nakaro a demoralisasyon iti intar dagiti opisyal ken soldado, ken ti panagplano ti Malakanyang ken AFP iti terorismo ken panagbomba iti Mindanao tapno maawis ti suporta militar ken interbensyon militar ti US. Saan laeng a linuktan daytoy ti mata ti umili kadagiti kinabulok iti uneg ti militar, inikkan na kayo met itatta ti inspirasyon ken pigsa ti pakinakem nga agsarita ken lumaban. Agtultuloy ita a magunggunggon ti AFP, PNP, gubyerno, agturturay a sistema ken dagiti reaksyunaryo nga agturturay a dasig.

Umad-adu metten dagiti nagtaud iti intar yo a bumangbangon. Itay nabiit, dua a platun ti CAFGU ken dagiti handler iti AFP idiay Agusan del Sur ti kolektibo nga immasideg iti NPA. Saan dan a mairusok ti panangabuso dagiti opisyal da ken ti panangabuso iti umili a maipapaaramid kadakuada. Binalakadan ken tinulongan pay ida dagiti umili iti lugar. Senelebraran ti umili idiay daytoy a pasamak ken dinayaw da dagiti CAFGU ken soldado a bimmangir iti benneg ti NPA.

Panawenen tapno dakayo ket agtakder ken agtignay para kadagiti lehitimo a pagimbagan yo ken ti pagilian. Mabalin yo ti:

1. Mangibangon kadagiti limed a grupo tapno tungtongen dagiti problema ken arungaing yo, ti ramut dagitoy ken ti relasyon dagitoy kadagiti problema ti umili ken ti intero a pagilian.
2. Mangibangon kadagiti ligal a samahan dagiti ordinaryo a soldado, mangirupir ti karbengan iti panangbukel kadagitoy ken allukoyen met ti panagorganisa dagiti kapamilya yo para iti komon yo a pagimbagan. Mangiruar kadagiti silulukat a surat ken pahayag ken agsarita kadagiti hayag a porum. Usaren ti nadumaduma pay a naparang a demokratiko a dalanan dagiti pannakilaban yo para kadagiti interes yo.
3. Paunegen ti panagsukisok ken panagadal iti kasasaad ti AFP ken intero nga organisasyon militar, ti gubyerno ken dagiti umili tayo ken iwaras dagitoy kadagiti masmidya ken iti umili.
4. Agpaadu ken agiwaras kadagiti progresibo a babasaen ken agisayangkat kadagiti panagadal ken talakayan maipapan iti linaon daytoy a surat. Isingasing mi a nairut yo a sukisoken ken adalen ti nailian-demokratiko a rebolusyonaryo a programa ti National Democratic Front of the Philippines.
5. Sumupring kadagiti iligal ken anti-umili a mandar dagiti nangangato nga opisyal yo maibilang dagiti operasyon a mangasak kadagiti komunidad dagiti mannalon, iligal a panagaresto, panagtortyur, panagpatudo kadagiti bomba wenno bala kadagiti sibilyan ken dadduma pay a mandar a makadangran iti umili ken manglablabsing kadagiti demokratiko a karbengan da. Itured nga ibutaktak ken labanan dagiti kastoy nga ar-aramiden dagiti lider yo.
6. Inggana a dakayo ket maibilang iti AFP ken kakuyog kadagiti operasyon laban kadagiti umili ken dagiti rebolusyonaryo a puersa, dakkel ti posibilidad a maibaon kayo kadagiti armado nga engkwentro iti NPA. Kadagitoy a sitwasyon, allukoyen mi a padasen yo nga agiyaramid kadagiti wagas tapno liklikan ti rinnupak. No maaddaan man, allukoyen dakayo a daras a dumawat ti sispayr ken isurender dagiti armas yo iti NPA. Saan a kasubad ti biag yo a salakniban ti maysa a bulok nga organisasyon ken maysa a bulok a sistema. Laglagipen yo dagiti pamilya yo. Iti benneg ti NPA, bigbigen mi dagiti karbengan yo ken nalaing a tratoen da kayo segun kadagiti internasyunal a makatao a linteg ken dagiti annuroten iti gubat.
7. Makisilpo ken makikaysa iti naparang a demokratiko a tignayan masa. Isilpo dagiti lehitimo nga arungaing iti lehitimo met a kiddaw ti nadumaduma a demokratiko a sektor ken ti nalawa a masa ti pagilian. Mas epektibo a mailaban yo dagiti interes yo no nakasilpo ken nakatipon daytoy iti pannakilaban ti dadduma a demokratiko a sektor ken ti ad-adu nga umili. Aglalo ta dagiti ilablaban da ket adda iti batayan nga interes yo kasta met dagiti pamilya ken dagiti kadasig yo.
8. Umikkakt iti panagserbisyo iti reaksyunaryo a militar ken agbalin nga ordinaryo a sibilyan laengen. No ar-arigen, nasaysaayat daytoy ngem ti agtultuloy iti panagserbi iti bulok nga aso-aso ken reaksyunaryo a militar. Nasaysayaat pay, tumipon kadagiti rebolousyonaryo nga organisasyon masa iti kaaw-awayan wenno syudad.
9. Tumipon kayo iti rebolusyonaryo a tignayan. Iyabante ti Tignayan a Lt. Crispin Tagamolila. Dagiti problema yo kas ubbing nga opisyal ken ordinaryo a soldado, no ar-arigen ket nakasilpo kadagiti problema ti sangkailian a Pilipino ken nakedngan a marisut babaen laeng iti rebolusyonaryo a dangadang.

   a) Bayat nga adda kayo pay iti reaksyunaryo a militar, limed a sumilpo ken agtignay kayo para iti rebolusyonaryo a tignayan, Mabalin yo ti agiruar kadagiti armas ken dadduma pay a ramramit militar, mangipatulod iti NPA kadagiti kasapulan nga impormasyon iti garaw ti militar wenno mangited ti dadduma pay a tulong kadagiti rebolusyonaryo a puwersa.

   b) Kas kenni Lt. Crispin Tagamolila, mabalin yo ti tumipon iti NPA wenno kadagiti yunit ti Milisya ti Umili ken ddirekta a lumaok iti armado a dangadang ti umili a Pilipino.

Agnamnama kami a sungbatan yo dagitoy a panawagan mi.

Sinunumo toy biang, iti nagan ti rebolusyonaryo a sangkailian a Pilipino,

Gregorio �Ka Roger� Rosal
Tagapagsarita, Partido Komunista ti Pilipinas
5 Septembre 2003