Abri nga surat ha mga nakakaubos nga opisyal ngan sundalo han AFP

Gregorio "Ka Roger" Rosal
Spokesperson
Communist Party of the Philippines
Setyembre 05, 2003

Mahal namon nga mga bugto ngan kataginasud ha AFP ngan PNP ngan CAFGU,

Nagsusurat kami ha iyo tungod kay nahibaruan namon nga kadam-an ha iyo, labina an mga ordinaryo nga sundalo han AFP, nagtikang gihapon ha ranggo han mga kablas, tinalumpigos ngan tiniyupi. Maaram kami nga an mga anak han mga trabahador, paraguma ngan iba pa nga kablas ha iyo ranggo mayda batakan nga pagsantop ha interes han anak-ha-balhas ngan ha hinungdan kun kay ano nga mayda yana armado nga rebolusyon ha aton nasud. Natapod kami nga babasahon niyo ini nga surat, santupon an mga gin-uunod ngan ibutang ha iyo kasingkasing an mga panawagan.

Segurado nga maaram na kamo han kamabangis ngan destroso nga gindudurot ha katawhan han makusog nga gerra nga iginpapatuman han AFP subay ha sugo ni Gloria Macapagal-Arroyo ngan ha sulsol han amo niya nga imperyalismo nga US. Maaram na kaupay kamo hini tungod kay kamo an ginkakasangkapan han mga pasista nga heneral ngan higtaas nga opisyal han AFP ngan ginagamit nga pambala ha kanyon han terorista nga all-out war.

Ginpapara nira an iyo pagkatawo. Kamo an ginsusugo nga mambomba ha mga uma ngan komunidad han mga parag-uma, maghahalikwat ha ira mga balay, magpauran hin bala ha mga sibilyan ngan mansunog han ira mga payag, magtortyur ha mga ginsususpetsahan o gin-aakusaran nga rebelde ngan gidadamoi pa nga iba nga pagpapakuri ha waray ikakaato nga katawhan. Adlawadlaw naghihilaba an listahan han mga biktima han ginpapahimo ha iyo nga pan-aabuso ha mga katungod pantawo. Ha iyo mga uniporme nadukot an dugo han katawhan�mga trabahador ngan parag-uma nga nagtikang liwat ha mga sabakan nga iyo gintitikangan�samtang nagpapabilin nga sugad-sugad hin waray mantsa an mga estrelya han iyo mga heneral ngan napo-promote pa komo premyo ha damo nga ginpatay nga mga ginsususpetsahan nga NPA o suporter hini. Ginhihimo kamo nga berdugo han nasud samtang hira in nagpapakalimpyo.

Waray bisan guti nga pagpapakasakit an higtaas nga opisyal han AFP ha iyo mga nakakaubos nga opisyal ngan ordinaryo nga sundalo. Gintutubong kamo ha pakikig-away ha NPA ngan MILF bisan pa nga ruhaduha an iyo kamutangan sanglit sukot nga nahitatabo nga namamatay an damo nga ihap han iyo mga igkasi sundalo. Nagtitikadamo an iyo mga igkasi sundalo nga namamatay tungod ha waray pulos nga pagpapaatubang ha iyo ha mga away nga piho nga pakyas. Ngan agud pagtahuban ini, ginbibirikis han iyo mga opisyal an tinuod nga panhitabo. Diri gintatagan hin naaangay nga pagkilala ngan bulig an iyo mga kaupod nga namamatay ha pag-awayan.

Maaram kami han nahiaguman niyo nga pan-aabuso ha kamot han iyo mga opisyal. Ginhihimo kamo nga mga suruguon ngan gintatratar kamo nga sugad-sugad hin waray kalugaringon nga paminsada. Ginpapasakitan kung nagsasala o basta makursunadahan han baga nalurong niyo nga mga opisyal. Kaurog na nga pagbubusaan ngan pagbubuyayawan kun may guti la hira nga waray maruruyagi.

Komo usa nga mapanmuypoy nga instrumento han reaksyunaryo nga estado, unob an kawarayan hin demokrasya ha sakob han AFP. Waray lugar agud makakagpahayag kamo han iyo mga interes ngan araba. Ginpapatak-om an iyo mga baba ngan bisan mga mata ngan pinsada niyo karuyag nira nga sadhan atubangan han damo nga nakikita niyo nga mga kadunotan nira. Pinakagrabi an ginhimo nga pagpatay kanda Navy Ensign Pesta�o ngan Air Force Lt. Jessica Chavez tungod ha pagsuki ngan plano nira nga pagbubuyagyag ha mga nakita nira nga kadunotan. Gintahuban ini nga mga krimen ngan ginpagawas na la nga nag-uunay an mga biktima.

Bunga han sugad hini nga mga panhitabo, an AFP an pinakadagmit nga madunot ha bug-os nga reaksyunaryo nga naghahadi nga sistema. Nakakapatakas an mga nakakataas nga opisyal, napapabawbaw an ira interes ngan karuyagon ngan butaran na an ira kurapsyon ngan mga maraut nga gawi. Ginagamit pa kamo nga tawohan ha ira mga kadunotan ngan bisan ha pagpapadalagan han ira mga sindikato. Ginhihimo kamo nga private army han mga pulitiko ngan protektor han dagko nga negosyo ngan katunaan, parag-escort han mga iligal nga troso ngan mga smuggled nga produkto, paraghakot han mga �ginkumpiska� nga marijuana ngan iba pa nga kontrabando nga ginpapasimang nira ha pribado nga mga taguan nira. Ginagamit kamo ha kidnapping ngan panhohold-ap ha bangko. Ginpupusta nira an iyo kinabuhi para ha kadunotan ngan benepisyo han mga bundat nga heneral.

Ngan kabalyo han ano? Sweldo nga diri nakakasadang agud tagan man la hin disente nga kinabuhi an iyo mga naiilo nga pamilya. Nadelatar nga sweldo nga ginagamit anay han mga kurakot niyo nga opisyal ha pagnenegosyo o paghuhuygo. Gigugutii nga sweldo kung itatanding ha gidadakoi nga sweldo han pinakahigtaas niyo nga opisyal o ha mas dako pa nga balor nga ginbubursa nira ha kurapsyon ngan mga gawi nga kriminal.

Nangangarahibot an barahibo han amon mga kasama ha mga araba ngan estorya han mga nabalo han damo niyo nga mga kaupod, nga ha proseso han ira paglalanat ha mga benepisyo han ira namatay nga asawa sobra nga ginpapakurian ngan grabi pa ginkukunsoylohan ngan mayda mga ginkakabit pa han mga nagkokontrol ha mga pensyon ngan benepisyo.

Sugad ha iyo, mailob kami nga nanungog ha mga araba han mga igkasi niyo batan-on nga opisyal ngan ordinaryo nga sundalo hadton Hulyo 27 ha Oakwood Hotel. Sugad ini han mailob nga panunungog namon ha kada mayda mga sugad ha iyo nga nadaup ha amon agud mangaro hin bulig ngan sagdon hiunong ha ira mga reklamo ha kurapsyon han iyo mga opisyal ngan mga pan-aabuso ha iyo ngan ha katawhan. Ngan sugad han permi namon nga ginsesering ha mga opisyal ngan sundalo nga nadaup ha amon, ginplastar namon hadton Hulyo 27 an pagsimpatiya han Partido Komunista han Pilipinas, han NPA ngan han ngatanan nga rebolusyonaryo nga pwersa ha mga ginpahayag nga araba.

Iginlilinaw namon nga an ngatanan han iyo mga araba ladawan han kadunotan, pagkamersenaryo, papet, pasista ngan di demokratiko nga organisasyon han AFP. An AFP nagseserbi ha interes han pipira nga poderoso ha katilingban, ha pagdedepensa ha interes han dayuhan nga gahum ngan han dagko nga asyendero, dagko nga negosyante ngan dagko nga pulitiko. Di ba permi nga nakataga an iyo mga pusil ha mga parag-uma nga naato para ha ira katungod ha tuna? Di ba permi kamo nga ginkakasangkapan agud puypoyon an mga trabahador nga nagwewelga? Di ba an prinsipal nga responsibilidad han AFP yana in pirdihon an pag-aalsa han katawhan ngan lipolon an rebolusyonaryo nga armado nga kagiusan nga nakikigbisog para ha mga ginkikinahanglan nga batakan nga pagbabag-o ha katilingban?

Ginsesering nga an AFP in kinahanglan nga magdepensa ha nasud kontra ha mga tarhug han dayuhan nga gahum. Pero waray ini ginhihimo bisan pa adlaw-adlaw nga naniniyupi an mga dayuhan ha ekonomiya han nasud, naniniyupi ha barato nga suhol ha mga trabahador; nag-aamkon han higluag nga katunaan han mga paraguma; nagsusupsop han gidadakoi nga kabaraydan para ha mga pautang nga di naman naton mabebenepisyohan; nan-aagaw ngan nagkokontrol ha iba-iba nga mahinungdanon nga aspeto han kinabuhi ekonomiya; nagtatamak ha aton nasudnon nga patrimonya ngan naglulubong ha aton ha tikahilarum nga hanang han krisis ha ekonomiya; ngan nanginginlabot bisan ha mga pansakob nga karukayaknon pulitikal ngan militar ha nasud. Diri la ha waray ginhihimo an AFP para depensahan an nasudnon nga interes, mismo an mga higtaas nga opisyal hini an nag-aaghat ha armado nga panginginlabot han US ha nasud, nagtatamak bisan ha ginsesering nga gindedepensahan hini nga konstitusyon nga nagdidiri ha pagsakob ngan pagbabase han mga dayuhan nga tropa ngan han ira mga armas nukleyar.

Sugad han nakadadamo nga katawhan, an kinabuhi niyo nga nakakaubos nga opisyal ngan mga ordinaryo nga sundalo han AFP in nagtitikakuri samtang labaw nga naggrabi an krisis ha ekonomiya. Kadungan hini, nagtitikagrabi naman an mga kaso han kadunotan ha sakob han militar ngan burukrasya sibil tungod ha pagdidinagmit han higtaas nga opisyal nga pahimulsan an ira poder ngan limason an nagtikahaligot nga karikuhan han nasud. Dunot ha pinakaubod an AFP ngan labaw pa ini nga nadudunot ha pagdedepensa hini ha dunot, papet ngan matalumpiguson nga sistema.

An pinakadagko nga traydor ha nasud an nagsusugo ha iyo nga itaga an iyo mga pusil ha katawhan nga nakikig-away para ha demokrasya ngan soberanya han nasud. Gamit an AFP, karuyag nira nga pirdihon an pakigbisog han katawhan. Ginpapakusog nira an gerra sibil ha desperasyon nga madepensahan an presente nga matalumpiguson nga sistema. Ngan waray iba nga nadedestroso hini nga terorista nga makusog nga gerra kundi an katawhan nga Pilipino.

Atubangan hini ngatanan, panahon na agud kamo tumindog. Tumindog kontra ha kurapsyon! Tumindog kontra ha terorista nga makusog nga gerra han rehimen Arroyo! Tumindog kontra ha pagpapakapapet ni Arroyo ha US! Tumindog para ha demokrasya! Tumindog para ha pagtatalwas han nasud tikang ha kulo han mga dayuhan! Tumindog para ha katawhan!

An mga araba han mga igkasi niyo batan-on nga opisyal ngan ordinaryo nga sundalo durot han sobra nga kadunotan han papet nga estado ngan han nasasakban nira nga mersenaryo nga hukbo in nagduduso ha ira nga mag-alsa hadton Hulyo 27. Pero an daradara nira nga adyenda in kulang hin gin-uunod, diri maupay an ira pamaagi, waray hira hugot nga sumpay ha demokratiko nga kagiusan masa ngan suporta tikang ha hiluag nga katawhan. Mas maraut, an mas lumandaw pa amo an gios ngan adyenda han dagko nga pulitiko nga sumpay nira nga karuyag la sumaliwan ha nakalingkod nga rehimen.

Dagmit nga napirdi an pag-aalsa. Pero an usa nga maupay nga butang nga iginbunga hini amo an nakakatigda nga pagbubulgar ngan pagkokondenar nira ha nasalupsop nga kurapsyon ha reaksyunaryo nga gubyerno ngan AFP-PNP, grabi nga demoralisasyon ha ranggo han mga opisyal ngan sundalo, ngan an paglalarang han Malakanyang ngan AFP han terorismo ngan pambobomba ha Mindanao para makayer an suporta militar ngan interbensyon militar han US. Waray la hini abrihi an mata han katawhan ha mga kadunotan ha sakob han militar, gintagan liwat kamo hini yana hin inspirasyon ngan kaisog nga magyakan ngan umato. Padayon hini nga ginbabay-og an AFP, PNP, gubyerno, naghahadi nga sistema ngan an mga reaksyunaryo nga naghahadi nga klase.

Nagdadamo na liwat tikang ha ranggo niyo an nagbabangon na. Diri pa la maiha, duha nga platun han CAFGU ngan an ira mga handler ha AFP ha Agusan del Sur an uropod nga dinaup ha NPA. Diri na nira matulon an pan-aabuso ha ira mga opisyal ngan an pan-aabuso ha katawhan nga ginpapahimo ha ira. Ginsagdonan ngan ginbuligan pa hira han katawhan ha lugar. Ginsaurog han katawhan didto ini nga panhitabo ngan gindayaw an mga CAFGU ngan sundalo nga binalhin ha gapil han NPA.

Napapanahon na para kamo tumindog ngan gumios para ha mga lehitimo nga interes niyo ngan han katawhan. Poyde kamo nga:

Magbug-os hin mga sikreto nga grupo agud talakayon an iyo mga problema ngan araba, an gamot hini ngan an sumpayan hini ha mga problema han katawhan ngan han bug-os nga nasud.

Magbug-os hin mga ligal nga asosasyon han mga ordinaryo nga sundalo, mag-insister han katungod ha pagbubug-os hini ngan aghaton liwat an pag-oorganisa han iyo mga kapamilya para ha komun niyo nga mga interes. Magpagawas hin mga abri nga surat ngan pahayag ngan magyakan ha mga butad nga porum. Gamiton an iba-iba pa nga butad nga demokratiko nga aragian han iyo pakikig-away para ha iyo mga interes.

Magpahilarum hin pag-iimbestiga ngan pag-aaram ha kamutangan han AFP ngan bug-os nga organisasyon militar, han gubyerno ngan han aton nasud ngan ipasaro ini ngatanan ha mga masmidya ngan ha nasud.

Magpadamo ngan magdistribwer han mga progresibo nga barasahon ngan maghimo hin mga pag-aaram ngan talakayan hiunong ha gin-uunod hini ngatanan. Ginpoproponer namon nga hugot niyo nga analisaron ngan pag-adman an nasudnon demokratiko nga rebolusyonaryo nga programa han National Democratic Front of the Philippines.

Supakon an mga iligal ngan anti-katawhan nga mandasyon han iyo mga nakakataas nga opisyal kaupod an mga operasyon nga panhahalikwat ha mga komunidad han mga parag-uma, iligal nga pan-aaresto, pagtortyur, pagpapauran han mga bomba o bala ha mga sibilyan ngan iba pa nga kasugoanan nga nakakahibang ha katawhan ngan natalapas ha ira mga demokratiko nga katungod. Maungod nga ibuksas ngan atuhan an anuman nga sugad hini nga ginhihimo han iyo mga lider.

Tubtob nga nakada pa kamo ha AFP ngan kaupod ha mga operasyon kontra ha mga katawhan ngan mga rebolusyonaryo nga pwersa, dako an posibilidad nga ikakatapo kamo ha mga armado nga banatay ha NPA. Ha sugad nga mga sitwasyon, gin-aaghat namon nga talinguhaon niyo nga makaghimo hin mga pamaagi para likyan nga magkabanatay. Kung magkamay-ada man, ginaaghat namon kamo nga gilayon nga mangaro hin ukoy-bubto ngan isurender an iyo mga armas ha NPA. Diri katugbang han iyo kinabuhi an depensahan an usa nga dunot nga organisasyon ngan usa nga dunot nga sistema. Hinumdomi niyo an iyo mga pamilya. Ha gapil han NPA, kilal-on an iyo mga katungod ngan maupay nga trataron subay ha mga internasyunal nga makatawo nga balaud ngan mga pagsurundon ha gerra.

Samtang nakada ha sakob han reaksyunaryo nga militar, sikreto nga makikigsumpay ngan gumios para ha rebolusyonaryo nga kagiusan. Poyde kamo nga magpagawas hin mga armas ngan iba pa nga kagamitan nga pan-gerra, magpaabot ha NPA han mga ginkikinahanglan nga impormasyon ha gios han militar o maghatag hin iba pa nga bulig ha mga rebolusyonaryo nga pwersa.

Sumumpay ngan makig-urosa ha butad nga demokratiko nga kagiusan masa. Isumpay an iyo lehitimo nga mga araba ha lehitimo liwat nga araba han iba-iba nga demokratiko nga sektor ngan han hiluag nga masa han katawhan. Mas epektibo niyo nga maipakigaway an iyo mga interes kung nakasumpay ngan nakatimpo ini ha pakikig-away han iba-iba nga demokratiko nga sektor ngan han nakadadamo nga katawhan, labina nga an mga iginpakig-away nira nakada liwat ha batakan nga interes niyo ngan han iyo pamilya ngan mga kaupod ha klase.

Tumimpo ha rebolusyonaryo nga kagiusan. An iyo mga problema komo mga batan-on nga opisyal ngan ordinaryo nga sundalo, ha katapus-tapusan nakasumpay ha mga problema han katawhan Pilipino ngan mapagdesisyon nga masusulbar la pinaagi han rebolusyonaryo nga pakigbisog. Umapi ha NPA o di man ha Milisya han Katawhan o mga rebolusyonaryo nga organisasyon masa ha kabaryohan o kasyudaran. Kung diri naman kakayanon an hain man hini, bumaya na ha pagserbisyo ha reaksyunaryo nga militar ngan magin ordinaryo nga sibilyan na la. Mas maupay pa gihapon ini kaysa magpapadayon ha pagseserbi ha dunot nga papet ngan reaksyunaryo nga militar.

Naglalaum kami nga batonon niyo ini nga mga panawagan namon.

Ha hul-os nga pagrespeto ha iyo, ha ngaran
han rebolusyonaryo nga katawhan Pilipino,

Gregorio �Ka Roger� Rosal
Tagapagyakan, Partido Komunista han Pilipinas
1 Setyembre 2003

Download Statement in PDF