Maglunsad og dagkong mga demonstrasyon, hinanaling tapuson ang rehimeng US-Arroyo

Gregorio "Ka Roger" Rosal
Spokesperson
Communist Party of the Philippines
Setyembre 02, 2003

Labaw karong nagsusapinday ang gobyernong Arroyo sa hilabihang kabug-at sa nabutyag nga mga kaso sa dinagkong korapsyon nga gikalambigitan sa magtiayong Arroyo. Taliwala sa kongkretong pagbutyag sa katuohan ug solidong mga ebidensya sa dinagko ug sistematikong pagpanglungkab ug money-laundering (pagtakuban sa iligal nga gigikanan sa kwarta) sa mga Arroyo, angay lamang nga palagputon na kini sa Malakanyang.

Kinahanglang magtigum og pwersa ang ligal nga demokratikong kalihukan ug katawhan ug i-andam ang pagpalagpot sa rehimeng Arroyo. Alang niini, mahimo nilang hinanali nga pangunahan ang usa ka prosesong impeachment sama sa dihang nabutyag ang dinagkong pagpanglungkab ni Estrada niadtong 2000.

Mahimo usab nga ihingusog sa ligal nga demokratikong kalihukan ug katawhan ang usa ka impartial inquiry (walay pihig-pihig nga imbestigasyon) sa mga kaso sa korapsyon nga gikalambigitan sa mga Arroyo, lakip na si Ignacio Arroyo, nga lutaw kaayong gitakpan ang iyang igsoon ug bayaw'ng babaye. Apan kinahanglanon us� nga morisayn si Gloria o kaha mapalagpot siya isip presidente aron mahimong tinuod nga impartial ang maong imbestigasyon.

Kung tugkaron, ang mga kaso sa korapsyon nga gibutyag ni Sen. Panfilo Lacson, sa midya ug uban pang sektor maoy dugang lamang sa nagkataas nga talaan sa mga hinungdan kung nganong angay'ng lumpagon gilayon sa katawhan ang rehimeng Arroyo. Sama sa nauna na namong gihikyad, adunay dili mokubos sa napulo ka hinungdan kung nganong kinahanglang molihok gilayon ang katawhan aron tapuson na kining rehimena.

Kalambigit niini, pakusgon sa Bagong Hukbong Bayan ang mga taktikal nga opensiba aron laparoho'g maayo ang rehimeng Arroyo, silotan kini sa hilabihang pagka-itoy, militarismo ug korapsyon, labaw'ng pahuyangon aron mapadali ang pagpahugno niini, ingon usab aron makakuha og mga armas.

Kinahanglang tukoron ang lapad nga nagkahiusang prente sa tanang mga pwersang anti-Arroyo ug anti-korapsyon nga magkoordina sa dagkong mga demonstrasyon nga mamahimong subling mosangpot sa higanting pag-alsa sama kadtong nagpalumpag kanila Marcos ug Estrada. Kinahanglan nga moplastar sa uyokan niini ang mga militanteng pwersang patriyotiko ug demokratiko aron ihingusog ang signipikanteng mga pagbag-o ug hugpongon ang pinakalapad nga posibleng pwersa.

Isip konstitusyonal nga mopulihay, mahimong hinanali nga mobarog isip presidente si Vice President Teofisto Guingona ug pangulohan ang usa ka caretaker government aron matul-id gilayon ang mga kasal-anan ni Arroyo ug ipadayon ang mosunod nga eleksyon. Kung wala si Arroyo, mas kasaligang makahimo ang caretaker government og usa ka impartial inquiry sa mga kaso sa dinagkong korapsyon kaysa kung magpabiling presidente ang imbestigahan.

Isip presidente, mamahimong i-asdang ni Guingona ang gihuptan niyang patriyotismo ug molihok aron mabasura ang Mutual Logistics Support Agreement, mawagtang ang Visiting Forces Agreement, matapos na ang Balikatan "exercises", mabakwi ang sikreto nga kasabutan nga naghatag og immunity (libre o dili dubtan) sa pagbista sa International Criminal Court sa mga tropang Amerikano, mahunong ang planong pag-usab sa konstitusyon alang sa interes sa US ug mahunong na ang nagkadakong armadong interbensyon sa US dinhi sa Pilipinas.

Gilaoman usab namo nga tapuson ni Guingona ang teroristang all-out war ni Arroyo nga nagdulot na og dako kaayong kadaot sa kinabuhi sa katawhan sa kabanikanhan. Mahimo usab niyang imando ang usa ka independent o joint investigation sa mga kaso sa nagkasamot nga paglapas sa tawhanong katungod bunga sa teroristang larga-tudong gubat ni Arroyo.

Nagsalig kami nga kung makalingkod si Guingona, mabag-o ang negatibong pakig-atubang ni Arroyo sa panaghisgot-kalinaw ug mapundar ang mga kondisyon nga labaw'ng paborable alang sa subling pagsugod ug sa ngadto-ngadto kalamposan diha sa panaghisgot-kalinaw tali sa NDFP ug GRP, ingon usab tali sa GRP ug MILF. ###

Download MP3 of Statement in Pilipino

Back to top