Patalsikon hi Gloria Macapagal-Arroyo

Gregorio "Ka Roger" Rosal
Spokesperson
Communist Party of the Philippines
Agosto 28, 2003

Hul-os an kurapsyon, pagkapapet ngan pagkamilitarista ngan pagkakurap han rehimen Arroyo. Mayda di mamenos ha 10 hinungdan kun kay ano nga kinahanglan nga gumios an katawhan Pilipino para rumkon na an rehimen Arroyo:

1. an direkta nga pagkakadabi han mag-asawa nga Arroyo ha dinagko nga kurapsyon, ngan an hiluagan nga kurapsyon han ira mga tawohan pareho ha militar ngan burukrasya sibil
2. an pagpirma ha Mutual Logistics Support Agreement nga naghahatag hin katungod ha militar han US nga gamiton an bug-os nga nasud komo usa nga dako nga base militar
3. an pagtutugot ha mga Balikatan "war exercises" para tagan-duon an tikagrabi nga interbensyon militar han US ha Pilipinas
4. an pagbabasura ha erestorya pankamurayawan ngan paglalarang hin terorista nga pambobomba ha Davao ngan iba pa nga dapit han Pilipinas para kayeron an interbensyon militar han US
5. an buta nga pagsuporta ha gerra nga agresyon han US kontra ha Iraq nga talapas ha mga internasyunal nga pagsurundon ha sibilisado nga relasyon han mga talwas nga nasud
6. an paglalansar hin makusog nga gerra nga terorista nga nagreresulta ha hiluagan nga militarisasyon ngan mga pagtalapas ha katungod pantawo ha kabaryohan, labina ha Mindoro, Aurora, Nueva Ecija, Cagayan Valley, Compostela Valley ngan iba pa nga lugar
7. an padayon nga pagpapatuman han mga palisiya nga liberalisasyon han ekonomiya nga dikta han IMF-WB-WTO ngan pagruruba ha mga pwersa ha produksyon han nasud ngan pakabuhian han masa nga anak-ha-balhas
8. an paghahatag-dalan ngan pag-endorso ha hiluagan nga panlulupot hin tuna sugad han panlulupot hin tuna ni Eduardo "Danding" Cojuangco para ha iya hiluagan nga plantasyon han bilanghoy
9. an pagdiri nga iisa an suhol han mga trabahador ngan mga empleyado han pangkagamhanan
10. an waray-ukoy nga paghitaas han presyo han lana, sukot ha tubig, sukot ha kuryente ubp. Ngan kapakyasan nga pugngan ini

Ha kagrabihon han pagkakahimulag ni Arroyo ha katawhan ngan kabangis han krisis nga himo han mga makadayuhan, militarista ngan dunot nga palisiya nga gawi hini, labaw yana nga dumako an posibilidad nga mapapatalsik hi Arroyo pinaagi han paggios ngan pag-aalsa han milyon-milyon nga katawhan sugad han ginhimo nga pagpapatalsik kan Estrada hadton 2001 ngan kan Marcos hadton 1986.

Bisan an mga reaksyunaryo nga oposisyon nanawagan na liwat han pagreresayn ni Arroyo ngan sumusuporta ha mga paggios ha kalsada han katawhan para ha iya pagpapatalsik. Sugad man, ha ranggo han sundalo han gubyerno nagkukusog an mga araba kontra ha papet, mapanmuypoy ngan dunot nga pamunuan han militar ngan gubyerno. Gin-aaghat namon hira nga dumaop ngan sumuporta ha demokratiko nga kagiusan masa ngan makipagkoordinar ha paggios agud pabagsakon an rehimen Arroyo.

Kasumpay hini, padayon nga pakukusgon han Bagong Hukbong Bayan an paglalansar hin mga armado nga taktikal nga opensiba kontra ha AFP ngan mga armado nga grupo han estado subay ha panawagan han partido nga dugang nga isulong an armado nga rebolusyon ha bug-os nga nasud ngan durotan hin grabi nga banat an rehimen Arroyo. ###

Back to top