Adunay mga lehitimo nga mulo ang mga ubos nga opisyales ug yanong sundalo sa AFP

Gregorio "Ka Roger" Rosal
Spokesperson
Communist Party of the Philippines
Hulyo 20, 2003

Nagsimpatiya ang rebolusyonaryong kalihukan sa gipahayag karong bag-o nga mga mulo sa mga ubos nga mga opisyales sa AFP batok sa mga anomalyang palakat sa kadagkoang opisyales militar ilabina ni Gen. Angelo Reyes. Sa kamatuoran, daghan kaayo ang mga yanong sundalo ug kapulisan ang miduol sa rebolusyonaryong kalihukan aron mangayo og tambag kun unsaon nila panalipdan ang ilang mga katungod ug kabulahanan.

Ang ingon niining mga mulo pamatuod lamang kun unsa kadunot, kakorap, dili demokratiko ug anti-katawhan ang organisasyon sa AFP. Sa pungkay sa establisimentong militar, naglingkod ang mga heneral sa AFP ug pangulo sa Department of National Defense. Gawas pa sa nagpakatagbaw sa dako kaayo nga sweldo, sa mga luho ug espesyal nga pribilehiyo sama sa mga mansyon, naghakop kini og dako kaayong bahandi gikan sa pagpangurakot og mga pundo alang sa mga yanong sundalo ug uban pang pundo sa iya-iyahay�ng mga yunit, pundo alang sa disaster relief, kikbak gikan sa mga kontrata sa pagpalit og mga kahimanan, kita gikan sa mga kriminal nga sindikato sama sa druga, kidnapping for ransom, hold-ap sa bangko, ug daghan pang ubang kriminal nga aktibidad.

Ang AFP usa ka mersenaryong organisasyon nga nagsilbing nag-unang instrumentong panagmal sa pasistang estado nga nagpanalipod sa usa ka dunot nga katilingbanong sistema alang sa kaayohan sa mga reaksyonaryong nagharing hut-ong. Naghakop ang AFP og dako kaayong kahinguhaan nga gihikaw sa kabulahanan ug uban pang batakang panginahanglan sa katawhan. Bug-at nga palas-anon kini sa katawhang Pilipino samtang nanglupig lamang kini kanila. Gibansay, gipundohan ug gi-armasan kini sa imperyalismong US aron ipasiugda ug amumahon ang interes niini ug sa mga gaway niini sulod sa nasud.

Panagsa lamang ang mga heneral nga wala magpuyo sa dagkong mga mansyon ug walay nindot ug mahal nga mga sakyanan. Kadaghanan usab kanila miabot sa ingon nianang kataas nga ranggo pinaagi sa mga hiphip ug suborno. Nasayran kaayo sa kadaghanan kun pila ka milyong piso ang gipanaborno sa mga opisyal sa AFP alang sa matag star nga gitaplak sa ilang mga abaga. Sama sa mga politiko nga burukrata, bawi�n sa mga kadagkoang militar kini pinaagi sa dagkong sweldo, pribilehiyo ug korapsyon.

Walay bisan diyut nga kahingawa ang pinakadagkong opisyales sa AFP ug DND sa ilang mga batan-ong opisyales ug yanong kasundalohan. Ang gipadayag nga mga reklamo sa mga batan-ong opisyales karong bag-o, walay kalainan sa gipadayag niadtong dekada 1980 sa mga nauna kanila ug sa gigikanan nga Reform the Armed Forces Movement (o RAM) ug sa Young Officers Union (YOU). Daghan sa mga nangulo niini nahimong dunot na usab nga mga pangulo sa militar ug burukrasya ug mitalikod sa interes sa mga ubos nga opisyales ug yanong kasundalohan.

Niadtong miaging bulan, nagpagula usab og manipesto ang Concerned Army Officers in Sulu nga nag-unod sa hapit parehong mga mulo sa linibo-libong mga sundalo nga nasugamak sa natad sa armadong panagsangka.

Ang kahimtang sa mga batan-ong opisyales ug ordinaryong kasundalohan sa AFP ubos kaayo itandi sa mga butirik nga tag-as nga mga pangulo nila. Labaw pa gihapong linupigan ug sinalikway sa reaksyonaryong gobyerno ang labaw�ng dakong ihap sa mga yanong kawani sa gobyerno, lakip na ang gatusan ka libong ordinaryong titser, nars, clerk, utility personnel (sulugoon) ug uban pa. Kun tapoon ang badyet sa DND, AFP, PNP, nagkalain-laing mga ahensyang pang-intelligence ug mga nakatago nga badyet sa intelligence sa nagkalain-laing opisina sa gobyerno, naghingapin na ang prayoridad ug pundo nga gitagana sa militar itandi sa mga katilingbanong kabulahanan, ilabina sa panglawas. Apan nagpakatagbaw lamang ang mga kadagkoang opisyales sa DND ug AFP sa dakong badyet militar.

Sa sulod sa organisasyong militar, ang labaw�ng nagtagamtam og pagpanglupig mao ang mga ordinaryong sundalo nga gigamit sa mga opisyales sa DND ug AFP isip pangbala og kanyon sa ilang mga kampanyang pagpanumpo sa kabanikanhan ug kasyudaran. Gisalikway sa ilang nga pangulo ang kabulahanan sa ilang mga sundalo ug gihikaw kanila ang ilang pagkatawo aron buhian ug iduso ang ilang kabangis batok sa katawhan ug rebolusyonaryong kalihukan. Walay pugong-pugong nga gigamit sila aron gub-on ang mga panimalay, pangawatan og mga binuhing hayop, daoton ang mga pananom, patyon ug tortyuron ang mga inosente ug yatakan ang mga tawhanong katungod sa yanong katawhan. Gihimo silang robot sa walay kukalolooy nga pagpanagmal ngadto sa masa ug pagtortyur sa mga gikatahapang membro o tigsuportar sa rebolusyonaryong kalihukan.

Kanunay usab silang binut� nga gibahog sa mga panagsangka. Taliwala sa sigurong

kapildihan kun naatubang sa mas superyor nga pwersa ug kapasidad sa Bagong Hukbong Bayan ug Moro Islamic Liberation Front, pinugsanay silang paatrakahon bisan pa nga ikamatay kini sa dakong ihap sa mga sundalo. Ingon niini ang nahitabo sa mga miaging panagsangka sa Compostela Valley, sa Samar, sa Bataan, sa Mountain Province.

Dili bugti sa ilang kinabuhi ang diniyot nga sweldo nga gidawat nila. Labaw�ng walay bili nga mamatay sila baylo sa pagpalipod sa sistema nga nanglupig ug nagpahimulos sa mga mamumuo ug mag-uuma, nga mao ang mga hut-ong nga ilang kasagarang gigikanan.

Ang malupigon ug binangis nga pagtratar sa kaugalingong mga ginsakpan, ilabina sa mga yanong kasundalohan ug mga pwersang girekrut diha sa mga pwersang paramilitari sama sa CAFGU, gikonsidera sa rebolusyonaryong kalihukan. Busa nanawagan kanila ang rebolusyonaryong kalihukan nga ayaw na pagpagamit sa ilang kurakot nga mga opisyales, sa pasistang estado ug sa reaksyonaryong nagharing hut-ong nga nagpahimulos, nanglupig ug nanglimbong usab kanila. Walay lain nga angay nilang himuon kundili ang pagbalibad nga ipusta ang ilang kinabuhi alang lamang sa kabulahanan sa mga reaksyonaryong nagharing hut-ong ug sa kurakot ug pasistang mga pangulo nila. Angay na usab nilang balibaran nga suklan ang sama nilang mga kabus ug linupigan nga mga igsoon nilang Pilipino, nga naghupot lamang og armas aron epektibong mapakigbatokan ang mga lehitimong kabulahanan nila ug sa katawhan.

Ang hingpit nga pagkadunot ug pagka-inutil sa AFP hikit-an sa sunud-sunod nga pagpapildi sa nagkalain-laing yunit sa AFP diha sa mga panagsangka sa BHB ug uban pang rebolusyonaryong pwersa. Busa sa ingon, ang gipangdiskitahan ug gipangbalosan nila mao ang dili armadong yanong katawhan.

Labaw pang nadunot ang AFP samtang nagkasamot ang krisis sa nagharing sistema ug nagkakusog ang rebolusyonaryong kalihukan. Angay lamang nga ipakaylap sa mga batan-ong opisyales ug yanong kasundalohan niini ang mga kadunoton sulod sa DND ug AFP.

Gawas pa sa pagpasiugda sa ilang interes batok sa pagpanglupig sa mga heneral, gidani namo sila nga ipasiugda ang patriyotiko ug demokratikong tinguha sa katawhang Pilipino. Gidani namo sila nga hingpit nga talikdan ang reaksyonaryo, dunot ug maparuton nga dalan sa AFP, ipasiugda ang tradisyon ni Lt. Crispin Tagamolila, moanib ug mosuporta sa rebolusyonaryong kalihukan nga nag-alagad sa katawhan ug nagsubay sa dalan sa pagpalingkawas sa katawhan.

Back to top