Mayda mga lehitimo nga araba an mga nakakaubos nga opisyal ngan ordinaryo nga sundalo han AFP

Gregorio "Ka Roger" Rosal
Spokesperson
Communist Party of the Philippines
Hulyo 20, 2003

Nagsisimpatiya an rebolusyonaryo nga kagiusan ha iginpahayag diri pa la maiha nga mga araba han mga nakakaubos nga opisyal han AFP kontra ha mga dunot nga gawi ha militar han hitaas nga opisyal hini labina ni Gen. Angelo Reyes. Kamatuoran, gidadamoi nga mga ordinaryo nga sundalo ngan pulis an dinaup ha rebolusyonaryo nga kagiusan agud mangaro hin sagdon kung tiunan-o nira madedepensahan an ira mga katungod ngan interes.

An sugad hini nga mga reklamo in pamatuod la kung ano kadunot, kurap, di demokratiko ngan anti-katawhan an organisasyon han AFP. Ha pungkay han establisemyento militar, nakalingkod an mga heneral han AFP ngan pinuno han Department of National Defense. Labot pa ha nagpapatakas ha gidadakoi nga sweldo, ha mga luho ngan espisyal nga pribilehiyo sugad han mga mansion, naghahakin ini hira hin gidadakoi nga karikuhan tikang ha pangungurakot han mga pundo para ha mga ordinaryo nga sundalo ngan iba pa nga pundo han kada nira nga yunit, pundo para ha mga disaster relief, kickback tikang ha mga kontrata ha pagpalit hin mga kagamitan, kita tikang ha mga kriminal nga sindikato sugad han druga, kidnapping for ransom, hold up ha bangko, ngan damo pa nga iba nga kriminal nga aktibidad.

An AFP in usa nga mersenaryo nga organisasyon nga nagseserbi nga prinsipal nga instrumento nga pamwersa han pasista nga estado nga nagdedepensa ha usa nga dunot nga sistema pankatilingban ha interes han mga reaksyunaryo nga naghahadi nga klase. Nakaon an AFP hin gidadakoi nga rekurso nga naghihikaw ha kaupayan ngan iba pa nga batakan nga panginginahanglan han katawhan. Bug-at ini nga surugbungon han katawhan Pilipino samtang nananalumpigos la ini ha ira. Ginpapahiara, ginpupundohan ngan gin-aarmasan ini han imperyalismo nga US agud ig-undong ngan atamanon an interes hini ngan han mga kaway hini ha sakob han nasud.

Urusahon an mga heneral nga waray mag-ukoy ha dagko nga mansion ngan waray maghusay ngan marahalon nga sarakyan. Kadam-an naman liwat ha ira in umabot ha sugad kahitaas nga ranggo pinaagi han mga suborno ngan padalunot. Maaram kaupay an kadam-an kung pira kamilyon kapisos an ginsusuborno han mga opisyal han AFP para ha kada estrelya nga ginkakaw-it ha ira sugbong. Sugad han mga pulitiko nga burukrata, ginbabawi ini han mga pinuno militar pinaagi han dagko nga sweldo, pribilehiyo ngan kurapsyon.

Waray bisan guti nga pagpakasakit an pinakahitaas nga opisyal han AFP ngan DND ha ira namamanghod nga opisyal ngan ordinaryo nga sundalo. An iginpahayag nga mga reklamo han mga namamanghod nga opisyal hiton diri pa la maiha in waray kaibahan ha iginpahayag hadton dekada 1980 han mga nauna ha ira ngan gintitikangan han Reform the Armed Forces Movement (o RAM) ngan han Young Officers Union (YOU). Damo ha mga namuno hini in nagin dunot na gihapon nga pinuno ha militar ngan burukrasya ngan tumalikod ha interes han mga nakakaubos nga opisyal ngan ordinaryo nga sundalo.

Hadton naglabay nga bulan nagawas liwat hin manipesto an Concerned Army Officers in Sulu nga nag-uunod hin haros pareho nga araba han yukot-yukot nga sundalo nga naluludlod ha nataran han armado nga away.

An kamutangan han mga namamanghod nga opisyal ngan ordinaryo nga sundalo han AFP hirayo nga ubos kumpara ha mga bundat nga nakakataas nga pinuno nira. Labaw pa liwat nga tinalumpigos ngan abandonado han reaksyunaryo nga gubyerno an labaw nga mas damo nga ihap han mga ordinaryo nga kawani han pangkagamhanan kaupod na an gatos-gatos kayukot nga ordinaryo nga magturutdo, nars, clerk, utility personnel ngan iba ba. Kung pagtimpohon an badyet han DND, AFP, PNP, iba-iba nga ahensya pang-intelligence ngan mga nakatago nga badyet pang-intelligence ha iba-iba nga opisina han gubyerno, ura-ura na an prayoridad ngan pundo nga nakaalutaga ha militar kumpara ha mga kaupayan nga pankatilingban, labina ha panlawas. Pero an dako nga badyet militar in ginpapatakasan la han mga higtaas nga opisyal han DND ngan AFP.

Sakob han organisasyon militar, an labaw nga nahiaagum han pananalumpigos amo an mga ordinaryo nga sundalo nga asya an ginagamit han mga opisyal han DND ngan AFP nga pambala ha kanyon ha ira mga kampanya han pamumuypoy ha kabaryohan ngan kasyudaran. Gin-aabandona han ira mga pinuno an kaupayan han ira mga sundalo ngan ginkawatan hira han ira pagkatawo agud buhian ngan iduso an ira kabangisan kontra ha katawhan ngan rebolusyonaryo nga kagiusan. Waray alang nga ginagamit hira agud wakayon an mga panmamalay, kawatan hin mga tinubongan nga hayop, ngan hibangon an mga tanom, patayon nga pakurian an mga inosente ngan tamakan an mga katungod pantawo han ordinaryo nga katawhan. Ginhihimo hira nga robot ha waray kaluoy nga pandarahug ha masa ngan pagtortyur ha mga ginsususpetsahan nga kaupod o nagsusuporta ha rebolusyonaryo nga kagiusan.

Agsob liwat hira nga ginpapaatake nga buta ha mga away. Atubangan han piho nga pagkakapirdi kung naaatubang ha mas superyor nga pwersa ngan kapasidad han Bagong Hukbong Bayan ngan Moro Islamic Liberation Front, pwersahan hira nga ginpapaatake bisan pa nga ikakamatay ini han damo nga ihap han mga sundalo. Sugad hini an nahitabo ha mga naglabay nga away ha Compostela Valley, ha Samar, ha Bataan, ngan ha Mountain Province.

Diri katugbang han ira kinabuhi an gigugutii nga suhol nga ginkakarawat nira. Labaw nga waray balor nga mamatay hira nga kabalyo han pagdedepensa ha sistema nga nanalumpigos ngan naniniyupi ha mga trabahador ngan parag-uma, nga klase nga kaurog gintitikangan liwat nira.

An matalumpiguson ngan madarahug nga pagtratar ha kalugaringon nira nga mga tawohan labina ha mga ordinaryo nga sundalo ngan mga pwersahan nga narerekluta ha mga pwersa nga paramilitar sugad han CAFGU, in ginkokonsiderar han rebolusyonaryo nga kagiusan. Sanglit nananawagan ha ira an rebolusyonaryo nga kagiusan nga diri na magpagamit ha ira dunot nga mga opisyal, ha pasista nga estado ngan ha reaksyunaryo nga naghahadi nga klase nga naniniyupi, nanalumpigos ngan nangunguwat gihapon ha ira. Waray iba nga dapat nira himuon kundi an dumiri nga ipanhuygo la an ira kinabuhi para ha interes han mga reaksyunaryo nga naghahadi nga klase ngan han dunot ngan pasista nga pinuno nira. Dapat na liwat hira nga dumiri nga kontrahon an igkasi nira mga nagkuri ngan tinalumpigos, mga bugto nira nga Pilipino, nga asya la nga kumatin hin armas para epektibo nga maipakig-away an mga lehitimo nga interes nira ngan han katawhan.

An hul-os nga pagkadunot ngan pagkainutil han AFP iginpapakita han sunod-sunod nga pagkapirdi han iba-iba nga yunit han AFP ha mga agway ha BHB ngan iba pa nga rebolusyonaryo nga pwersa. Lugod, an gin-iinitan ngan pinanbubulsan nira amo an di armado nga ordinaryo nga molupyo.

Labaw pa nga nadudunot an AFP samtang naggrabi an krisis han naghahadi nga sistema ngan nagkukusog an rebolusyonaryo nga kagiusan. Naangay la nga ginbuyagyag han mga namamanghod nga opisyal ngan ordinaryo nga sundalo hini an mga kadunotan sakob han DND ngan AFP.

Gawas ha pag-uundong han ira interes kontra ha pananalumpigos han mga heneral, gin-aaghat namon hira nga ig-undong an patriyotiko ngan demokratiko nga hingandoy han katawhan Pilipino. Gin-aaghat namon hira nga hul-os nga talikdan an reaksyunaryo, dunot ngan tikapirdi nga dalan han AFP, ig-undong an tradisyon ni Lt. Crispin Tagamolila, ngan umapi ngan sumuporta ha rebolusyonaryo nga kagiusan nga nagseserbi ha nasud ngan nagsusulsog ha dalan han pagpapatalwas han katawhan.###

Back to top