Kondenahon ang 19th IB sa mass torture ug masaker sa mga sibilyan ug hors de combat sa Kananga, Leyte

Gregorio "Ka Roger" Rosal
Spokesperson
Communist Party of the Philippines
Mayo 06, 2003

Pinasikad sa nadawat nako nga taho, dili engkwentro kun dili mass torture ug masaker sa siyam nga mga sibilyan ug hors de combat ang nahitabo sa San Isidro, Kananga, Leyte niadtong Abril 16, 2003.

Hugot nga gikondena sa Partido Komunista sa Pilipinas ang Kananga mass torture ug massacre sa kamot sa mga tropa sa 19th IBPA sa sugo ni Lt. Col Oscar Lactao, ang Palparan sa Leyte.

Sigon sa taho sa Fact Finding Mission Team nga miadto didto, dul-it sa ulo ang pagpusil sa kadaghanan sa mga biktima sa masaker nga nagbuak sa ilang bagul-bagol. Sa wala pa sila patya, nahitabo ang usa ka mass torture kun diin gipaso sa kalayo ang kamot sa usa, gibubuan og nagbukal nga tubig ang ilang mga kamot, tiil, lawas ug nawong, ug gikulata ug gipanagbunalan sa gahi nga butang.

Lakip sa mga biktima sa Kananga Mass Torture ug Massacre ang lider mag-uuma nga si Eugenio Tazan, 54 anyos ang edad, sa San Isidro Small Farmers Association (SISFA) ug ang tulo ka bulan nga mabdos nga si Rowena Superior, 24 anyos ang panuigon ug sakop sa Bagalungon Small Farmers Association (BASFA). Biktima usab ang mga menor de edad nga molupyo sa Kananga nga sila Randy Potoy, 15; Rey Corpin, 13; Benjie Cabugoy, 17; ug Obet Quidlat.

Kinahanglan mahatagan og hingpit nga atensyon sa publiko ang Kananga mass torture ug massacre. Gikinahanglan kaayong suportahan natong tanan ang pagbutyag niini sa mga aktibista.

Gihagit nako ang mga tawo-sa-simbahan, mga estudyante, magtutudlo, mga tawo-sa-midya, mga pulitiko ug uban pa nga makighiusa ug tabangan ang katawhan sa Kananga sa ilang pangandoy nga makab-ot ang katarungan sa hilabihan ka ngilngig nga pagyatak sa ilang mga katungod ug sa ilang mga paryente ug katagibaryo nilang gitortyur ug gimasaker.

Gihagit nako si Senador Francis Pangilinan, puno sa human rights committee sa senado nga imbestigahon ang Kananga mass torture ug massacre sama sa gihimong pag-imbestiga sa iyang komite sa kaso sa pagpatay kang Eden Marcellana ug Eddie Gumanoy sa Mindoro.

Gipakita niini nga kaso nga ang militarisasyon ug walay-kaluoy nga pangabuso sa militar sa katawhan sa kabaryohan nahitabo dili lang sa Mindoro, kun dili sa tanang bahin sa nasud. Kini nga 19th IB nga maoy nagbuhat sa Kananga mass torture ug massacre mao gihapon ang nagbuhat sa pagmasaker sa pamilyang Nuguit niadtong Enero 29, 1999 sa Sityo Mogus, Barangay Capacujan, Palapag, Northern Samar.

Desperado kaayo ang mga pasistang tropa sa AFP ug PNP sa kapakyasan nilang lupigon ang Bagong Hukbong Bayan. Sa ilang kabuang, giduon nila ang ilang kabangis sa walay ikasukol nga mga sibilyan, giyatakan ang ilang tawhanong katungod ug gisupak ang tanang probisyon sa mga pangkalibutan nga balaudnon sa gubat.

Sa likod sa grabeng militarisasyon sa kabaryohan ug mga paglapas sa tawhanong katungod, padayon nga misulong ang rebolusyonaryong armadong pakigbisog sa tibuok nasud. Ang labaw nga pagkusog sa Bagong Hukbong Bayan naghatag dinhi og dugang kakayahan nga tubagon ang singgit sa katawhan alang sa katarungan ug silotan ang mga lunod-patay nga pasistang militar para sa ilang mga utang nga dugo sa katawhan. ###

Back to top