Kondenaren ti 19th IB iti mass torture ken masaker dagiti sibilyan ken hors de combat iti Kananga, Leyte

Gregorio "Ka Roger" Rosal
Spokesperson
Communist Party of the Philippines
Mayo 06, 2003

Segun iti naawat ko nga ulat, saan nga engkwentro no di ket mass torture ken masaker ti siyam a sibilyan ken hors de combat ti napasamak iti San Isidro, Kananga, Leyte idi Abril 16, 2003.

Nadagsen a konkondenaren ti Partido Komunista ti Pilipinas ti Kananga mass torture and massacre iti ima dagiti tropa ti 19th IBPA iti mandar ni Lt. Col. Oscar Lactao, ti Palparan ti Leyte.

Segun iti ulat ti Fact Finding Mission Team a nagturong sadiay, kaaduan kadagiti biktima ti masaker ket asitgan a napaltugan iti ulo a nangrumek iti ulo da. Sakbay a napapatay, napasamak ti maysa a mass torture no sadinno a pinuoran da ti ima ti maysa, nabukbukan ti agburburek a danum dagiti ima, saka, bagi ken rupa da, ken binugbog ken minalmalo da ida ti maysa a nadagsen a banag.

Maibilang kadagiti biktima ti Kananga Mass Torture and Massacre ti lider mannalon a ni Eugenio Tazan, 54 tawen, ti San Isidro Small Farmers Association (SISFA) ken ti tallo a bulan a masikog a ni Rowena Superior, 24 tawen ken miembro ti Bagalungon Small Farmers Association (BASFA). Biktima met dagiti menor de edad a residente ti Kananga a da Randy Potoy, 15; Rey Corpin, 13; Benjie Cabugoy, 17; ken Obet Quidlat, 16.

Kasapulan nga ikkan ti naan-anay nga atensyon ti publiko ti Kananga Mass Torture and Massacre. Ti ar-aramiden a panangibutaktak ditoy dagiti organisasyon para iti karbengan kas tao ket kasapulan unay a suportaran tayo amin.

Karitek dagiti tao ti simbaan, dagiti estudyante, titser, dagiti taga-midya, dagiti pulitiko ken dadduma pay a makikaysa ken makitinnulong iti umili idiay Kananga iti gandat da a magun-od ti hustisya iti sobra a nakarungrungsot a panangiluges kadagiti karbengan da ken dagiti kabagian ken kababaryo da a natortyur ken namasaker.

Karitek ni Senador Francis Pangilinan, dadaulo ti human rights committee ti senado nga imbestigaran ti Kananga Mass Torture and Massacre, kapada ti maiyar-aramid a panagimbestiga ti komite na iti kaso ti panangpatay kada Eden Marcellana ken Eddie Gumanoy ti Mindoro.

Ipakpakita daytoy a kaso a ti militarisasyon ken awanan-asi a panagabuso ti militar iti umili iti kaaw-awayan ket mapaspasamak saan laeng nga iti Mindoro, no di ket iti amin a suli ti pagilian. Ti 19th IB nga akin-aramid ti Kananga Mass Torture and Massacre ket isu met laeng ti akin-aramid ti panangmasaker iti pamilya a Nuguit idi Enero 29, 1999 iti Sitio Mogus, Barangay Capacujan, Palapag, Northern Samar.

Desperado unay dagiti pasista a tropa ti AFP ken PNP iti pannakapaay da a parmeken ti Baro a Buyot ti Umili. Iti kinatiwel da, iturturong da ti kinadursok da iti awanan laban a sibilyan, badbaddekan da ti karbengan kas tao ken lablabsingen ti amin a probisyon dagiti sangalubongan nga annuroten iti gubat.

Iti likud ti nakapalpalalo a militarisasyon iti kaaw-awayan ken dagiti pananglabsing iti karbengan kas tao, agtultuloy nga umab-abante ti rebolusyonaryo nga armado a dangadang iti intero a pagilian. Ti lallalo a panagpapigsa ti Baro a Buyot ti Umili ket mangted ditoy ti ad-adda a kapasidad a sungbatan ti pukkaw ti umili para iti hustisya ken dusaen dagiti napeklan a pasista militar para kadagiti utang da a biag ti umili.

Back to top