Kondenaron an 19th IB ha mass torture ngan masaker han mga sibilyan ngan hors de combat ha Kananga, Leyte

Gregorio "Ka Roger" Rosal
Spokesperson
Communist Party of the Philippines
Mayo 06, 2003

Basar ha nakarawat ko nga sumat, diri engkwentro kundi mass torture ngan masaker han siyam nga mga sibilyan ngan hors de combat an nahitabo ha San Isidro, Kananga, Leyte hadton Abril 16, 2003.

Hugot nga ginkondenar han Partido Komunista han Pilipinas an Kananga mass torture ngan massacre ha kamot han mga tropa han 19th IBPA ha mando ni Lt. Col. Oscar Lactao, an Palparan han Leyte.

Sigon ha sumat han Fact Finding Mission Team nga kinadto didto kadam-an han mga biktima han masaker in duok nga pinusil ha ulo nga nagbuka han ira mga ulo. Antes hira pagpataya, nahitabo an usa nga mass torture kung diin pinaso ha kalayo an kamot han usa, ginbuhosan han nagkakaladkad nga tubig an ira mga kamot, tiil, lawas ngan kahimo, ngan kinulata ngan pinanbalbag han matig-a nga butang.

Kaupod ha mga biktima han Kananga Mass Torture ngan Massacre an lider parag-uma nga hi Eugenio Tazan, 54 anyos an edad, han San Isidro Small Farmers Association (SISFA) ngan an tulo kabulan nga burod nga hi Rowena Superior, 24 anyos an edad ngan kaapi han Bagalungon Small Farmers Association (BASFA). Biktima liwat an mga menor de edad nga residente han Kananga nga hira Randy Potoy, 15; Rey Corpin, 13; Benjie Cabugoy, 17; ngan Obet Quidlat.

Kinahanglan matagan hin hul-os nga atensyon han publiko an Kananga mass torture ngan massacre. An pagbubuksas hini han mga aktibista in kinahanglan kaupay nga suportahan naton ngatanan.

Gin-aayat ko an mga tawo-han-simbahan, mga estudyante, magturutdo, mga tawo-han-midya, mga pulitiko ngan iba pa nga makig-urosa ngan buligan an katawhan han Kananga ha ira hingyap nga makab-ot an katarungan ha ura-ura nga makangingirhat nga pagtamak han ira mga katungod ngan han mga uropod ngan katagibaryo nira nga gintortyur ngan ginmasaker.

Gin-aayat ko hi Senador Francis Pangilinan, pinuno han human rights committee han senado nga imbestigahon an Kananga mass torture ngan massacre sugad han ginhihimo nga pag-iimbestiga han iya komite ha kaso han pagpatay kan Eden Marcellana ngan Eddie Gumanoy han Mindoro.

Iginpapakita hini nga kaso nga an militarisasyon ngan waray-kaluoy nga pangangabuso han militar ha katawhan ha kabaryohan in nahitatabo diri la ha Mindoro, kundi ha ngatanan han dapit han nasud. Ini nga 19th IB nga asya an naghihimo han Kananga mass torture ngan massacre amo liwat an naghimo han pagmasaker ha pamilya nga Nuguit hadton Enero 29, 1999 ha Sityo Mogus, Barangay Capacujan, Palapag, Northern Samar.

Desperado kaupay an mga pasista nga tropa han AFP ngan PNP ha kapakyasan nira nga lupigon an Bagong Hukbong Bayan. Ha ira kalurong, gintatadong nira an ira kabangis ha waray ikakaato nga mga sibilyan, gintamakan an ira mga tawhanon nga katungod ngan gintalapas an ngatanan nga probisyon ha mga pankalibutan nga balaudnon ha gerra.

Ha luyo han grabe nga militarisasyon ha kabaryohan ngan mga pagtalapas han tawhanon nga katungod, padayon nga sumusulong an rebolusyonaryo nga armado nga pakigbisog ha bug-os nga nasud. An labaw nga pagkusog han Bagong Hukbong Bayan in naghahatag dinhi hin dugang nga kakayahan nga batonon an guliat han katawhan para ha katarungan ngan sirotan an mga lanong nga pasista nga militar para ha ira mga utang ngan dugo ha katawhan. ###

Back to top