Isaulog ang mga kadaugan sa hukbo sa katawhan! Pakyason ang kontra-rebolusyonaryong all-out war
sa rehimeng Macapagal-Arroyo ug interbensyong militar sa US!
Mensahe Alang sa ika-34 ka anibersaryo sa BHB sa Marso 29
Gregorio "Ka Roger" Rosal
Spokesperson
Communist Party of the Philippines
Marso 28, 2003
Sa pangalan sa Partido Komunista sa Pilipinas, gisaludaran nako ang tanang komander ug Pulang manggugubat sa Bagong Bukbong Bayan sa okasyon sa ika-34 ka anibersaryo niini. Isa-kamot nga nagsaludar usab ako sa tanang martir sa nasudnon-demokratikong rebolusyon.
Bunga sa husto ug hingpit nga kadasigong pagpaasdang sa gubat sa katawhan sa nangaging 33 ka tuig, padayon nga miani og mga kadaugan ang BHB sa natad sa armadong pakigbisog, rebolusyong agraryo ug pagtukod og baseng masa. Minilyon-milyong katawhan ang mitagamtam og mga benepisyo sa pagpaasdang sa gubat sa katawhan.
Lig-on nga nakaplastar karon ang kapin 120 ka natarang gerilya sa rebolusyonaryong kalihukan nga naglangkob sa katunga na sa mga distritong kongresyonal sa tibuok nasud. Mudaghan pa kini sa mga musunod nga katuigan.
Niining mga natarang gerilya nagbase ang kadaghanan sa mga Pulang manggugubat nga karon mukapin-kun-kulang 27 ka batalyon, puloan ka libong milisya ug gatusan ka libong pwersa sa mga kor sa pagdepensa sa kaugalingon. Niining mga natarana ug sa mga kasikbit nga dapit, gipilde sa BHB ug mga pwersang rebolusyonaryo ang mga pwersa sa gikasilagang kaaway.
Dinhi gilunsad sa BHB ang mga taktikal nga opensiba batok sa mga armadong pwersa sa kaaway. Nahasubay sa prinsipyo sa gerilyang pakiggubat, gigamit sa BHB ang taktikal nga superyoridad niini sa pwersa, posisyon, kasinati sa lugar, ug, labaw sa tanan, ang lalom nga suporta sa katawhan, batok sa giliyokan, nahimulag ug huyang nga pwersa sa kaaway.
Gitukod ang mga baseng gerilya ug lokal nga organo sa demokratikong goberno sa katawhan diha sa mga pinakakonsolidado nga bahin niining mga nataranang gerilya. Sa pagpangulo sa Partido ug sa BHB, gipaasdang niining mga natarang gerilya ang mga kampanya alang sa pagpukaw, pag-organisa ug pagpalihuk sa masa. Gipaasdang ang mga pakigbisog sa masa aron sulbaron ang mga suliran sa katawhan ug kab-oton ang mga kongkretong benepisyo alang sa katawhan.
Gipaasdang nag-una, ang mga antipyudal nga pakigbisog alang sa pagpaubos sa abang sa yuta, pagwagtang sa usura ug pagpakunhod usab sa uban pang dagway sa pagpahimulos ug panaugdaog sa dagkong mga agalong yutaan, negosyante ug burokrata. Ingon usab, gipaasdang niini aron palambuon ang kooperasyon, produksyon, panglawas, edukasyon, kultura ug uban pang butang alang sa kabulahanan sa katawhan. Gipaasdang usab ang mga pakigbisog para sa hustisya ug batok sa mga abuso-militar ug mga paglapas sa mga tawhanong katungod sa katawhan ug uban pang dagway sa pagpahimulos ug pagpanglupig sa katawhan. Sa pagpangulo sa Partido ug sa pag-abag sa hukbo sa katawhan, ang katawhan sa mga nataran ug baseng gerilya inang-ang nga nakakat-on sa demokratikong pagdumala sa kaugalingon.
Sa ingon, nagsilbing kuta ang mga nataran ug baseng gerilya sa pagtukod og bag-ong rebolusyonaryong katilingban. Gitukod sulod niini ang mga binhi sa bag-ong palakat nga mas lambo, demokratiko, makatarunganon ug gawasnon. Kini ang palakat nga migitib gikan sa kasamtangang nagharing dunot nga sistemang semikolonyal ug semipyudal nga napahimuslan ug gipanalipdan sa imperyalismo ug lokal nga mga reaksyonaryong hut-ong.
Dautang tinguha niining kontra-rebolusyonaryong gubat nga larga-tudong gilunsad sa rehimeng Macapagal-Arroyo nga gun-ubon kini lakip ang tanang mga kadaugan sa rebolusyonaryong kalihukan sa kabanikanhan ug sa kasyudaran.
Sangko niini, usa ka kaylap nga kampanya sa pagpanumpo ang dugay na ug inutro-otrong gilunsad sa AFP, PNP ug mga pwersang paramilitari. Pig-ot kaayo nga kabangis ug terorismo ang gisabwag nila batok sa katawhan. Walay puas nila nga giyatakan ang mga demokratikong katungod sa katawhan sa tinguhang sumpoon sila ug ang ilang rebolusyonaryong kalihukan. Sa kabanikanhan, direktang naghari ang balaud militar.
Hingpit nga kaisog ug tibuok nga kalig-on nga gi-atubang ug gipakyas sa mga Pulang manggugubat sa Bagong Hukbong Bayan ug milisyang bayan ang larga-tudong kontra-rebolusyonaryong gubat sa rehimeng US-Arroyo. Ang nagmadaugon nga taktikal nga mga opensiba sa BHB batok sa AFP ug PNP sa tibuok nasud naggupok sa ilusyon nga adunay epektibong paghari ang itoy nga rehimen ug mga armadong pwersa niini diha sa mga teritoryo sa rebolusyonaryong kalihukan.
Luyo sa kampanyang pagpanumpo sa AFP, padayon nga nagkakusog ug nagkalig-on ang BHB ug ang pakigbatok sa katawhan. Gipamatud-an lamang niini ang kahustohon sa pagpaasdang sa rebolusyonaryong armadong pakigbisog isip nag-unang dagway sa pakigbisog aron ipasiugda ang nasudnon ug demokratikong interes sa katawhang Pilipino.
Sukwahi sa taas nga moral sa mga Pulang manggugubat, kaylap ang dismoral sa han-ay sa mga reaksyonaryong tropa. Labaw'ng mitaas ang kaandam sa pagsukol sa BHB tungod kay tin-aw kanila ang pagkahusto sa ilang gipakigbatokan, nakita nila ang kaylap nga suporta sa katawhan ug miani'g daghang mga kadaugan ang ilang mga pagpanglimbasog.
Sukwahi sa pag-asdang ug pagkusog sa rebolusyonaryong kalihukan, padayon usab ang pagdaus-os sa reaksyonaryong estado. Nagakakusog ang kasilag sa katawhan ug oposisyon sa rehimeng Macapagal-Arroyo tungod sa sulabing pagka-itoy, pagkabrutal ug kadunot niini. Labaw'ng nahimong desperado ug walay paglaum ang katawhan ubos sa kasamtangang sistema. Ang gawi-ulipnon nga pagtuman sa rehimeng Arroyo sa mga palisiya sa neoliberalisasyon, nahasubay sa imperyalistang diktar maoy nagguba sa mga pwersa sa produksyon sa nasud, nag-una na ang mga mamumuo ug mag-uuma. Saksi kita karon sa gibunga niining nagakasamut nga paghugno sa produksyon, nagakadakong kawalay trabaho, pagkaalkansi sa mga mag-uuma ug mga lokal nga negosyante, nagakadakong depisit sa goberno, pagtidlum sa piso ug uban pang timailhan sa pagdaus-os sa panginabuhian sa nasud.
Busa, sukwahi sa nagakadaghang katawhan nga nagsagop sa rebolusyonaryong kalihukan, ang rehimeng Arroyo gisuka ug gisalikway sa padayong nagkadaghang katawhan. Nagakadaghang mga pwersa, lakip ang mga propesyonal ug gagmay nga mga kawani, ang miduol sa rebolusyonaryong kalihukan aron itanyag ang ilang hinabang ug suporta. Daghan na usab ang ispontanyong nagprotesta sa nagkalain-laing pamaagi.
Sukwahi sa pagsalig sa kaugalingon sa rebolusyonaryong kalihukan, kanunay'ng nagpakilooy ang reaksyonaryong rehimeng Macapagal-Arroyo sa imperyalismong US alang sa hinabang militar, ekonomikanhon ug politikal.
NAGAKALAPAD UG nagakasamut ang armadong interbensyon sa imperyalismong US sa Pilipinas, timaan sa labaw'ng pagkadunot ug pagkatiurok sa krisis sa nagharing sistemang semikolonyal ug semipyudal. Timaan usab kini sa itom nga tinguha sa US ug sa itoy nga rehimen nga idugtong ang kontra-rebolusyonaryong gubat sa Pilipinas ngadto sa gubat agresyon sa US diha sa Iraq ug uban pang kanasuran nga misukol sa US. Taliwala sa gipakita nga kawalay katakus sa itoy nga rehimen nga atubangon ang mga rebolusyonaryong pwersa, gibutang na niini ang nag-unang paglaum sa direktang agresyon sa US aron sumpuon ang rebolusyon sa Pilipinas.
Hibat nga gigamit sa rehimeng Arroyo ug US ang "gubat batok-terorismo" aron kahataga'g rason ang direktang pagdeploy og mga tropang pangkombat sa US dinhi sa nasud. Sama sa mga pagpamomba sa Metro Manila ug uban pang lugar niadtong Septembre-Oktubre 2002 nga pilit gihulagway isip binuhatan sa BHB, ang duguon nga pagpamomba sa Davao niadtong Marso 4 ug uban pang dapit sa Mindanao niini lamang, laraw sa mga operatiba sa saywar sa US Central Intelligence Agency ug Pentagon aron direktang ipasangil kini sa MILF ug dili direktang ipasangil sa BHB. Kakunsabo sa CIA ug Pentagon ang bata-bata nila nga si Gen. Angelo Reyes. Pabayron sila alang niining dagko kaayong mga krimen sa katawhang Pilipino.
Hilabihang desperadoha nga nangita og rason si Arroyo ug ang AFP aron ipsutan ang mga pagdili sa konstitusyon sa goberno mahitungod sa deployment sa mga langyaw'ng tropa sa nasud. Timailhan sa kalalum sa desperasyon niini nga madeploy na ang mga tropang Amerikano sa kontra-rebolusyonaryong gubat sa Pilipinas, andam si Arroyo nga ipsutan o lapason ang kaugalingon niining konstitusyon ug panamastamasan ang soberenya sa nasud. Gihimong dalan lamang ang pakigsangka sa Abu Sayyaf aron mabalhin sa dili madugay ang agresyong militar sa US batok sa mga rebolusyonaryong pwersa. Busa, taliwala sa kusog nga pagsupak sa katawhan ug oposisyong politikal sa direktang pagdeploy og mga tropang Amerikano batok sa Abu Sayyaf sa Sulu, gi-anunsyo gidayon sa US ug sa itoy nga rehimen ang pagbalhin sa deployment nila diha sa Mindoro, Quezon, Compostela Valley, North Cotabato o kaha asa pa man nga adunay mga rebolusyonaryong pwersa, BHB man o BIAF/MILF.
Sa paghandus usab sa imperyalismong US, hingpit na usab nga giligsan sa rehimeng Macapagal-Arroyo ang hisgutanang kalinaw sama sa NDF ug MILF. Nagtanyag ang rehimen sa matag usa og gambalay sa "negosasyon" ug "kasabutan" alang lamang sa pagsurender. Duyog niini ang paggamit sa deklarasyon nga "terorista" ug pagpakusog sa mga ataking militar aron pugson ang mga rebolusyonaryong pwersa nga musulod sa ingon niining gambalay.
Apan wala mahuraw ang mga rebolusyonaryong pwersa sa bahad sa rehimeng Arroyo nga buhian ang usa ka larga-tudo nga gubat nga suportado sa US militari. Sa kamatuoran, dugay nang walay puas ang binangis nga mga kampanyang militar sa AFP bisan pa niadtong panahon nga anaa pay hisgutanang kalinaw. Kining tanan, giharong ug gipakyas sa BHB ug sa MILF.
Wala mabalaka ang BHB sa hulga nga magpasulod og mga tropang Amerikano sa mga natarang gerilya ug teritoryo sa rebolusyonaryong kalihukan. Sa kamatuoran, ang US ug ang itoy nga rehimen ang anaay hinungdan nga mabalaka tungod kay itransporma sa pagsulod sa mga langyaw'ng tropa ang kasamtangang gubat sibil ngadto sa usa ka nasudnong gubat batok sa US. Kuyog niini, padilaabon niini ang kaylap kaayo nga patriyotikong oposisyon nga makalumpag sa kasamtangang itoy nga rehimen o unsamang musunod nga rehimen nga magpasiugda sa langyaw'ng armadong agresyon.
Ipabilin sa BHB ang kinatibuk-ang depensibong barog niini sa kasamtangang yugto sa gubat sa katawhan. Ingon pa man, unsamang pwersa nga pangkombat sa US nga musulod sa mga teritoryo sa rebolusyonaryong kalihukan o mudeploy sa kanait nga mga dapit niini, mahimong target sa BHB ug sa katawhan. Magpabiling hingpit usab ang paglihuk sa Partido, BHB ug tibuok rebolusyonaryong kalihukan aron pakyason ang langyaw'ng agresyon ug palayason ang mga langyaw'ng tropa sa Pilipinas.
SA OKASYON SA pagsaulog sa ika-34 ka anibersaryo sa pagkatukod sa BHB, gipalig-on pag-usab sa Partido ang panawagan sa BHB sa tanang-bahin nga pagpaasdang ug pagpakusog sa gubat sa katawhan sa tibuok nasud. Gilauman nato niining tuiga ug sa mga musunod nga katuigan nga labaw nga mudaghan, mukaylap ug musunson ang mga armadong taktikal nga opensiba batok sa mga armadong pwersa sa kaaway. Kuyog niini ang dugang usab nga pagpaasdang sa rebolusyong agraryo ug pagtukod og rebolusyonaryong baseng masa.
Dili na magdugay ang rehimeng Macapagal-Arroyo. Dili man kini malumpag us� ang eleksyon sa 2004, wala usay kapadulngan ang wala'g tuo nga pagmaniobra niini aron mulanat ang paghari niini pinaagi sa eleksyon o kaha sa nagkalain-lain pang pamaagi.
Andam usab ang Partido Komunista ug ang Bagong Hukbong Bayan nga harungon ang pagpanumpo o kaha pakighisgut sa unsamang rehimen nga mupuli sa rehimeng Arroyo. Determinado ug andam kining dugang muasdang ug mubuylo sa tanang-bahin sa muabutay ug mga musunod nga katuigan. Walay puas kining makig-asdang hangtud sa hingpit nga kadaugan.
Mabuhay ang Bagong Hukbong Bayan!
Mabuhay ang Partido Komunista sa Pilipinas!
Mabuhay ang katawhan ug rebolusyong Pilipino!
Back to top
| 