Igsalin-urog an mga kadaugan han hukbong bayan! Pakyason an kontra-rebolusyonaryo nga all-out war han rehimen Macapagal-Arroyo ngan interbensyon militar han US!

Mensahe Para ha ika-34 anibersaryo han BHB ha Marso 29

Gregorio "Ka Roger" Rosal
Spokesperson
Communist Party of the Philippines
Marso 28, 2003

Ha ngaran han Partido Komunista han Pilipinas, nagdadayaw ako ha ngatanan nga kumander ngan Pula nga mangaraway han Bagong Hukbong Bayan ha okasyon han ika-34 katuig nga anibersaryo hini. Taas-kamaoo liwat ako nga nagdadayaw ha ngatanan nga martir han nasudnon-demokratiko nga rebolusyon.

Bunga han tama ngan hul-os nga kapursigido nga pagsusulong han gerra han katawhan ha naglabay nga 33 katuig, padayon nga nag-ani hin mga kadaugan an BHB ha nataran han armado nga pakigbisog, rebolusyon agraryo ngan pagtitindog han baseng masa. Milyon-milyon nga katawhan an nagtatagamtam han mga benepisyo han pagsusulong han gerra han katawhan.

Madig-on nga nakalatag yana an sobra 120 nga nataran gerilya han rebolusyonaryo nga kagiusan nga naglulupgop ha katunga na han mga distrito nga kongresyunal ha bug-os nga nasud. Magdadamo pa ini ha mga masunod nga tuig.

Nakabase hini nga mga nataran gerilya an nakadadamo ha yana nga sumobra-kumulang 27 batalyon han mga Pula nga mangaraway, tagnapulo-kayukot nga milisya ngan gatosan-kayukot nga pwersa han mga kor ha pagdepensa ha kalugaringon. Hini nga mga nataran ngan ha mga kahigripid nga lugar, an mga pwersa han ginkakangalsan nga kaaway in ginrurumok han BHB ngan pwersa nga rebolusyonaryo.

Dinhi iginlalansar han BHB an mga taktikal nga opensiba kontra ha mga armado nga pwersa han kaaway. Subay ha prinsipyo han gerilya nga pakigbisog, ginagamit han BHB an taktikal nga superyoridad hini ha pwersa,, pusisyon, kabatiran ha lugar ngan, labaw ha ngatanan, an hilarum na nga suporta han katawhan, kontra ha napapalibotan, nahihimulag ngan magluya nga pwersa han kaaway.

Gintitindog an mga baseng gerilya ngan lokal nga organo han demokratiko nga pangkagamhanan han katawhan ha mga pinakakonsolidado nga bahin hini nga mga nataran gerilya. Ha pamumuno han Partido ngan han BHB, ginsusulong hini nga mga nataran gerilya an mga kampanya para ha pagpupukaw, pag-oorganisa ngan pagpapagios ha masa. Ginsusulong an mga masa nga pakigbisog para sulbaron an mga problema han katawhan ngan kab-uton an mga kongkreto nga benepisyo para ha katawhan.

Prinsipal nga ginsusulong an mga pakigbisog nga antipyudal para ha pagpamenos han plete ha tuna, pagpara han usura ngan pag-iban ha iba pa nga porma han paniniyupi han dagko nga agaron maytuna, negosyante ngan burukrata. Sugadman, ginsusulong ini ngatanan para pauswagon an kooperasyon, produksyon, panlawas, edukasyon, kultura ngan iba pa nga butang para ha kaupayan han katawhan. Ginsusulong liwat an mga pakigbisog para ha hustisya ngan pagkontra ha mga abuso militar ngan mga pagtalapas ha mga katungod pantawo han katawhan ngan iba pa nga porma han paniniyupi ngan pananalumpigos ha katawhan. Ha pamumuno han Partido ngan bulig han hukbong bayan, an katawhan ha mga nataran nga baseng gerilya papitad-pitad nga nahibaro ha demokratiko nga pagdudumara ha kalugaringon.

Ha sugad, nagseserbe nga kuta an mga nataran ngan baseng gerilya ha pagtutukod han bag-o nga rebolusyonaryo nga katilingban. Gintutukod sakob hini an mga binhi han bag-o nga kaayosan nga mas mauswag, demokratiko, makatadungan ngan talwas. Ini an kaayosan nga nabutho tikang ha presente nga naghahadi nga dunot nga sistema nga bagakolonyal ngan bagapyudal nga nabenepisyohan ngan gindepensahan han imperyalismo ngan lokal nga mga reaksyunaryo nga klase.

Maitum nga katuyuanan han kontra-rebolusyonaryo nga gerra nga todo-todo nga ginhihimo han rehimen Macapagal-Arroyo an rumkon ini ngatanan ngan ngatanan nga mga kadaugan han rebolusyonaryo nga kagiusan ngaduha ha kabaryohan ngan ha kasyudaran.

Ngadto hini, hiluagan nga kampanya han pamumuypoy an maiha na ngan pagbalik-balik nga ginhihimo han AFP, PNP ngan mga pwersa nga paramilitar. Gipipintasi nga kamabangis ngan terorismo an iginsaburak nira kontra ha katawhan. Waray wantas nira nga gintamakan an mga demokratiko nga katungod han katawhan ha hingyap nga puypoyon hira ngan an ira rebolusyonaryo nga kagiusan. Ha kabaryohan, direkta nga naghahadi an balaud militar.

Bug-os nga kamaisog ngan bug-os nga kadig-on nga gin-atubang ngan ginpakyas han mga Pula nga mangaraway han Bagong Hukbong Bayan ngan milisya han katawhan an todo-todo nga kontra-rebolusyonaryo nga gerra han rehimen US-Arroyo. An magdinaugon nga taktikal nga opensiba han BHB kontra ha AFP ngan PNP ha bug-os nga nasud in nagbasag ha ilusyon nga mayda epektibo nga paghahadi an papet nga rehimen ngan mga armado nga pwersa hini ha mga teritoryo han rebolusyonaryo nga kagiusan.

Luyo han kampanya han pamumuypoy han AFP, padayon nga nagkukusog ngan nagdidig-on an BHB ngan an pag-ato han katawhan. Ginpoprobaran la hini ngatanan an katamaan han pagsusulong han rebolusyonaryo nga armado nga pakigbisog komo prinsipal nga porma han pakigbisog agud ig-undong an nasudnon ngan demokratiko nga interes han katawhan Pilipino.

Kabaliskaran han hitaas nga moral han mga Pula nga mangaraway, samwak an dismoral ha ranggo han mga reaksyunaryo nga tropa. An kaandaman nga umato han BHB in labaw nga humitaas tungod kay tin-aw ha ira an katamaan han ira iginpakig-away, nakikita nira an hiluag nga suporta han katawhan ngan umaani hin damo nga kadaugan an ira mga pananalinguha.

Kabaliskaran han pagsulong ngan pagkusog han rebolusyonaryo nga kagiusan, padayon naman an pagluros han reaksyunaryo nga estado. Nagkukusog an kangalas han katawhan ngan oposisyon ha rehimen Macapagal-Arroyo tungod ha ura-ura nga pagkapapet, brutal ngan pagkadunot hini. Labaw nga nagin desperado ngan waray paglaum an katawhan ilarum han presente nga sistema. An baga-uripon nga pagsunod han rehimen Arroyo ha mga palisiya han neoliberalisasyon, subay ha imperyalista nga dikta in nagruba ha mga pwersa ha produksyon han nasud, prinsipal na an mga trabahador ngan parag-uma. Testigos kita yana ha iginbunga hini nga tikagrabe nga pagbagsak han produksyon, tikadako nga dis-empleyo, pagkalugi han parag-uma ngan mga lokal nga negosyante, tikadako nga depisit han gubyerno, pagluros han piso ngan iba pa nga tigaman ngan pagdarusdos han pakabuhian han nasud.

Sanglit kabaliskaran han tikadamo nga katawhan nga nagakos ha rebolusyonaryo nga kagiusan, an rehimen Arroyo in ginsusuka ngan ginsasalikway han tikadamo kaupay nga katawhan dara han ura-ura nga pagpapakapapet, waray-alang nga militarisasyon ngan waray-pugong nga kurapsyon. Tikadamo nga mga pwersa, upod an mga propesyunal ngan gudti nga empleyado, an nadaup ha rebolusyonaryo nga kagiusan agud igtanyag an ira bulig ngan suporta. Damo na liwat an ispontanyo nga nagpoprotesta ha iba-iba nga paagi.

Kabaliskaran han paglaum ha kalugaringon han rebolusyonaryo nga kagiusan, permi nga nangimanluoy an reaksyunaryo nga rehimen Macapagal-Arroyo ha imperyalismo nga US para ha bulig ha militar, ekonomya ngan pulitika.

TIKAHILUAG NGAN tikagrabe an armado nga interbensyon han imperyalismo nga US ha Pilipinas tigaman han labaw nga pagkadunot ngan pagkaludlod ha krisis han naghahadi nga sistema nga bagakolonyal ngan bagapyudal. Tigaman liwat ini han maitum nga hingyap han US ngan papet nga rehimen nga isumpay an kontra-rebolusyonaryo nga gerra ha Pilipinas ha gerra agresyon han US ha Iraq ngan iba nga nasud nga inato ha US. Atubangan han naipapakita nga kawarayan kakayahan han papet nga rehimen nga atubangon an mga rebolusyonaryo nga pwersa, iginbutang na hini an prinsipal nga paglaum ha direkta nga agresyon han Us para puypoyon an rebolusyon ha Pilipinas.

Birikis nga ginagamit han rehimen Arroyo ngan US an "gerra nga kontra-terorismo agud tagan-rason an direkta nga pagdisponer han mga tropa pankombat han US ha nasud. Sugad han mga pagpapabuto hin bomba ha Metro Manila ngan iba pa nga lugar hadton Setyembre-Oktubre 2002 nga pirit nga ginpagawas nga hinimo han BHB, an madugo nga pagpapabuto hin bomba ha Davao hadton Marso 4 ngan iba pa nga lugar ha Mindanao diri pa la maiha in larang han mga operatiba ha saywar han US Central Intelligence Agency ngan Pentagon agud maipasangil ini direkta ha MILF ngan di-direkta ha BHB. Kakunsabo han CIA ngan Pentagon an suruguon nira nga hi Gen. Angelo Reyes. Pagbabaydan nira ini nga gidadakoi nira nga krimen ha katawhan Pilipino!

Desperado ura-ura nga mamiling hin rason hi Arroyo ngan an AFP agud lusotan an mga pagdidiri han konstitusyon han gubyerno ha deployment han mga dayuhan nga tropa ha nasud. Tigaman han kahilarum han desperasyon hini nga direkta nga maidisponer na an mga tropa nga Amerikano ha kontra-rebolusyonaryo nga gerra ha Pilipinas, andam hi Arroyo nga birikan o talapason an kalugaringon hini nga konstitusyon ngan tamastamason an soberanya han nasud. Ginhihimo la nga dalan an pagkontra ha Abu Sayyaf agud ha dayuday maibalhin an agresyon militar han US kontra ha mga rebolusyonaryo nga pwersa. Sanglit atubangan han makusog nga pagtipa han katawhan ngan oposisyon nga pulitikal ha direkta nga pagdisponer han mga tropa nga Amerikano kontra ha Abu Sayyaf ha Sulu, gilayon naman nga gin-anunsyo han US ngan han papet nga rehimen an pagbalhin han disposisyon nira ha Mindoro, Quezon, Compostela Valley, North Cotabato o diin pa man nakadto an mga rebolusyonaryo nga pwersa ngaduha han NPA ngan BIAF/MILF.

Ha duso liwat han imperyalismo nga US, hul-os na gihapon nga ginligis han rehimen Macapagal-Arroyo an erestorya pankamurayawan ngaduha ha NDF ngan MILF. Nagplastar an rehimen ha kada usa hin balayan hin "negosasyon" ngan "kasarabutan" para la ha pagsurender. Kadungan hini an paggamit ha deklarasyon nga "terorista" ngan pagpapagrabe han mga atake militar para piriton an mga rebolusyonaryo nga pwersa nga sumakob ha sugad hini nga balayan.

Pero waray mahadlok an mga rebolusyonaryo nga pwersa ha tarhug han rehimen Arroyo nga buhian an usa nga todo-todo nga gerra nga suportado han militar han US. Ha kamatuoran, maiha na nga waray ludang an mabangis nga kampanya militar han AFP bisan ha panahon nga may-ada erestorya pankamurayawan. Ini nga tanan in gin-atubang ngan ginpakyas han BHB ngan han MILF.

Waray mabaraka an BHB ha tarhug nga magpapasakob hin mga tropa nga Amerikano ha mga nataran gerilya ngan teritoryo han rebolusyonaryo nga kagiusan. Ha kamatuoran, an US ngan an papet nga rehimen an mga mayda rason nga mabaraka tungod kay itatransporma han pagsakob han mga dayuhan nga tropa an presente nga gerra sibil ngadto ha usa nga nasudnon nga gerra kontra ha US. Kasugbong hini palarabon hini an gihiluluagi nga patriotiko nga oposisyon nga makapagpapabagsak ha presente nga papet nga rehimen o hain man nga kasunod nga rehimen nga mag-uundong hin dayuhan nga armado nga agresyon.

Igpapabilin han BHB an kabug-osan nga depensiba nga kamutangan hini ha presente nga yugto han gerra han katawhan. Sugadman, hain man nga pwersa pankombat han US nga sumakob o madisponer ha kahigripid nga mga teritoryo han rebolusyonaryo nga kagiusan magigin target han atake han BHB ngan katawhan. Magpabilin nga pursigido liwat an paggios han Partido, BHB ngan bug-os nga rebolusyonaryo nga kagiusan agud pakyason an dayuhan nga agresyon ngan paiwason an mga dayuhan nga tropa ha Pilipinas.

HA OKASYON HAN pagsalin-urog han ika-34 anibersaryo han pagkatindog han BHB, otro nga ginpadig-on han Partido an panawagan ha BHB nga ngatanan-nga-bahin nga isulong ngan pasik-unon an gerra han katawhan ha bug-os nga nasud. Ginlalauman naton nga hini nga tuig ngan ha mga masunod nga tuig labaw nga magdamo, maghiluag ngan mag-agsob an mga armado nga taktikal nga opensiba kontra ha mga armado nga pwersa han kaaway. Kaupod hini an labaw liwat nga pagsusulong han rebolusyon agraryo ngan pagtitindog han rebolusyonaryo nga baseng masa.

Diri na mag-iiha an rehimen Macapagal-Arroyo. Diri man ito mapabagsak antes an eleksyon 2004, waray na liwat hingaradtuan an paluyo-luyo nga pagmaniobra hini para mapahilawig an paghahadi hini pinaagi han eleksyon o ha iba-iba nga pamaagi.

Andam na liwat an Partido Komunista ngan an Bagong Hukbong Bayan nga atubangon an pamumuypoy o kaha pakikipaghimangraw han hain man nga sasaliwan ha rehimen Arroyo. Determinado ngan andam ini nga labaw nga sumulong ngan umursa han ngatanan nga bahin ha tiarabot ngan mga masunod nga tuig. Pursigido ini nga makig-away tubtob ha hul-os nga kadaugan.

Mabuhay an Bagong Hukbong Bayan!

Mabuhay an Partido Komunista han Pilipinas!

Mabuhay an katawhan ngan rebolusyon Pilipino!

Back to top