Maghiusa, ipanghimaraot ug batokan ang armadong agresyon sa US diha sa Iraq

Gregorio "Ka Roger" Rosal
Spokesperson
Communist Party of the Philippines
Marso 18, 2003

Gipanghimaraot sa Partido Komunista sa Pilipinas ang unilateral ug hingpit nga kahambugang pagdeklarar sa US og 48-oras nga ultimatum batok sa Iraq ug pagpadayon na usab sa gubat agresyon niini sa Iraq human niini nga ultimatum.

Walay unsamang katungod ang imperyalismong US nga modiktar sa Iraq kung si kinsa ang gusto nilang mangulo sa nasud. Walay unsamang katungod ang laing nasud nga maglunsad og armadong agresyon sa Iraq sa pasumangil nga dili boluntaryong mupahawa si Iraqi President Saddam Hussein. Hingpit ang katungod ug responsibilidad sa goberno ug katawhang Iraqi nga pilion ang mangulo kanila. Hingpit ang katungod sa Iraq nga batokan, puuhon ug pildihon ang mga moataking langyaw nga armadong pwersa ug pakyason ang pagsulay nga paharion didto ang imperyalistang gahum sa US.

Gipakita sa walay rendang pangligis ni Bush sa mga prosesong internasyonal ug diplomatiko nga wala kini'y planong magpailalom sa kahukmanan sa labaw nga nagkadaghang kanasuran sa tibuok kalibutan. Tungod kay dili makab-ot ang gusto niini pinaagi sa United Nations, giunahan ug gihiklin na kini sa US. Kini nga unilateralismo sa US, giduso sa nagpasulabing paninguha nga langkubon sa hegemonismo niini ang Iraq, magtukod didto og itoy nga rehimen ug angkonon ang bahanding lana sa nasud. Duso usab kini sa desperasyon sa imperyalistang US atubangan sa grabi kaayong ekonomikanhong krisis.

Gisaludohan sa PKP ang gipakita nga militansya sa katawhang Iraqi aron panalipdan ang soberenya sa ilang nasud ug supakon ang mga diktar sa superpower nga imperyalistang US. Walay laing angay'ng himuon sa katawhang Iraqi kundili ang maglunsad og usa ka patriyotikong gubat batok sa agresyon sa US.

Atubangan sa imperyalistang pagpanggubat sa US diha sa Iraq, angay'ng maglunsad ang mga rebolusyonaryong pwersa ug katawhan sa kalibutan og tanang posibleng pamaagi ug porma sa pakigbisog aron lumpagon ang imperyalismong US.

Kinahanglan nga makighiusa ang rebolusyonaryo ug katawhang Pilipino ug tanang rebolusyonaryo ug katawhan sa kalibutan diha sa pakigbatok sa katawhang Iraqi sa armadong agresyon sa US. Sa pagyatak sa US sa soberenya ug kaugalingnan sa Iraq, gipanamastamasan sa US ang mga batakang prinsipyo sa sibilisadong pakigrelasyon tali sa mga nasud. Labaw usab nga nagakadako ang hulga sa agresyon sa US dinhi sa Pilipinas. Kinahanglan nga panghimaraoton ug batokan sa tanang posibleng pamaagi ang binut� nga pagsuporta sa rehimeng Macapagal-Arroyo sa imperyalistang agalon niini. Kinahanglang lumpagon ang mga goberno nga nagasuporta sa gubat agresyon sa US diha sa Iraq.

Kinahanglang maglunsad og tanang posibleng porma sa pakigbisog-ligal ug iligal, armado ug dili armado-ang mga rebolusyonaryong pwersa ug katawhan sa US ug sa uban pang magubaton ug pasistang kakunsabo sa US sa "coalition of the willing" aron pugngan ang agresyon batok sa Iraq ug hataga'g lamparos ang mga imperyalista nga goberno nila George W. Bush sa US, Tony Blair sa UK, Jose Maria Aznar sa Spain ug John Howard sa Australia. Tukma gayud ang panawagan diha sa katawhan niining mga imperyalistang kanasuran nga itransporma ang imperyalistang gubat ngadto sa mga gubat sibil batok sa matag-niya'ng magubatong mga goberno.

Back to top