Tubag sa mga hisgutanang milutaw kalambigit sa pagsilot kang Romulo Kintanar
Gregorio "Ka Roger" Rosal
Spokesperson
Communist Party of the Philippines
Pebrero 07, 2003
Buot nakong ipahayag ang mga dugang panglantaw ug pagpatin-aw sa pangulohan sa Partido sa mga hisgutanang milutaw kalambigit sa pagsilot kang Romulo Kintanar.
Una sa tanan, buot nako nga subling hataga'g duso nga ang pagpahamtang ug pagpatuman sa pinakabug-at nga silot kang Romulo Kintanar, hingpit nga husto ug kinahanglan subay sa musunod nga mga kapital nga krimen niya batok sa rebolusyonaryong kalihukan ug sa katawhan:
1. Gigamit niya ang ngalan ug pwersa sa Partido ug BHB alang sa iyang mga binuhatang gangster niadtong 1980-1992 luyo sa tin-aw nga pagdili sa Partido ug BHB niini.
2. Daghan siya'g kaso sa pagpangawat og dagkong kantidad nga pundo sa Partido niadtong panahona usab.
3. Usa siya sa mga mastermind sa mga kampanyang pagsiak ug pagbungkag sa Partido nagsugod niadtong 1992 hangtud 2003.
4. Isip konsultant sa AFP ug PNP, milingkud siya sa mga tigum ug komperensya sa AFP ug PNP aron tun-an ang dagan sa kampanyang "counter-insurgency" ug mutabang sa paggambalay og mas epektibong mga pamaagi ug taktika batok sa NPA ug rebolusyonaryong kalihukan.
5. Nagsilbi siya isip aktwal nga military intelligence agent ug special military consultant sa paglunsad og kontra-rebolusyonaryong programa ug mga plano sa AFP ug PNP nagsugod niadtong 1992 hangtud 2003. Nahimo usab siya nga intelligence agent sa NBI.
6. Nahimo siyang project officer sa pakyas nga pagsulay'ng asasinasyon kang Kaubang Jose Ma. Sison niadtong Mayo 2000.
7. Nagpasuhol siya isip gun-for-hire, gamit ang iyang gitukod nga security agency isip pantalya, ug sa ingon nga kapasidad nalambigit sa pila ka kriminal nga pagpatay nga gikomisyon kaniya.
8. Nangawat siya'g dako gikan sa pundo sa goberno, kakunsabo ang mga gipasulod niyang mga tawo sa Bureau of Customs niadtong 1986 pataas ug uban pang mga ahensya sa goberno.
9. Tigpaluyo siya ug misalmot sa daghan pang linuug nga krimen nagsugod niadtong 1992 hangtud sa 2003.
Ang mga unang kaso ni Romulo Kintanar gisang-at sa espesyal nga hukumang bayan niadtong 1993. Kung tugkaron, ang gibug-aton sa mga kaso ug kriminal nga tulubagon niya sa katawhan ug rebolusyonaryong kalihukan hangtud niadtong panahona, igo na aron ipahamtang kaniya ang pinakabug-at nga silot.
Adunay patakaran ang Partido ug rebolusyonaryong kalihukan nga sa proseso sa pagbista o bisan natapos na kini, ang mga nagpakita og kinasingkasing nga paghinulsul ug nagtul-id sa mga kasaypanan, mauy mahatagan og amnestiya. Gipatuman kini nga patakaran sa tanang uban pa nga nagtraydor sa Partido ug rebolusyonaryong kalihukan, lakip na si Romulo Kintanar. Apan wala siya'y gipakita bisan diyut lang nga paghinulsul o kaha unsaman nga pagtul-id. Midaghan ug padayon ang mga nasang-at nga kaso kalambigit sa mga kriminal ug kontra-rebolusyonaryong aktibidad niya. Sa gihimong pagribyu sa espesyal nga hukumang bayan sa iyang kaso niadtong 2002, nahataga'g gibug-aton ang mga bag-ong ebidensya nga nagpamatuud nga si Romulo Kintanar, usa na ka lunudpatay'ng kriminal ug kontra-rebolusyonaryo. Nagpadayon ug labaw pang nagumon siya sa iyang mga kriminal ug kontra-rebolusyonaryong aktibidad sukad niadtong direkta nang nagtraydor sa Partido ug rebolusyonaryong kalihukan.
Labaw'ng dautan pa sa iyang mga kriminal nga mga aktibidad ang direkta niyang pag-anib sa istruktura sa AFP, PNP, NBI ug uban pang ahensya sa intelligence sa goberno isip consultant, intelligence agent ug espesyal nga operatiba sa militar ug kapulisan batok sa rebolusyonaryong kalihukan. Ang iyang pagka-military intelligence agent mauy gikumpirma mismo sa Malakanyang ug AFP matapos ipahamtang kaniya ang silot sa rebolusyonaryong kalihukan niadtong Enero 23. Sa laktud nga pagkasulti, wala niya pilia nga "magpakahilom" na lamang ug "manginabuhi isip sibilyan" sama sa nasulti sa uban. Inay, gipili niya nga aktibong makig-away ug maghatag-kadaot sa rebolusyonaryong kalihukan. Kabahin niini ang pakigkunsabo sa AFP ug PNP sa paglunsad og mga operasyong militar batok sa NPA ug ang nasawot nga planong pagpatay kang Kaubang Jose Ma. Sison niadtong Mayo 2000, kakunsabo ang kanhing hepe sa PNP nga si Panfilo Lacson.
Bunga sa pagpamatuud sa mga kapital nga krimen niya, gisentensyahan siya sa espesyal nga hukumang bayan og pinakabug-at nga silot. Gawas pa niini, isip military intelligence agent ug operative nga misalmot sa pagplano sa mga kontra-rebolusyonaryong operasyong militar batok sa rebolusyonaryong kalihukan, nahimong usa ka lehitimong military target na siya nahasubay sa mga internasyonal nga kalagdaan sa gubat nga napatik sa Section II, Article 43 sa Protocol I sa Geneva Agreements (1949).
Ikaduha. Gipanghimaraot sa Partido ang isterya nga gimugna sa mga kontra-rebolusyonaryong traydor, sa Malakanyang ug sa AFP sa gipanulti nilang taas nga talaan sa mga likidahonon, nga gikalakipan sa tanang mirisayn ug nagtraydor sa PKP ug NPA.
Gipatin-aw nako sa mga nangaging pamahayag nga ang pagpahamtang og pinakabug-at nga silot sa gambalay sa rebolusyonaryong sistema sa hustisya mauy gireserba lamang sa tawo nga wala kaduha-duhai nga napamatud-ang adunay mga kapital nga krimen batok sa katawhan ug rebolusyonaryong kalihukan. Maampingon kining gihukman ug inotro-otrong giribyu sa hukumang bayan aron siguruhon nga husto ang desisyon. Gipatin-aw usab nako niining kabag-ohan lamang nga pudyot sa kumingking ang mga pinakalunud-patay'ng kriminal ug kontra-rebolusyonaryong nahukman nga pahamtangan og pinakabug-at nga silot.
Apan ang sistema sa rebolusyonaryong hustisya nga hingpit nang hapsay, sayantipiko, makatarunganon ug makatao, gihibat sa Malakanyang, AFP ug mga tigmugna nila og psywar nga palutawon nga inahat-ahat ug walay kapaingnan nga kaayohan.
Ang Malakanyang, AFP ug mga tigmugna nila og psywar, walay hunong sa paglubid og mga sugilanon aron ipakita nga kriminal ug terorista ang PKP ug NPA. Ang gilubid sa Malakanyang nga "NPA hitlist" nga gikalakipan kunohay ni Presidential chief of staff Rigoberto Tiglao ug Foreign Affairs Secretary Blas Ople mauy paotro-otro na nilang gipagula sa ilang mga press release aron ihulagway nga ang NPA walay pili sa paggamit og armadong kusog ug nagtarget bisan sa mga sibilyan, ug ang pagsilot kang Romulo Kintanar, usa ka akto sa terorismo.
Sama ka dautan sa psywar sa Malakanyang ang sulabing paghibat ug pagdaot sa Partido sa mga kontra-rebolusyonaryong traydor sama nila Arturo Tabara, Nilo dela Cruz, Nathan Quimpo nga tanan adunay mangilngig nga mga krimen ug kasal-anan sa rebolusyonaryong kalihukan. Nagpanutho sila og hilo ug nagpakaylap og disimpormasyon aron ihulagway nga anghel si Romulo Kintanar ug ang ilang mga kaugalingon, mulikay sa mga kaakohan nila sa rebolusyonaryong kalihukan, ipagawas nga ang pagsilot kang Romulo Kintanar, mabangis ug wala-sa-lugar nga tubag sa panagbangi lamang sa ideolohiya.
Bisan niadtong nagpaaron-ingnon pa siya sa sulod sa rebolusyonaryong kalihukan ug ilabina niadtong direkta na siya nga nagtraydor, si Tabara hingpit nga nakigtinabangay sa militar ug kapulisan pinaagi sa paghatag og nahibaw-an niyang karaang impormasyon mahitungod sa Partido ug rebolusyonaryong kalihukan. Usa na siya ka hingpit nga mersenaryong nagpagamit sa pinakadautan nga mga reaksyonaryo sama ni Danding Cojuangco nga daghan na'g utang-dugo sa rebolusyonaryong kalihukan ug katawhan ug grabing nagpanaogdaog ug nagpahimulos karon sa puloan ka libong mag-uuma sa Negros, Isabela ug uban pang dapit. Gitransporma nila Tabara ug dela Cruz ang RPA-ABB dili lamang aron mahimong usa ka pwersang paramilitar nga natakin sa AFP ug PNP kundili aron usab mahimong usa ka binayrang private army ni Cojuangco.
Sa kasabutan nga gisulod nila sa rehimeng Estrada niadtong 1999 ug nasubli sa rehimeng Macapagal-Arroyo niadtong 2002, hingpit nga gipaubos ang RPA-ABB diha sa kontrol ug otoridad sa AFP ug PNP ug gipalig-on ang kanhi nang impormal nga mga palakat kundiin gigamit sila isip mga pangbala sa kanyon sa kontra-rebolusyonaryong gubat sa AFP-PNP. Gipapelan ni Romulo Kintanar ang pagka-consultant sa hisgutanan alang sa pagsurender sa RPA-ABB ug tigpatunga siya sa RPA-ABB ug Dept. of Budget and Management alang sa pagpagawas og dagkong pundong kinahanglan kuno sa "livelihood projects" apan gihukhuk nila Tabara.
Dakong kabakakan nga gisakmit ni dela Cruz ang pagsilot kang Romulo Kintanar aron ipasa sa PKP-NPA ang responsibilidad sa pagpatay sa RPA-ABB kang Filemon "Popoy" Lagman duha ka tuig na ang miagi. Kini ang gikasangputan sa panag-away nila Tabara-dela Cruz ug Lagman sa binahinay sa P400 ka milyong suborno nga personal nga gihatag sa PEA-Amari kang Lagman, bugti sa pakigtinabangay sa grupo nila Lagman ug Tabara-dela Cruz sa pagpalayas sa mga kabus sa dakbayan nga nanimuyo niadto sa Freedom Island, Parañaque. Tugub sa kasuko ang grupo nila Tabara-dela Cruz human ilukluk ni Lagman ang bulto sa gikita nga suborno ug salinan na lamang ang RPA-ABB og mumho.
Gipalutaw usab ni Quimpo nga ang binuhatang gangster ni Romulo Kintanar, kabahin lamang sa pagpatuman sa iyang mga "opisyal nga katungdanan" nahasubay sa mando sa sentro sa Partido. Buot niya ilarawan nga si Romulo Kintanar usa ka "matinud-anong sundalo" sukwahi sa kamatuoran nga ang mga gangster nga binuhatan ni Romulo Kintanar, gililong niya sa sentral nga pangulohan sa Partido ug ang mga benepisyo niini, gikinaugalingon ug gikatagbawan niya ug sa iyang mga dunot nga sagabay. Gigamit usab nga panap-ong ni Quimpo ang ingon niining pangatarungan sa iyang personal nga responsibilidad sa paglunsad ug pagpatuman sa Kampanyang Ahos sa Mindanao niadtong 1984-85, nga lapas sa mga patakaran ug prinsipyo sa Partido ug gililong sa kasayoran sa sentral nga pangulohan sa PKP.
Ikatulo. Gipanghimaraot sa Partido ang pag-ila nga "terorista" ug "kriminal" sa mga lehitimong gimbuhatong rebolusyonaryo ug pangpolitikang pakigbisog batok sa reaksyonaryo ug itoy nga mga patakaran ug paghari ug batok sa mga pinakadautan nga tiglapas sa mga katungod ug kabulahanan sa katawhan.
Sa desperasyong palutawon nga "terorista" ug "kriminal" ang NPA, pilit nga gilarawan sa Malakanyang nga si Romulo Kintanar, usa ka "maayong tawo" nga "mipili sa dalan sa kalinaw" duyog sa direktang pag-angkon usab sa Malakanyang ug AFP nga "nagtrabaho siya isip military intelligence agent."
Desperado usab sila nga suportahan ang pasangil nila nga "terorista" si Kaubang Jose Ma. Sison pinaagi sa pagdahig kaniya sa mga tataw nga kaso sa pagpahamtang sa NPA og rebolusyonaryong silot sa mga lunudpatay'ng kaaway sa katawhan, sama nila Romulo Kintanar ug Col. Rodolfo Aguinaldo ug pagsang-at kunohay niining mga kasoha ngadto sa United Nations. Gihimo kini sa rehimeng Macapagal-Arroyo sa pagsulay nga ipiton ang PKP-NPA-NDF ug negotiating panel alang sa hisgutanang kalinaw aron ipamugos ang pagdawat sa gi-andam nilang dokumento sa pagpasurender sa PKP-NPA-NDF sa porma nga gisugyot nila nga "Final Peace Agreement."
Bisan ang simpleng trabaho sa tigpamâbâ sa Partido nga magpresentar og baruganan sa PKP ug rebolusyonaryong kalihukan, buot ilhon nga "kriminal" ug "terorista"; ug tungod niini, nag-anunsyo og P1 ka milyon nga premyo alang sa pagpadakop sa inyong yanong tigpalamdag.
Tanan na lamang nga mahimong mapulot, gipudyot ug ibalibag ngadto sa Partido ug NPA sa desperasyong ihulagway ang rebolusyonaryong kalihukan isip "kriminal" ug "terorista."
Apan sa sangputanan, walay laing gibalibag ang rehimeng Macapagal-Arroyo kundili ang kaugalingon niini mismo. Ang gihimo niining pagsabak sa mga kontra-rebolusyonaryong traydor, lakip kadtong adunay bug-at nga mga krimen batok sa katawhan ug rebolusyonaryong kalihukan, mauy tin-aw nga nagpakita og hingpit nga kadunot niini.###
Back to top
| 