Sabat sa nga halambalanon nga nagtuhaw angot sa pagsilut kay Kintanar
Gregorio "Ka Roger" Rosal
Spokesperson
Communist Party of the Philippines
Pebrero 07, 2003
Gusto ko ipahayag ang mga dugang nga panan-awan kag pag-athag sang pamunuan sang Partido sa mga halambalanon nga nagtuhaw angot sa pagsilut kay Romulo Kintanar.
Una sa tanan, gusto ko liwat hatagan-tum-ok nga ang paghatag kag pagpatuman sang pinakamabug-at nga silut kay Romulo Kintanar lubos nga husto kag kinahanglanon base sa masunnod nga mga kapital nga krimen niya batuk sa rebolusyonaryong hublag kag sa pumuluyo:
1. Gingamit niya ang ngalan kag pwersa sang Partido kag BHB para sa iya mga hilikuton gangster sadtong 1980-1992 sa pihak sang maathag nga pagbawal sang Partido kag BHB sa mga ini.
2. Madamu siya nga kaso sang pagpangawat sang dalagku nga pondo sang Partido sadto man nga panahon.
3. Isa siya sa mga tagpamuno sa mga kampanya nga pagpangpihak kag pagpangwasak sa Partido umpisa 1992 tubtub 2003.
4. Bilang consultant sang AFP kag PNP, nagapungko siya sa mga miting kag kumperensya sang AFP kag PNP agud tun-an ang dalagan sang kampanya nga "counter-insurgency" kag magbulig sa pagbalay sang mas epektibo nga mga pamaagi kag taktika batuk sa BHB kag rebolusyonaryong hublag.
5. Nagserbi siya nga aktwal nga military intelligence agent kag special military consultant sa paglunsar sang kontra-rebolusyonaryong programa kag mga plano sang AFP kag PNP umpisa 1992 tubtub 2003. Nangin intelligence agent man siya sang NBI.
6. Nangin project officer siya sa napaslawan nga tuyo nga asasinasyon kay Kaupod Jose Ma. Sison sadtong Mayo 2000.
7. Nagapaarkila siya bilang gun-for-hire, gamit ang iya ginpundar nga security agency bilang prente, kag sa amo nga kapasidad naimbolbar sa pila ka kriminal nga pagpatay sa ginkomisyon sa iya.
8. Dalagkuan nga pagdambong sa kaban sang banwa para sa personal mga pagpagusa, kahimbon ang mga ginpasulod niya nga mga tawo sa Bureau of Customs sadtong 1986 pataas kag sa iban pa nga mga ahensya sang gubyerno.
9. Tagpamuno kag nag-entra siya sa madamu pa nga malaut nga krimen halin 1992 tubtub 2003.
Ang mga una nga kaso ni Kintanar (1-3) ginpasaka sa espesyal nga hukmanan sang banwa sadtong 1993. Kon usisaon, ang bug-at sang mga kaso kag kriminal nga salabton niya sa pumuluyo kag rebolusyonaryong hublag tubtub sa sadtong panahon nagakaigo na agud ipanaog sa iya ang pinakamabug-at nga silut.
May polisiya ang Partido kag rebolusyonaryong hublag nga sa pagpatuman sang rebolusyonaryong hustisya, ginahatagan-kunsiderasyon kag ginabukas ang posibilidad sang paghatag amnestiya sa sin-o man nagapakita sang hugot nga paghinulsol kag handa magtadlong sa mga kasaypanan nga nahimo. Gina-aplikar ang polisiya nga ini sa tanan nga nagtraidor sa Partido kag rebolusyonaryong hublag, pati kay Kintanar. Ugaling wala siya sang ginpakita nga bisan gamay nga paghinulsol ukon ano man nga pagpanadlong. Nagdamu kag padayon ang pagpasaka sang mga kaso nga may angot sa kriminal kag kontra-rebolusyonaryong aktibidades niya. Sa ginhimo nga pagrebyu kag pagsentensya sang espesyal nga hukmanan sang banwa sa iya kaso sadtong 2002, ginhatagan-tum-ok ang mga bag-o nga ebidensya nga nagapamatuod nga si Kintanar nagpadayon kag labi pa nga nagumon sa iya kriminal kag kontra-rebolusyonaryong aktibidades sugod sadtong direkta nga nagluib sa Partido kag rebolusyonaryong hublag.
Masobra pa sa iya kriminal nga aktidades ang direkta na niya nga pag-entra sa istruktura sang AFP, PNP, NBI kag iban pa nga ahensya sa intelligence sang gubyerno bilang consultant, intelligence agent kag espesyal nga operatiba sang militar kag pulis batuk sa rebolusyonaryong hublag. Ang iya pagka-military intelligence agent ginkumpirma mismo sang Malakanyang kag AFP pagkatapos ginpatuman ang pagsilut sang rebolusyonaryong hublag sadtong Enero 23. Sa malip-ot nga pulong, wala niya ginpili nga "maghipos" lamang kag "mangabuhi bilang sibilyan" pareho sa ginahambal sang iban, kundi ginpili niya nga aktibo magbatu kag magpanghalit sa rebolusyonaryong hublag bilang kabahin sang militar sang gubyerno. Lakip diri ang pakighimbon sa AFP kag PNP sa paglunsar sang mga operasyon militar batuk sa BHB kag sa napaslawan nga plano sa pagpatay kay Kaupod Jose Ma. Sison sadtong Mayo 2000, kahimbon ang anay hepe sang PNP nga si Panfilo Lacson.
Bunga sang pagpamatuod sang mga kapital nga krimen niya, ginsentensyahan siya sang espesyal nga hukmanan sang banwa sang pinakamabug-at nga silut. Luwas pa diri, bilang military intelligence agent at operative nga nagapartisipar sa pagplano sang mga operasyon militar batuk sa rebolusyonaryong hublag, nangin isa ka lehitimo nga military target na siya santu sa nga internasyunal nga pagsulundan sa gera nga nasaad sa Section II, Article 43 sang Protocol sang Geneva Conventions (1949).
Ikaduha. Ginakundenar sang Partido ang isterya nga ginatuga sang mga kontra-rebolusyonaryong traidor, sang Malakanyang kag sang AFP sa ginahambal nila nga mahaba nga listahan sang mga likidahon, nga ginalakipan sang tanan nga naghalin kag nagluib sa PKP kag BHB.
Ginaathag ko sa mga nagtaliwan nga pahayag nga ang paghatag sang pinakamabug-at nga silut sa balayon sang rebolusyonaryong sistema sang hustisya ginareserba lamang sa mga tawo nga wala duda napamatud-an may mga krimen batuk sa pumuluyo kag rebolusyonaryong hublag. Mahalong ini nga ginadesisyunan kag paliwat-liwat nga ginarebyu sang hukmanan sang banwa agud siguruhon nga husto ang desisyon. Gin-athag ko man sining ulihi nga pila lamang ang mga pinakamasupog nga kriminal kag kontra-rebolusyonaryo nga ginsentensyahan sang pinakamabug-at nga silut.
Pero ang sistema sang rebolusyonaryong hustisya nga lubos maid-id, syentipiko, matarung kag makatawo ginapamilit sang Malakayang, AFP kag mga tagadabuk nila sang psywar nga patuhawon nga arbitraryo kag wala basehan.
Ang Malakanyang, AFP kag mga tagadabuk nila sang psywar ang wala untat sa paglubid sang mga istorya agud pagguwaon nga kriminal kag terorista ang PKP kag BHB. Ang ginlubid sang Malakanyang nga istorya nga "NPA hitlist" ginalakipan kuno nanday Presidential Chief-of-Staff Rigoberto Tiglao kag Foreign Affairs Secretary Blas Ople ang paliwat-liwat nga ginapagguwa nila sa ila mga press release agud pagguwaon nga ang BHB wala pili sa paggamit sang armadong kusog kag nagatarget mangin mga sibilyan, kag ang pagsilut kay Kintanar isa ka akto sang terorismo.
Pareho sa kalain sang psywar sang Malakanyang ang malala nga pagpangtorse kag pagpanamad sa Partido sang mga kontra-rebolusyonaryong traidor pareho nanday Arturo Tabara, Nilo de la Cruz, Nathan Quimpo nga lunsay may malala nga krimen kag sala sa rebolusyonaryong hublag. Nagaluad sila sang hilo kag nagapalapta sang disimpormasyon agud ilaragway nga anghel si Kintanar kag ang mga kaugalingon nila, makalikaw sa mga salabton nila sa rebolusyonaryong hublag, pagguwaon nga mapintas kag wala-sa-lugar nga pagsabat sa banggianay lamang sa ideolohiya.
Bisan sadtong nagapakuno-kuno pa siya sa sulod sang rebolusyonaryong hublag kag labi na sadtong direkta siya nagluib, si Tabara lubos nga nagabuligay sa militar kag pulis paagi sa paghatag sang nahibal-an niya nga daan nga impormasyon bahin sa Partido kag rebolusyonaryong hublag. Isa na siya nga lubos nga mersenaryo nga nagapagamit sa pinakamalaut nga reaksyunaryo pareho ni Danding Cojuangco nga madamu sang utang nga dugo sa rebolusyonaryong hublag kag pumuluyo kag mabaskog nga nagapamigos kag nagahimulos subong sa linibu-libo nga mangunguma sa Negros, Isabela kag iban pa nga lugar. Gintransporma nanday Tabara kag De la Cruz ang RPA-ABB indi lamang para mangin isa ka pwersa paramilitar nga nagakabit sa AFP kag PNP kundi para man mangin isa ka bayaran nga private army ni Cojuangco.
Ang kasugtanan nga ginsudlan nila sa rehimeng Estrada sadtong 1999 kag liwat sa rehimeng Macapagal-Arroyo sadtong 2002 lubos nga nagapaidalum sang RPA-ABB sa kontrol kag awtoridad sang AFP kag PNP kag nagpalig-on sa daan nga impormal nga mga areglo kon sa diin ginagamit sila bilang mga pangbala sa kanyon sang kontra-rebolusyonaryong gera sang AFP kag PNP. Ginpapelan ni Kintanar ang pagka-consultant sa halambalanon para sa pagsurender sang RPA-ABB kag Dept. of Budget and Management para sa pagpagguwa sang dalagku nga pondo nga kinahanglanon kuno sa "livelihood projects" pero ginabulsa nanday Tabara.
Lubos nga butigon nga ginhingalitan ni De la Cruz ang pagsilut kay Kintanar agud ipasa sa PKP-BHB ang responsibilidad sa pagpatay sang RPA-ABB kay Filemon "Popoy" Lagman duha ka tuig nga nakaligad. Ini ang gindangtan sang away nanday Tabara-De la Cruz kag Lagman sa partehanay sa P400 milyones nga suhol nga personal ginhatag sang PEA-Amari kay Lagman, kabaylo sang pagbulig sang grupo nanday Lagman at Tabara-De la Cruz sa pagpalayas sang mga imol sa syudad nga naga-estar sadto sa Freedom Island, Paranaque. Puno sang kaakig ang grupo nanday Tabara-De la Cruz pagkatapos ginbulsa ni Lagman ang daku nga ginkita sa suhol kag binlan na lamang ang RPA-ABB sa mumo.
Ginapatuhaw naman ni Quimpo nga ang hilikuton gangster ni Kintanar kabahin lamang sang pagpatuman sang iya mga "upisyal nga tulungdan" sigun sa mandu sang sentro sang Partido. Gusto niya ilaragway si Kintanar nga isa ka "tampad nga suldado" baliskad sa kamatuoran nga ang mga hilikuton gangster ni Kintanar ginalipod niya sa sentral nga pamunuan sang Partido kag ang mga benepisyo sa mga ini ginaangkon nga iya kag ginapagusa niya kag mga garuk nga niya nga kahimbon. Ginatabunan man ni Quimpo sang amo nga pagpangrason ang iya personal kag pangunahon nga responsibilidad sa paglunsar kag pagpatuman sang Kampanyang Ahos sa Mindanao sadtong 1984-85, bilang puno sang caretaker committee, lapas sa mga polisiya kag prinsipyo sang Partido kag likum sa ihibalo sang sentral nga pamunuan sang PKP.
Ikatlo. Ginakundenar sang Partido ang pagkabig nga "terorista" kag "kriminal" ang mga lehitimo nga hilikuton rebolusyonaryo kag pangpulitika nga paghimakas batuk sa mga reaksyunaryo kag papet nga polisiya kag paginahum kag batuk sa mga pinakamalaut nga taglapas sa mga kinamatarung kag interes sang pumuluyo.
Sa desperasyon nga ipakita nga "terorista" kag "kriminal" ang BHB, pilit ginalaragway sang Malakanyang nga si Kintanar isa ka "maayo nga tawo" nga "nagpili sang dalan sang kalinungan" kadungan sa direktang pag-ako man sang Malakanyang kag AFP nga "nagatrabaho siya bilang military intelligence agent".
Desperado man sila nga pabakuron ang akusasyon nila nga "terorista" si Kaupod Jose Ma. Sison paagi sa pagdalahig sa iya sa mga tampok nga kaso sang paghatag sang BHB sang rebolusyonaryong silut sa mga masupog nga kaaway sang pumuluyo, pareho nanday Kintanar kag Col. Rodolfo Aguinaldo kag pagpasaka kuno sang kaso nga ini sa United Nations. Ginahimo ini sang rehimeng Macapagal-Arroyo sa tuyo nga pagpang-ipit sa PKP-BHB-NDF kag negotiating panel para sa sugilanon pangkalinungan agud piliton nga batunon ang ginhanda nila nga dokumento sang pagpasurender sa PKP-BHB-NDF sa porma sang hagna nila nga "Final Peace Agreement".
Bisan ang simple nga trabaho sang tagapamaba sang Partido nga nagapabutyag sang panindugan sang PKP kag rebolusyonaryong hublag gusto sini bilangon nga "kriminal" kag "terorista"; kag bangud sini, nag-anunsyo sang P1 milyon nga premyo para sa pagkadakup sa kubos ninyo nga alagad.
Tanan na lamang nga pwede mapulot ginakuha kag ginahaboy sa Partido kag BHB sa desperasyon nga ilaragway ang rebolusyonaryong hublag bilang "kriminal" kag "terorista".
Pero sa katapus-tapusan, wala sang iban nga ginabato ang rehimeng Macapagal-Arroyo kundi ang kaugalingon sini. Ang ginahimo sini nga pagsakdag sa mga kontra-rebolousyonaryong traidor, lakip ang may mabug-at nga krimen batuk sa pumuluyo kag rebolusyonaryong hublag maathag nagapakita sang lubos nga kagarukan sini. ###
Back to top
| 