Lubos nga matarung ang pagsilut kay Romulo Kintanar

Gregorio "Ka Roger" Rosal
Spokesperson
Communist Party of the Philippines
Enero 26, 2003

Nagatalangkas ang mga salabton kriminal ni Romulo Kintanar batuk sa rebolusyonaryong hublag kag pumuluyo.

Nag-umpisa nga lumarga sang husto ang kriminal nga aktibidades ni Kintanar sadtong 1984 sa Davao, labing naglala sadtong ulihi nga bahin sang dekada 1980 kag ginpasanyog pa niya sang ginpahalin siya sa Partido sadtong 1992 kag lubos nga nagsimpon sa mga kriminal nga sindikato sa sulod kag guwa sang militar. Lubos nga matarung nga tapuson ang iya garuk, kriminal, kontra-rebolusyonaryo kag maduguon nga rekord.

Ginpasakaan siya sang mabug-at nga kaso kriminal sa hukmanan sang banwa sadtong 1993, wala duda nga napamatud-an nga may sala kag ginsentensyahan sang hukmanan sang banwa sang pinakamabug-at nga silut.

Madugay na nga may mandu sa BHB nga arestuhon siya kag ipaatubang sa hukmanan sang banwa. Ugaling madugay siya pirme nagalikaw kag nagahimo pa sang mga kontra-tikang agud indi maatubang ang iya mga kriminal nga responsibilidad.

Ang paghatag silut sa iya madinalag-on nga gintigayon sadtong Enero 23, 2003 sang isa ka espesyal nga yunit sang Bagong Hukbong Bayan. Kabahin ini sang malig-on nga determinasyon sang Partido kag BHB nga pasabton sa rebolusyonaryong hustisya ang mga may pinakadalagku nga krimen batuk sa rebolusyon kag pumuluyo, bisan nga ang imbolbado ara subong ukon daan nga pinuno sang Partido kag BHB, ukon indi gani dalagku nga reaksyunaryong manggaran ukon gamhanan.

Ang paghatag sang BHB sang pinakamabug-at nga silut ginareserba lamang sa mga tawo nga wala duda napamatud-an naghimo sang mga malaut nga krimen. Kalakip diri si Romulo Kintanar. Ang mga masunod pila lamang sa pinakadaku nga mga kriminal nga responsibilidad niya bisan sadtong nagapakuno-kuno pa siya sa sulod sang Partido kag Bagong Hukbong Bayan kag nagsobra pa umpisa direkta nga pagtraidor niya sa rebolusyonaryong hublag:

1) Iligal nga pagpang-abuso sang iya awtoridad sa sulod sang Partido kag hangaway sang banwa sa pagpamuno, paglunsar kag pagpalapnag sang mga operasyong gangster. Ang mga gintukid ukon ginapamunuan niya nga grupo para sa "ispesyal nga operasyon" amo ang nagapatuman sang mga kidnapping for ransom, mga holdup sa mga bangko kag iban pa nga negosyo, pagpameke sang dolyar kag iban pa nga porma sang krimen kag kalainan. Gingamit niya ang mga ginkawat halin diri para sa personal nga pagpagusa kag maluho kag garuk nga pagpangabuhi nila nga magkahimbon. Ginhigop niya sa korapsyon kag kagarukan ang mga yunit sang partisano sa syudad nga ginapamunuan niya. Nagrekrut man siya sang mga salin sang katilingban kag nakighimbunanay sa mga kriminal nga sindikato, mga pwersa militar kag pulis, kag mga garuk nga elemento nga sa kaulihanan upod niya nga nagtraidor kag ginsipa sa Partido kag BHB. Iban sa mga gingamit niya nga operatiba ang napatay sa isa ka pagtinguha nga bank holdup sa Paranaque antes siya madakpan sadtong 1991.

Ang amo sining mga operasyon ang una niya ginsabwag sa Davao City tubtub nangin "killing capital" ini sadtong temprano nga bahin sang dekada 1980. Labi pa niya ini ginpadaku kag gindala sa pungsodnon nga sakup. Umpisa 1989 tubtub madakpan siya sadtong 1991, ang yunit sa espesyal nga operasyon nga direkta niya ginapamunuan wala sang iban nga ginaobra kundi mga kriminal nga operasyong gangster. Halin sa mga ini, nagkita sila sang milyun-milyong piso, nga ginalikum nila sa Partido kag inangkon nga kaugalingon.

Ang kriminal nga gang ni Kintanar ang responsible sa mga pinakadalagku nga kaso sang pagpangidnap sadtong dekada 1980. Sila ang responsable sa pagkidnap sa negosyante nga Hapon nga si Noboyuki Wakaoji sadtong 1986 kon sa diin $10 milyones ang ransom nga nakuha nila.

Sadtong 1989, kahimbon ang sekretaryo sang Visayas Commission sang PKP sadto nga si Arturo Tabara, ginpamunuan man ni Kintanar ang pagkidnap sa Iloilo City kay Roger Florete, tag-iya kag presidente sang Bombo Radyo-Philippines. Nakakuha sila diri sang P15 milyones.

Ang amo nga kriminal nga aktibidades ni Kintanar wala awtorisasyon sang sentral nga nagapamuno nga organo sang Partido. Maathag kay Kintanar kag sa mga kahimbon niya nga ang mga amo sining buhat lapas sa mga polisiya kag pagsulundan sang Partido kag BHB gani hungod nga ginlikum nila ang mga ini.

Pagkatapos mahilway sadtong 1992, ginkasangkapan niya ang daan niya nga pusisyon kag ginmanduan ang isa ka grupo sang daan niya nga tinawo agud magpadayon sa hilikuton gangster nga wala sang anuman nga awtorisasyon sa Partido kag BHB kag sa pihak sang kampanya sang sentral nga nagapamuno nga organo batuk sa gangsterismo.

2) Daku nga kaso sang pagpangawat sa sulod sang Partido. Direkta nga nagkawat si Kintanar sang dalagku nga kantidad halin sa pondo sang rebolusyonaryong hublag. Isa sa pinakamatingkad diri ang nausisaan sadtong 1991, kon sa diin personal niya ginkuha kag ginpatago ang P30 milyones nga siya lang ang nakahibalo kon sa diin. Ang impormasyon nahanungod diri nahibal-an lamang sang sentro sang Partido sang direkta nagreport ang ginapamunuan niya nga yunit pagkatapos siya maaresto sadtong Agosto 1991. Maluwas diri, may iba pa nga dalagku nga kantidad nga wala niya ginapaidalum sa kolektibo nga superbisyon, wala sang maathag nga pagkwenta kag ginabalibaran nga mausisa. Antes nangin direkta ang pagtraidor niya sa Partido, ginkuripon niya ang tanan nga account nga nahibal-an niya mga pondo sang Partido.

3) Pagtinguha nga pihak-pihakon kag pagpangguba sa Partido kag rebolusyonaryong hublag. Si Kintanar ang isa sa mga pinakamasupog nga tagpamuno sang pagpaksyon sadtong una kag sang ulihi direktang pagtinguha nga gub-on na ang Partido kag rebolusyonaryong hublag. Gin-angkon niya ang awtoridad para iduso ang todo nga kampanya anti-Partido umpisa Septyembre 1992. Gintiplang kag ginbuyok niya agud mag-alsa kag magsipak ang pila ka kadre kag katapu sang Partido kag pila ka kumander, hangaway kag yunit sang BHB. Gin-ayunan kag gin-engganyo niya ang pagsipak sa Partido kag pagtukod sang RPA sadto nanday Felimon Lagman kag Arturo Tabara. Wala siya sa pormal nga pamunuan sang RPA, pero nagaserbi siya nga adbayser nanday Tabara kag Carapali Lualhati sa mga polisiya sang RPA, tubtub sa nag-abot ini sa ila pormal nga pagsurender sa gubyerno kag direktang pagbuligay sa mga operasyon militar batuk sa rebolusyonaryong hublag.

4) Umpisa nga ginsipa sa Partido, labing nagbwelo si Kintanar sa mga hilikuton kriminal kag kontra-rebolusyonaryo. Nakighimbunanay siya sa AFP kag PNP batuk sa Partido kag rebolusyonaryong hublag kag nagumon sa mga operasyon sang mga kriminal nga sindikato, nadalahig sa korapsyon sa burukrasya, nagserbi nga gun-for-hire para sa mga reaksyunaryong pulitiko kag iban pa nga may gusto ipapatay.

Gingamit niya ang daan nga pusisyon kag internal nga ihibalo sa rebolusyonaryong hublag agud magsuporta sa operasyon nga "counter-insurgency" sang gubyerno. Nagserbi siya nga security consultant ni Gen. Alexander Aguirre nga national security adviser ni Estrada. Antes siya silutan, ang matuod nga trabaho niya - suno man mismo sa isa ka mataas nga upisyal sang Malacanang amo ang consultant sang AFP at PNP, pero para sa sweldo kag prente niya, ginapagguwa nga siya security consultant sa Bureau of Immigration and Deportation kag sa National Electrication Administration. Direkta nga nakighimbon siya sa ISAFP sa idalum ni Col. Victor Corpus sa pagplano kag pagpatuman sang mga operasyon pagpaniktik kag kampanya nga psy-ops, pagpanabotahe, pagpanalakay kag plano nga pagpangguba sa mga yunit kag sonang gerilya sang BHB.

Si Kintanar mismo ang project officer sang isa ka grupo nga gintukod sadtong Mayo 2000 kag ginpadala sa The Netherlands agud magpatuman sang asasinasyon kay Kaupod Jose Maria Sison. Pero nabudlayan sila, nagkinagamu kag napilitan nga bumalik ang grupo. Pamatuod ini kon sa diin kutob nag-abot si Kintanar sa pagpakighimbunanay sa iya mga katrabaho nga upisyal militar kag mga burukrata para sa mapintas nga pagbatu sa rebolusyon.

Mangin si Philip Medel isa sa mga bayaran nga manugpatay-tawo nga ara sa pagtatap ni Kintanar kag sang tiyo niya nga si anay ISAFP Chief Galileo Kintanar. Nagamentenar sila sang nanari-saring safehouse para sa mga kriminal nga nagapakigtransaksyon kanday Medel kag iban pa nila nga gun-for-hire. Ginapagguwa na lamang ni Romulo Kintanar nga nagkumpisar si Medel sa iya angot sa pagkapatay kay Nida Blanca.

Lubos na gid ang paghimbunanay ni Kintanar sa militar kag pulis gani indi katingalahan ginatrato siya nga VIP sang AFP kag PNP. Sa kamatuoran, nangin special guest pa si Kintanar nanday PNP Director General Hermogenes Ebdane Jr, luwas pa kay Arturo Tabara sang RPA-ABB, sining ulihi nga anibersaryo sang National Capital Region Police Office.

Bisan may kaangtanan sa mga kaso kriminal niya, ginapain pa naton ang pagdala niya sang anti-Partido kag kontra-rebolusyonaryong linya sa mga halambalanon sa ideolohiya, pulitika, organisasyon kag militar. Kalakip siya sa mga tagpamuno sa linya sang adbenturismo militar, wala-sa-panahon nga insureksyunismong urban kag iban pang seryosong kasaypanan nga nagbunga sang dalagku nga halit sa Partido kag rebolusyonaryong hublag.

Imbolbado man siya pagbalay kag pagpatuman sang desisyon nga nagpaumpisa sa pag-aresto, tortyur kag pagpatay sa mga ginasuspetsahan nga deep penetration agent (DPA) sa Mindanao sadtong 1984. Ini man ang nagtuga sang klima kag moda sang sumunod nga Kampanyang Ahos. Nakighimbunanay siya sa iban pa nga elemento sa pagtago sa ika-9 nga Plenum sang Komite Sentral sadtong 1985 sang impormasyon sa nagasagana na nga maduguong witchhunt kag malala nga kahalitan nga ginbunga sini kon ngaa wala gilayon ini matapna kag matadlong sang sentro sang Partido.

Sa pihak sa pag-angkon niya sang mayor nga salabton sa dalagku nga kasaypanan nga nagtuga sang dalagku nga kapaslawan kag pag-atras sang Partido, BHB kag rebolusyonaryong hublag, kag sa pihak sang indi niya pagbaton sang responsibilidad diri, indi lamang gintalikdan niya ang hublag, kundi nagpadayon siya sa pag-insister sang mga kasaypanan kag sa pagtraidor kag pagbatu sa Partido kag sa rebolusyon.

Agud tadlungon ang pagtiko sang Malacanang kag militar, gusto ko tumuron nga ang pinakamabug-at nga silut ginareserba lamang sang rebolusynaryong hublag sa mga tawo nga wala-duda napamatud-an may mabug-at nga krimen batuk sa pumuluyo kag rebolusyonaryong hublag pareho sang indi matarung nga pagpatay kag paghimo sang kidnap for ransom.

Gusto ko man athagon nga wala ginakabig nga krimen nga ginasilutan sang kamatayon ang paghalin sa Partido ukon pagguwa sa rebolusyonaryong hublag, ukon ang simple nga pagdala sang sala nga linya ukon ang paghambal batuk sa Partido.

Boluntaryo ang pagsulod sa Partido, BHB kag rebolusyonaryong hublag kag hilway man nga magguwa ang sin-o man ang indi na magpati diri ukon indi na makasarang magpatuman sang mga hilikuton ukon magpas-an sang mga sakripisyo kaangot sa pagrebolsuyon. Ang sala nga linya ginatadlong paagi sa kampanya sa pagtuon. Ang mga atake sa pulitika kag propaganda ginabatuan sa patag man sang pulitika kag propaganda kag indi ginapaagi sa kalakasan. Kaangot sini, isa ka daku nga kabutigan ang ginahambal sang Malacanang nga may listahan kuno sang mga "target" sang BHB kalakip si Presidential Chief of Staff Rigoberto Tiglao.

Sa kamatuoran, ang mga halambalanon sa ideolohiya, pulitika kag organisasyon sang Partido kag rebolusyonaryong hublag nalubad na sa kadam-an sa paagi sang madinalg-on nga pagsikway kag pagpanadlong sang Partido kag BHB sa mga militarista kag insureksyunista nga linya nga ginpalapnag ni Kintanar, amo sa pagguwa niya sa Partido kag BHB sadtong 1992 agud todo nga mangampanya sa guwa sang hublag batuk sa BHB kag rebolusyon. Ang mga kadalag-an sang rebolusyonaryong hublagan sa armadong paghimakas, paghiliugyong prente, pagtukod sang baseng masa kag pagsulong sang mga pangmasang paghimakas ilabi na sining ulihi nga tatlo ka tuig ang nagapamatuod sa kadalag-an sang kahublagan sa pagpanadlong nga ginlunsar sang Partido humalin 1992 tubtub 1998.

Ginahatagan silut nga kamatayon si Kintanar indi bangud sa pagdala niya sang sala nga linya pang-ideolohiya, pangpulitika kag pang-organisasyon kundi bangud sa iya mabug-at nga salabton kriminal sa rebolusyonaryong hublag kag pumuluyo.

Gani kahalam-utan ang ginapagguwa subong ni Macapagal-Arroyo, sang AFP, PNP kag mga kahimbon ni Kintanar kag kapareho niya nga traidor kag kriminal, nga siya isa ka "good citizen" kag nagasakdag sang kalinungan. Isa ka bagay ang maghambal lang sa kakinahanglanon sang kalinungan. Iban pa nga bagay ang aktwal nga pag-entra sa hilikuton kontra-rebolusyon kag paglunsar sang mga armadong proyekto batuk sa rebolusyonaryong kahublagan kag mga personahe sini. Indi mahimo matabo nga ang isa ka may pinakamadalom nga partisipasyon sa mga kriminal nga sindikato, kampanya kontra-rebolusyon kag kontra-pumuluyo sang militar kag operasyon nga gun-for-hire maayo nga tawo kag nagahandum sang tunay nga kalinungan kag katarungan para sa pumuluyo. ###

Back to top