Rumbeng laeng a madusa ni Romulo Kintanar

Gregorio "Ka Roger" Rosal
Spokesperson
Communist Party of the Philippines
Enero 26, 2003

Agtutuon dagiti kriminal a nagbasolan ni Romulo Kintanar laban iti rebolusyonaryo a tignayan ken umili.

Nangrugi a todo a naglarga dagiti kriminal nga aktibidad ni Kintanar idi 1984 idiay Davao, lallalo nga immadu iti naudi a paset ti dekada 1980 ken pinakaro na pay idi naikkat iti Partido idi 1992 ken naan-anay a timmipon kadagiti kriminal a sindikato iti uneg ken ruar ti militar. Rumbeng laeng a gibusan ti bulok, kriminal ken kontra-rebolusyonaryo ken nadara a rekord na.

Naidarum iti nadadagsen a krimen a kriminal iti korte ti umili idi 1993, awanan duadua a napaneknekan a nagbasol ken nasentensyaan ti korte ti umili ti kadadagsenan a pannusa.

Nabayagen nga adda order iti NPA nga arestoen isuna ken isango iti korte ti umili. Ngem nabayag nga aglemlemmeng ken agar-aramid pay ketdi kadagiti addang a kontra tapno maliklikan ti panangsango kadagiti kriminal a responsibilidad na.

Ti pannakaipatungpal ti dusa kenkuana ket naimballigian a naiyaramid idi Enero 23, 2003 babaen ti espesyal a yunit ti Baro a Buyot ti Umili. Paset daytoy ti natibker a determinasyon ti Partido ken ti NPA a pagbayaden iti rebolusyonaryo a hustisya dagiti addaan nadadagsen a krimen laban iti rebolusyon ken umili, uray no dagiti mairaman ket dagiti agdama wenno dati a lider ti Partido ken NPA, wenno dagiti dadakkel a reaksyunaryo nga addaan kuarta wenno poder.

Ti panangipataw ti NPA ti kadadagsenan a dusa ket mairesreserba laeng kadagiti tao nga awanan duadua a napaneknekan a nagaramid ti narurungsot a krimen. Maibilang ditoy ni Kintanar. Dagiti sumaganad ket sumagmamao laeng iti kadadakkelan a kriminal a krimen na uray idi agpampammarang iti uneg ti Partido ken NPA ken lallalo idi direkta a nagtraydor iti rebolusyonaryo a tignayan:

1) Iligal a panagabuso ti awtoridad na iti uneg ti Partido ken NPA iti panangidaulo, panangiwayat ken panangisaknap kadagiti operasyon a gangster. Dagiti binukel wenno indauluan na a grupo para iti "espesyal nga operasyon" ti nangipatungpal ti kidnapping for ransom, holdup kadagiti bangko ken dadduma pay a negosyo, panagpeke ti dolyar ken dadduma pay a klase ti krimen ken kinaruker. Inusar na dagiti natakaw na kadagitoy para iti personal a pagnam-ayan ken nabarayuboy ken bulok a panagbiag da nga agkakabunggoy. Ginuyod na iti korapsyon ken kinabulok dagiti yunit ti partisano iti syudad nga idadauluan na. Nagrekrut kadagiti barrairong ken nakikumplot kadagiti kriminal a sindikato, dagiti puersa a militar ken pulis, ken dagiti bulok nga elemento nga iti kamaudian ket kadua na a nagtraydor ken naikkat iti Partido ken NPA. Sumagmamano kadagiti inaramat na nga operatiba ti natay iti maysa a ranta a bank holdup iti Para�aque sakbay a natiliw daytoy idi 1991.

Dagitoy nga operasyon ken immuna nga inaramid na idiay Davao City inggana a nagbalin a "killing capital" daytoy idi nasapa a paset ti dekada 1980. Lallalo na pay a pinadakkel ken impakat iti nasyunal a saklaw. Manipud 1989 inggana idi matiliw idi 1991, ti yunit ti espesyal nga operasyon a direkta nga indauluan na ket awanan sabali nga inaramid no di dagiti kriminal nga operasyon a gangster. Manipud kadagitoy, naggamrud da ti milyon-milyon a piso a binukodan da ken inlimed iti Partido.

Dagiti kriminal a gang ni Kintanar ti responsable kadagiti dadakkel a kaso ti panagkidnap idi dekada 1980. Isuda ti responsable iti panagkidnap iti negosyante a Hapon a ni Noboyuki Wakaoji idi 1986 no sadino ket $10 milyon ti ransom a naala da.

Idi 1989, kakumplot ti sekretaryo ti Visayas Commission ti PKP idi a ni Arturo Tabara, indauluan met ni Kintanar ti panagkidnap idiay Iloilo City kenni Roger Florete, akinkukua ken presidente ti Bombo Radyo-Philippines. Nakaala da ditoy ti P15 milyon.

Dagitoy a kriminal nga aktibidad ni Kintanar ket awan awtorisasyon ti sentral a dadaulo nga organo ti Partido. Nalawag kenni Kintanar ken kadagiti kakumplot na a dagitoy nga aktibidad ket maisupiat kadagiti patakaran ken annuroten ti Partido ken NPA isu a naigagara nga inlimed da dagitoy.

Kalpasan a nawayaan idi 1992, inaramat na ti dati a posisyon ken minandaran na ti maysa a grupo dagiti dati a tao na tapno agtuloy iti aramid a gangster nga awan aniaman nga awtorisasyon iti Partido ken NPA ken iti sango ti kampanya ti sentral a dadaulo nga organo laban iti gangsterismo.

2) Dadakkel a kaso ti panagtakaw iti uneg ti Partido. Direkta a nagtakaw ni Kintanar ti dadakkel a gatad manipud iti pondo ti rebolusyonaryo a tignayan. Maysa iti kadadakkelan ket naduktalan idi 1991, no sadino a personal nga innala ken inlemmeng na ti P30 milyon nga isuna laeng ti makaammo no sadino. Daytoy nga impormasyon ket naammoan laengen ti sentro ti Partido idi direkta a nag-ulat ti idadauluan na a yunit kalpasan a naaresto isuna idi Agosto 1991. Malaksid ditoy, adu pay dagiti dadakkel a gatad a saan na nga impauneg iti kolektibo a superbisyon, awan nalawag nga awdit ken agkitakit a maimbestiga. Sakbay a direkta a nagtraydor iti Partido, innala na met ti amin nga account nga ammo na a nakaikabilan dagiti pondo ti Partido.

3) Ranta a pananggudua ken panangdadael iti Partido ken rebolusyonaryo a tignayan. Ni Kintanar ket maysa kadagiti napeklan unay a nangidaulo ti panagpaksyon idi umuna ken ranta a direkta a mangdadael iti Partido ken rebolusyonaryo a tignayan idi kamaudian. Tinagikua na ti awtoridad tapno iduron ti todo-todo a kampanya nga anti-Partido manipud Septembre 1992. Inallilaw ken sinugsugan na nga agalsa ken sumina ti sumagmamano a kadre ken kameng ti Partido ken sumagmamano a kumander, mannakigubat ken yunit ti NPA. Inayunan ken inengganyo na ti pannakisina iti Partido ken panangbukel ti RPA da Filemon Lagman ken Arturo Tabara. Awan isuna iti pormal a liderato ti RPA, ngem agserserbi kas adbayser da Tabara ken Carapali Lualhati kadagiti patakaran ti RPA, inggana pormal a panagsurender da iti gubyerno ken direkta a panagtulong kadagiti operasyon militar laban iti rebolusyonaryo a tignayan.

4) Manipud idi naikkat iti Partido, lallalo a nagbuelo ni Kintanar kadagiti aramid a kriminal ken kontra rebolusyonaryo. Nakikumplot isuna iti AFP ken PNP laban iti Partido ken rebolusyonaryo a tignayan ken naigamer kadagiti operasyon dagiti kriminal a sindikato, nairaman iti korapsyon iti burukrasya, nagserbi a gun-for-hire para kadagiti reaksyunaryo a pulitiko ken dadduma pay nga adda kayat da nga ipapatay.

Inusar na ti dati a saad ken kaammoan nga internal iti rebolusyonaryo a tignayan tapno sumuporta iti operasyon a "counter-insurgency" ti gubyerno. Nagserbi isu a security consultant ni Gen. Alexander Aguirre a national security adviser ni Estrada. Sakbay a nadusa, ti pudno a trabaho na - segun mismo iti maysa a nangato nga opisyal ti Malakanyang - ket consultant ti AFP ken PNP, ngem para iti sueldo ken prente na, maparparuar a security consultant isuna ti Bureau of Immigration and Deportation ken iti National Electrification Administration. Direkta a nakikumplot iti ISAFP babaen kenni Col. Victor Corpus iti panagplano ken panangipatungpal kadagiti operasyon a paniktik ken kampanya ti psy-ops, sabotahe, panangasak ken ranta a panangdadael kadagiti yunit ken sona a gerilya ti NPA.

Ni Kintanar mismo ti project officer ti maysa a grupo a nabukel idi Mayo 2000 ken naipatulod iti The Netherlands tapno ipatungpal ti asasinasyon kenni Kadua Jose Maria Sison. Ngem narigatan, nagkagulo ken napilitan nga agsubli ti grupo. Pammaneknek daytoy iti tinurong ni Kintanar iti pannakikumplot kadagiti kaasideg na nga opisyal militar ken dagiti burukrata para iti naranggas a panaglaban iti rebolusyon.

Uray ni Philip Medel ket maysa kadagiti mabayadan a mamapatay-tao nga adda iti panangtariparo ni Kintanar ken ti uliteg na a ni dati nga ISAFP Chief Gen. Galileo Kintanar. Nagmantine da ti agsasabali a safehouse para kadagiti kriminal a transaksyon kenni Medel ken dadduma pay a gun-for-hire. Parparuaren laengen ni Romulo Kintanar a nagkumpisar ni Medel kaniana mainaig ti panangpatay kenni Nida Blanca.

Naan-anay ti pannakikumplot ni Kintanar iti militar ken pulis isu a saan a nakakaskasdaaw a matrato kas VIP ti AFP ken PNP. Kinapudno, nagbalin a special guest da PNP Director General Hermogenes Ebdane Jr. ni Kintanar malaksid kenni Arturo Tabara ti RPA-ABB itay naudi nga anibersaryo ti National Capital Region Police Office.

Uray no adda pakainaigan dagiti kaso na a kriminal, ilasin tayo pay ti panagiggem na ti anti-Partido a kontra-rebolusyonaryo a linya kadagiti usapin iti ideolohiya, pulitika, organisasyon ken militar. Maibilang isuna kadagiti nangidaulo iti linya nga adbenturismo militar, adelantado nga insureksyunismo iti syudad ken dadduma pay a seryoso a kamali a nangted ti dadakkel a dangran iti Partido ken rebolusyonaryo a tignayan.

Kakumplot met isuna iti panagbalangkas ken panangipatungpal ti desisyon a nangirugi ti panagaresto, tortyur ken panangpatay kadagiti masuspetsa a deep penetration agent (DPA) iti Mindanao idi 1984. Daytoy ti nangpartuat ti klima ken moda ti sumaruno a Kampanya Ahos. Nakikumplot isuna iti dadduma pay nga elemento iti panangilemmeng iti maika-9 Plenum ti Komite Sentral idi 1985 iti impormasyon maipapan iti agsaksaknap a nadara a witchhunt ken manangperdi a dangran a resulta daytoy isu a saan a dagus a napasardeng ken nailinteg ti sentro ti Partido daytoy.

Iti laksid dagiti dadakkel a sungsungbatan na a dadakkel a kamali a nangted ti nadadagsen a pannakapaay ken panagatras ti Partido, NPA ken rebolusyonaryo a tignayan, ken iti bangir ti saan na a panangawat ti responsibilidad ditoy, saan na laeng a tinallikudan ti tignayan, ngem nagtuloy iti panangiyaramid kadagiti kamali ken iti panagtraydor ken panaglaban iti Partido ken iti rebolusyon.

Tapno ilinteg ti panangkillo ti Malakanyang ken militar, kayat ko nga iyunay-unay a ti kadadagsenan a dusa ket iresreserba laeng ti rebolusyonaryo a tignayan kadagiti tao nga awanan duadua a napaneknekan nga addaan nadadagsen ken narurungsot a krimen laban iti umili ken rebolusyonaryo a tignayan kas iti saan a nainkalintegan a panangpatay ken panangiyaramid ti kidnap for ransom.

Kayat ko met nga ilawlawag a saan a maibilang a krimen a madusa ti patay ti panagresayn iti Partido wenno panaglusulos iti rebolusyonaryo a tignayan, wenno ti simple a panagiggem ti kamali a linya wenno ti panagsarita laban iti Partido.

Boluntaryo ti iseserrek iti Partido, NPA ken rebolusyonaryo a tignayan ken nawaya met a rumuar ti siasinoman a saanen nga umannugot ditoy wenno saannan a kaya ti mangipatungpal kadagiti trabaho wenno mangbaklay kadagiti sakripisyo a mainaig iti panagrebolusyon. Ti kamali a linya ket mailinteg babaen iti kampanya ti panagadal. Dagiti atake iti pulitika ken propaganda ket marisiris iti larangan ti pulitika ken propaganda ken saan a maidalan iti ranggas. Mainaig ditoy, maysa a dakkel a kinaulbod ti ibagbaga ti Malakanyang nga adda listaan kano dagiti "target" ti NPA kas kada Presidential Chief-of-Staff Rigoberto Tiglao.

Ti pudno, dagiti usapin iti ideolohiya, pulitika ken organisasyon ti Partido ken rebolusyonaryo a tignayan ket narisuten iti kabuklan babaen iti naimballigian a panangilaksid ken panagilinteg ti Partido ken NPA kadagiti militarista ken insureksyunista a linya nga inwaras da Kintanar, kasta met iti panagruar na iti Partido ken NPA idi 1992 tapno todo-todo nga agkampanya iti ruar ti tignayan laban iti NPA ken rebolusyon. Dagiti balligi ti rebolusyonaryo a tignayan iti armado a dangadang, nagkaykaysa a prente, panangbukel ti base a masa ken pangiyabante kadagiti dangadang a masa aglalo itay naudi a tallo a tawen ti mangpaneknek iti balligi ti tignayan ti panagilinteg nga insayangkat ti Partido manipud 1992 inggana 1998.

Napatawan ti dusa a patay ni Kintanar saan a gapu iti panagiggem na iti kamali a linya a pang-ideolohiya, pulitikal ken pang-organisasyon no di gapu iti nadadagsen a krimen na a kriminal iti rebolusyonaryo a tignayan ken iti umili.

Isu a nakakatkatawa ti parparuaren itatta ni Macapagal-Arroyo, ti AFP, PNP ken dagiti kakumplot ni Kintanar ken kapareho na a traydor ken kriminal, nga isuna ket maysa a "good citizen" ken mangitantandudo ti kappia. Sabali a banag ti agsarita laengen maipapan iti pakasapulan ti kappia. Sabali pay a banag ti aktwal a pannakairaman iti aramid a kontra-rebolusyon ken panangisayangkat kadagiti armado a proyekto laban iti rebolusyonaryo a tignayan ken kadagiti personahe daytoy. Saan a pudno a ti maysa a tao nga addaan nauneg a pannakairaman kadagiti kriminal a sindikato, kampanya a kontra-rebolusyonaryo ken anti-umili ti militar ken operasyon a gun-for-hire ket nasayaat a tao ken agpangpanggep ti pudno a kappia ken hustisya para iti sangapagilian.

Back to top