An rehimen Macapagal-Arroyo na mismo an nagtanggal han kundisyon para ha ceasefire yana nga Kapaskuhan

Gregorio "Ka Roger" Rosal
Spokesperson
Communist Party of the Philippines
Disyembre 04, 2002

Ha masunod nga adlaw, ig-aanunsyo han pamunuan han Partido Komunista han Pilipinas an desisyon hini hiunong ha karukayaknon han unilateral nga pagdedeklarar hin ceasefire yana nga Kapaskuhan.

Sugad ha mga naglabay nga tuig, seryuso nga ginhuhunahuna han Partido Komunista han Pilipinas an posibilidad han pagdedeklarar hin ceasefire ha panahon han Kapaskuhan. Ha naglabay, nagdedeklarar an PKP hin ceasefire agud tagan-dalan an pagselebrar han katawhan ha Kapaskuhan ngan komo pagsuporta ha erestorya pankamurayawan.

Pero ha yana waray hunong hi Macapagal-Arroyo ha pan-gegerra kontra ha katawhan grabe nga pagpapakatuta ngan pagtulapos ha soberanya han nasud ngan interes han katawhan. Waray bisan ano nga interes an rehimen nga maghatag-dalan ha murayaw nga pagsalin-urog han Kapaskuhan. An karuyag la hini an umatake ngan umatake, pasko man o diri pasko.

Gin-aatake hini an soberanya han nasud. Matapos pirmahan hini an Mutual Logistics Support Agreement (MLSA), gin-aandam na ni Macapagal-Arroyo an pagsakob han mas damo pa nga tropa nga Amerikano ha syahan nga bahin han masunod nga tuig. Mayda larang nga iduon ini nga mga tropa nga Amerikano kontra ha rebolusyonaryo nga kagiusan.

Waray utod nga pan-aatake militar. Basar ha mga impormasyon nga natirok namon tikang ha sakob han militar, pahimulsan han AFP an posibilidad nga magdeklarar an PKP hin ceasefire agud magdeploy hin mas damo nga mga pwersa nga paniktik ngan mas dagko nga pwersa ha mga ginkikilala nira nga mga lugar nga makusog an rebolusyonaryo nga kagiusan. Igpapadayon an sugad nga mga plano sidngon man nga poyde pa nga magdeklarar hin "suspension of offensive military operations" an pamunuan han AFP ngan PNP.

Tinuyo nga gintanggal ni Macapagal-Arroyo an kundisyon agud murayaw nga igsalin-urog han katawhan an Kapaskuhan ngan agud magkamay-ada hin mahinungdanon nga ceasefire. Waray man la ini iginpapakita nga guti nga maupay nga kaburut-on agud tagan-dalan an pagdedeklarar hin ceasefire bisan man la yana nga Kapaskuhan. Ginhimo hini nga makuri para ha PKP nga magdesisyon para ha pagdedeklarar hin ceasefire yana nga Kapaskuhan.###

Back to top