SUPAKON UG BATUKAN ANG MUTUAL LOGISTICS SUPPORT AGREEMENT UG MAKMAKON ANG TRINAYDOR NGA PAGLAGDA NIINI

Gregorio "Ka Roger" Rosal
Spokesperson
Communist Party of the Philippines
Nobyembre 22, 2002

Kusganong gipanghimaraot sa Partido Komunista sa Pilipinas ug sa tibuok rebolusyonaryong kalihukan ang trinaydor nga paglagda sa papet nga gobernong Macapagal-Arroyo ug sa representante sa imperyalismong US aron mapinalisa ang Mutual Logistics Support Agreement (MLSA). Gipilit sa itoy nga rehimen nga ipayuhot ang pagpalig-on sa MLSA pinaagi sa pag-aprubar niini isip usa ka executive agreement lamang inay nga usa ka hingpit nga tratado.

Nasayra'g maayo sa itoy nga goberno nga grabi ang pagsupak niini sa katawhan, busa giipsutan nga masang-at kini sa debate sa senado ug publiko, nga hingpit magbutyag sa tinuod nga katuyuan, gi-unod ug implikasyon niining kasabutana alang sa kinatibuk-ang kabulahanan ug kaugmaon sa nasud.

Ang mga misupak sa MLSA gisulayan karon nga linglahon sa mga periko sa itoy nga rehimen sa pag-ingon nga gitangtang na sa kasabutan ang pagtunhay sa permanenteng base sa US sa Pilipinas ug kinahanglan kuno nga adunay pag-uyon ang nasud sa unsamang mamahimong paggamit sa US sa mga pwersang militar niining mupundo sa Pilipinas. Kining tanan pagpanglinla. Pinaagi sa pagdugang karon sa MLSA sa nagtunhay nang Visiting Forces Agreement, labaw'ng tin-aw nga ang tibuok nasud nga Pilipinas himuon nang base militar sa US.

Ang pagpayuhot sa MLSA, binut� ug maulipnong pagkuyug-baboy sa itoy nga goberno sa agalon ug gipakadiyos-diyos niining imperyalismong US. Tinguha sa nag-unang papet nga si Macapagal-Arroyo nga mutuman sa matag diktar ug pagbuot sa iyang agalon ug mahimong nag-una ug kinaham nga papet sa US sa Asia. Hungog siyang nagtuo nga masuportahan pa sa unsamang gilauman niyang hinabang sa US ang padayon ug paspas nga pagkabangkrap sa iyang goberno ug labaw'ng nagakahugno nga paglaum niyang magpabilin sa gahum lapaw sa 2004.

Taliwala sa paglagda sa MLSA isip usa ka executive agreement, gihagit sa Partido Komunista sa Pilipinas ang nagkalain-laing organisasyon, indibidwal ug uban pang mga sektor nga adunay pagtuo ug kahingawa sa soberenya ug nasudnong integridad sa Pilipinas nga labaw pang dugangan ang pagsupak ug pakigbatok sa trinaydor nga pamaagi sa pagpinalisa niini ug sa nagbung-aw nga agresyong militar sa tropa sa imperyalismong US nga gipasiugda niini. ###

Back to top