Pamatukan kag batuan ang Mutual Logistics Support Agreement kag pakamalauton ang maluibon nga pagpirma sini

Gregorio "Ka Roger" Rosal
Spokesperson
Communist Party of the Philippines
Nobyembre 22, 2002

Mabaskog nga ginakundenar sang Partido Komunista ng Pilipinas kag sang bilog nga rebolusyonaryong kahublagan ang maluibon nga pagpirmahanay sang papet nga gubyernong Macapagal-Arroyo kag sang tiglawas sang imperyalismong US agud pinalisahon ang Mutual Logistics Support Agreement. Ginpilit sang papet nga rehimen nga palusuton ang pagratipika sang MLSA paagi sa pag-aprubar sini bilang isa ka executive agreement lang tigaylo nga isa ka lubos nga tratado.

Nahibal-an gid sang papet nga gubyerno nga mabaskog ang pagbatu sang pumuluyo diri, gani ginlikawan nga mabutang ang MLSA sa debate sa senado kag publiko, nga magabuyagyag sang husto sa mga matuod nga katuyuan, kaundan kag implikasyon sang kasugtanan nga ini sa kabilugan nga interes kag palaabuton sang pungsod.

Ang mga nagapamatuk sa MLSA ginatinguhaan subong nga tiplangon sang mga propagandista sang papet nga rehimen sa pagsiling nga ginkuha na sa kasugtanan ang pagbutang sang permanente nga base militar sang US sa Pilipinas kag kinahanglan kuno nga aprubaran sang pungsod ang ano man nga pwede paggamit sang US sa mga pwersa sini nga maga-istasyon sa Pilipinas. Ang mga ini lunsay pagpaniplang. Paagi sa pagdugang subong sang MLSA sa nagaluntad na nga Visiting Forces Agreement, labing nagaathag nga ang bilog nga pungsod himuon nga base militar sang US.

Ang pagpalusot sang MLSA bulag kag daw ulipon nga pag-alagad sang papet nga gubyerno sa amo kag ginadiyos-diyos sining imperyalismong US. Gusto sang puno nga papet nga si Macapagal-Arroyo nga magsunod sa kada gusto kag dikta sang iya amo kag mangin pangunahon kag paboritong papet sang US sa Asia. Nagasalimuang siya sa pagpensar nga mabangilan pa sang ano man nga ginasaligan niya nga ayuda sang US ang dalayon kag madasig nga pagkabangkarote sang iya gubyerno kag labing nagakadulaan palaom niya nga magpabilin sa gahum lampas sa 2004.

Sa atubang sang paglagda sa MLSA bilang isa ka executive agreement, ginahangkat sang Partido Komunista ng Pilipinas ang nagkalain-lain nga mga organisasyon, indibidwal kag iban pa nga sektor nga nagatuo kag nagasakdag sa soberanya kag pungsudnon nga integridad sang Pilipinas nga labi pa nga pasanyugon ang pagpamatuk kag pagbatu sa maluibon nga pamaagi sang pagpinalisa sini kag sa nagahana nga agresyon militar sang tropa sang imperyalismong US nga ginatib-ong sini.###

Back to top