Tipahan ngan pakig-awayan an Mutual Logistics Support Agreement ngan turisukon an palusot nga pagpipirma hini

Gregorio "Ka Roger" Rosal
Spokesperson
Communist Party of the Philippines
Nobyembre 22, 2002

Bug-at nga ginkokondenar han Partido Komunista han Pilipinas ngan han bug-os nga rebolusyonaryo nga kagiusan an patraydor nga pakikipagpirma han papet nga gubyerno nga Macapagal-Arroyo ngan han tinaglawas han imperyalismo nga US agud mapinalisa an Mutual Logistics Support Agreement. Pinirit han papet nga rehimen nga ipalusot an pagpapadig-on han MLSA pinaagi han pag-aaprubar hini komo usa nga executive agreement la imbes nga usa nga hul-os nga tratado.

Maaram kaupay an papet nga gubyerno nga grabe an pagtipa han katawhan dinhi, sanglit ginlikyan nga maisalawad an MLSA ha debate ha senado ngan publiko, nga magbubuksas hin maupay ha mga tinuod nga katuyuanan, gin-uunod ngan implikasyon hini nga kasarabutan ha kabug-osan nga kaupayan ngan kabubwason han nasud.

Gin-aatentar yana nga mauwat an mga tinipa ha MLSA han mga paragtugaok han papet nga rehimen ha pagsering nga gintanggal na ha kasarabutan an pagkamay-ada hin permanente nga base han US ha Pilipinas ngan kinahanglan kuno nga mayda pag-abuyon an nasud ha anuman nga mahihimo nga paggamit han US ha mga pwersa militar hini nga nagkakampo ha Pilipinas. Ini ngatanan puros mga panguwat. Pinaagi han pagdugang yana han MLSA ha nag-iksister na nga Visiting Forces Agreement, labaw nga klaro nga an bug-os nga nasud Pilipinas in hihimuon na nga base militar han US.

An pagpapalusot han MLSA amo an pagbubutabutaan ngan kilos-uripon nga pagigin sunod-sunoran han papet nga gubyerno ha amo ngan gindidiyos hini nga imperyalismo nga US. Karuyag han puno nga papet nga hi Macapagal-Arroyo nga sumunod ha kada gusto ngan dikta han iya amo ngan magin nangunguna ngan paborito nga papet han US ha Asia. Tuyaw nga nakakasering hiya nga matukhan pa han anuman nga ginlalauman niya nga bulig han US an dirudiretso ngan dagmit nga nabangkarote nga gubyerno niya ngan labaw nga bumagsak nga paglaum niya nga magpabilin ha poder lahos ha 2004.

Atubangan han pagpirma ha MLSA komo usa nga executive agreement, gin-aayat han Partido Komunista han Pilipinas an iba-iba nga mga organisasyon, indibidwal ngan iba pa nga mga sektor nga natuod ngan nagpapakasakit ha soberanya ngan nasudnon nga integridad han nasud nga Pilipinas nga labaw pa nga padurohon an pagtipa ngan pag-ato ha patraydor nga pamaagi han pagpinalisa hini ngan ha tarhug han agresyon militar han tropa han imperyalismo nga US nga gin-uundong hini.###

Back to top