Pagsurender sa 150 ka NPA sa Rizal, usa ka dakong mini nga photo-ops ni Gloria Macapagal-Arroyo
Gregorio "Ka Roger" Rosal
Spokesperson
Communist Party of the Philippines
Nobyembre 17, 2002 Usa ka dakong kahungogan ug pagpanglinla ang photo-ops nga gihimo sa nag-unang itoy nga si Macapagal-Arroyo sa Rizal niadtong miaging adlaw. Sanglit nga ang nag-unang papet nga si Gloria Macapagal-Arroyo hilabihang kahakog sa publisidad, nagpagimik sila kuyog sa AFP ug PNP og pagpasurender kunohay sa 150 ka mga regular nga NPA sa Rizal. Inubanan pa og tri-media coverage ang gihimo nila ug gidugangan pa og pagpaaron-ingnong diskurso sa nag-unang papet.
Ang tinuod, pipila lamang sa 150 ka mga tawo nga gipagula nga mga nanurenderay'ng manggugubat sa NPA ang mga kanhing NPA-nga dugay nang mipahawa sa kalihukan. Sumala sa Narciso Antaso Aramil Command (NAAC) sa Rizal, ang pinakadaghan pa niining 150 kabuok, mga yanong lumulupyo nga gibayran o gipugos alang sa naingong "dakong gimik" sa mga buringog. Sila usab ang mga kanunay'ng gipwersa ug gibayran aron musalmut sa mga gilaraw nga "rali" nga gihimo sa mga militar ug kapulisan batok sa CPP-NPA-NDFP. Ang uban pa niini, wala man lang pahibaw-a nga ingon niini ang pasundayag. Ang mga nag-unang gipangmobilisa sa AFP ug PNP aron tapuon ang 150 ka tawo, gipanaaran sa militar nga ipagula isip mga rebel returnee aron mabahinan og pahat sa salaping gilaumang makuha sa pagtakuban ug pag-"surrender" isip mga NPA.
Kadto usab nga "Lorena," dili usa ka taas nga opisyal sa NPA sa Rizal sama sa gisalida sa AFP ug PNP. Siya si Rosalinda Cocoy, 23, minyo ug adunay usa ka anak ug nanimuyo sa Barangay Puray, Montalban, Rizal. Mikuyug siya sa NPA sulod sa duha ka bulan niadtong 1999 ug gipalugsong aron magpatambal sa balatian sa kasingkasing. Apan wala na siya mubalik, naminyo na ug namuyo sa ilang baryo.
Niining miaging Agosto 22, gidakop si Lorena sa militar dihang nagka-engkwentro ang NPA ug AFP sa ilahang baryo ug hangtud karon, dinakpan pa gihapon sa militar. Pugsanay siyang patudluon sa mga gikatahapang NPA ug baseng masa sa hukbo sa katawhan. Ug ang pinakangilngig, didto siya gipapuyo sa usa ka kampo sa San Isidro, Antipolo City ug gipuli-puliha'g gamit sa lain-laing mga opisyales sa militar. Ang makaluluoy'ng babayeng biktima sa daghan kaayo nga human rights violations sa militar, daklit nga nahimong min� nga NPA surrenderee.
Ingon niini ang tinuod nga mga panghitabo luyo sa daghang walay pulos nga photo ops ni Macapagal-Arroyo. Walay lain kundili ang katawhan ang gibiktima niining katampalasan sa rehimen.
Gihangyo namo ngadto sa tanan nga anaay kahingawa sa mga tawhanong katungod, nakigbisog alang sa kabulahanan sa kababayen-an ug nagpasiugda sa obhetibo, tinuod ug mapangahason nga pagtaho sa midya, nga susihon kining kasuha sa gross human rights violations, maghimo og kinahanglan nga mga lakang aron musangko kini sa kasayuran sa publiko ug mapangitaan og kasulbaran ug hustisya ang partikular nga kaso ni Lorena. Usa lamang kini sa kuyanap, sistematiko ug mangilngig nga mga paglapas sa rehimen sa mga tawhanong katungod ug sa International Humanitarian Law.###
Back to top
| 