PAGSURENDER SANG 150 NPA SA RIZAL, ISA KA ENGRANDENG PALTIK NGA PHOTO-OPS NI GLORIA MACAPAGAL-ARROYO

Gregorio "Ka Roger" Rosal
Spokesperson
Communist Party of the Philippines
Nobyembre 17, 2002

Isa ka daku nga kabuangan kag pagpaniplang ang photo-ops nga ginhiwat sang punong papet nga si Macapagal-Arroyo sa Rizal sadtong isa ka adlaw. Bangud ang puno nga papet nga si Gloria Macapagal-Arroyo sa putuk-putukan sang pagkadalok sa publisidad, naghimo sila sang AFP kag PNP sang kuno pagsurender sang 150 regular nga NPA sa Rizal. May tri-media coverage pa nga ginhimo kag gindugangan pa gid sang makatiliplang nga pamulong-pulong sang puno nga idu-ido.

Sa kamatuoran, pila lang sa 150 katawo nga ginpaggwa mga nag-ampo nga hangaway sang NPA ang mga daan nga NPA-nga madugay na nga naghalin sa hublag. Suno sa Narciso Antaso Aramil Command (NAAC)sang Rizal, ang pinakamadamu pa sa 150 nga ini mga ordinaryong pumuluyo nga ginbaydan ukon ginpwersa para masiling nga "engrandeng padihot" sang mga kulang-kulang. Sila man ang masami ginapilit kag ginabayaran agud magpasakup sa mga ginapadihot nga "rali" nga ginahiwat sang mga militar kag pulis batuk sa CPP-NPA-NDFP. Ang iban sa mga ini wala nakahibalo kon ano ang pagahiwaton nga palagwaon. Ang mga pangunahon nga tawo nga gingamit sang AFP kag PNP agud magmobilisa kag tipunon ang 150 katawo ginpromisaran sang militar nga paggwaon nga mga rebel returnees agud bahinan sang kwarta nga ginalauman makuha sa pagpakuno-kuno kag "pagsurrender" bilang mga NPA. Atong si "Lorena" naman indi siya isa ka mataas nga upisyal sang NPA sa Rizal, pareho sa ginapaggwa sang AFP kag PNP. Siya si Rosalinda Cocoy, 23 anyos, may asawa kag may isa ka anak, kag nagaestar sa Barangay Puray, Montalban, Rizal. Nag-upod sa NPA sa sulod sang duha ka bulan sadtong 1999 kag ginpapanaog agud magpabulong sang balatian sa kasingkasing. Pero wala na siya nagbalik, nag-asawa na kag nagpuyo sa ila baryo.

Sadtong nagligad nga Agosto 22, gindakop si Lorena sang militar sang mag-engkwentro ang NPA kag AFP sa ila baryo kag tubtub subong bihag gihapon sang militar. Pilit siya nga ginapatudlo sang mga ginadudahan nga NPA kag baseng masa sang hangaway sang banwa. Kag ang pinakamalaut, didto na siya ginpapuyo sa isa ka kampo sa San Isidro, Antipolo City kag gindulus-bulosan sang nagkalin-lain nga upisyales militar. Ang makaluluoy nga babayi nga biktima sang tuman kadamo nga human rights violations sang militar gulpe nangin paltik nga NPA surrenderee.

Amo ini ang matuod nga hitabo sa likod sang madamu nga hitu-hito nga photo-ops ni Macapagal-Arroyo. Wala sang iban kundi pumuluyo ang ginabiktima sang katampalasanan sang rehimen.

Ginapangayo namon sa tanan nga nagakabalaka sa tawhanon nga kinamatarung, mga nagasakdag sang kaayuhan sang kababainhan kag nagatib-ong sang obhetibo, matuod kag matutom nga pagbalita sang midya, nga usisaon ining kaso sang gross human rights violations, maghimo sang mga nagakaigo nga tikang agud makaabot ini sa atensyon sang publiko kag makapangita sang kalubaran kag hustisya ang partikular na kaso ni Lorena. Isa lang ini sa malaparan, sistematiko kag makahaladlok nga paglapas sang rehimen sa tawhanon nga kinamatarung kag International Humanitarian Law.###

Back to top