PAGSURENDER HAN 150 NPA HA RIZAL, USA NGA ENGRANDE NGA PEKE NGA PHOTO-OPS NI GLORIA MACAPAGAL-ARROYO

Gregorio "Ka Roger" Rosal
Spokesperson
Communist Party of the Philippines
Nobyembre 17, 2002

Usa nga dako nga kalurungan ngan panguwat an photo-ops nga ginhimo han puno nga papet nga hi Macapagal-Arroyo ha Rizal hadton una nga adlaw. Tungod kay an puno nga papet nga hi Gloria Macapagal-Arroyo duro nga kamasiba ha publisidad, nagdrama hira han AFP ngan PNP hiunong ha pagsurender daw han 150 regular nga NPA ha Rizal. Upod pa an todo tri-media coverage an ginhimo ngan gindugngan pa han ipokrito nga pamulong han puno nga papet.

An ungod, pipira la ha 150 katawo nga ginpagawas nga mga nagsurender nga mangaraway han NPA an mga anay NPA-nga maiha na nga ginawas ha kagiusan. Sigon ha Narciso Antaso Aramil Command (NAAC) han Rizal, an pinakadamo pa hini nga 150 mga ordinaryo nga mga tawo nga ginbaydan o ginpirit para ha nasering nga "engrande nga drama" hini nga mga magraut. Hira liwat an mga permihan nga ginpipirit ngan ginbabaydan para umupod ha mga ginlalarang nga "rali" nga ginhihimo han mga militar ngan pulis kontra ha CPP-NPA-NDFP. An iba hini nira waray masidngi nga sugad hini an hihimuon nga palabas. An mga prinsipal nga ginmobilisa han AFP ngan PNP para tirukon an 150 katawo ginsaaran han militar nga palutawon nga mga rebel returnees agud mapartehan han bahin han salapi nga ginlalauman nga makukuha ha pagpepeke nga NPA ngan "pagsurender" komo mga NPA.

Hadto naman nga "Lorena" diri usa nga hitaas nga upisyal han NPA ha Rizal, nga sugad han ginpapagawas han AFP ngan PNP. Hiya in hi Rosalinda Cocoy, 23, mayda asawa ngan usa nga anak ngan nag-ukoy ha Barangay Puray, Montalban, Rizal. Inupod hiya ha NPA sakob han duha nga bulan hadton 1999 ngan pinalusad para magpatambal han sakit ha kasingkasing. Pero waray na hiya bumalik, nag-asawa na ngan inukoy ha ira baryo.

Hiton naglabay nga Agosto 22, dinakop hi Lorena han militar han magkamay-ada hin agway giutan han NPA ngan AFP ha ira baryo ngan tubtob yana dinakop pa gihapon han militar. Pinirit hiya nga manudlok hin mga suspetsado nga NPA ngan baseng masa ha hukbong bayan. Ngan an pinakagrabe, didto na hiya pinaukoy ha ira kampo ha San Isidro, Antipolo City Ngan ginpipinasapasa ha iba-iba nga mga upisyal ngan militar. An kairo nga babaye nga biktima han makangingirhat nga human rights violations han militar in tigda nga nagin peke nga NPA surrenderee.

Sugad hini an tinuod nga panhitabo ha luyo han damo nga waray-data nga photo ops ni Macapagal-Arroyo. Waray iba kundi an katawhan an ginbibiktima han katampalasan han rehimen.

Ginpangaro namon ha ngatanan nga naugop ha tawhanon nga katungod, nakikigbisog para ha interes han kababayen-an ngan nag-uundong han obhetibo, tinuod ngan udhanon nga pagsusumat ha midya, nga imbestigahon ini nga kaso han gross human rights violations, nga maghimo han ginkikinahanglan nga mga pitad agud ini makaabot ha kahibaruan han publiko ngan mabilngan hin kasulbaran ngan katarungan an partikular nga pagtalapas han rehimen ha katungod-pantawo ngan International Humanitarian Law.###

Back to top