"Oplan Tumba"-usa na usab ka minugna-mugna sa mga tighimo og saywar sa itoy nga rehimeng Macapagal-Arroyo
Gregorio "Ka Roger" Rosal
Spokesperson
Communist Party of the Philippines
Nobyembre 12, 2002 Ang hungog nga gobernong itoy ni Macapagal-Arroyo ug mga tigmugna og saywar sa terorista ug mersenaryong AFP ug PNP, wala kahutdi og mga pantastikong kabakakan ug linubid nga mga bonbon alang lamang sa buang ug desperado nilang katuyuang mansahan ug ilarawang hilabihang kadautan ang CPP-NPA-NDFP ug hasion ang katawhan.
Adunay gipagula karon ang pundok nila Angelo Reyes, Roilo Golez ug Gen. Hermogenes Ebdane nga taas kaayong talaan sa mga likidahunon kunohay sa NPA. Nag-una kuno sa talaan ang magtiayong Gloria Macapagal ug Mike Arroyo ug gisundan sila sa pila pa nga mga prominenteng politiko, opisyales sa goberno, lakip ang mga membro sa kabinete, pipila ka senador ug kongresman.
Nag-inisog-isog, sa partikular, ang tigdumala sa saywar sa Malakanyang nga si Rigoberto Tiglao, nga buot usab patuohon ang iyang agalon ug ang kaugalingon nga epektibo kaayo ang iyang walay pulos nga mga pagpanaot ug gimmick. Gilubid ug gisabwag niya ang sugilanon nga likidahon na usab siya sa mga kanhi niyang kauban nga gitraydoran na niya. Lakip usab ang mga kauban namong mu-aplayay og amnesty likidahon na kuno usab sa NPA.
Kining mga likidasyona, pagpatuman kuno sa usa ka minugma-mugna ug gihinganlan nilang "Operation Tumba."
Kabakakan kining tanan. Buot lamang nilang ihulagway nga ang NPA, patugaras lamang og pamatay aron himuong rason sa gipilit nila ug sa US nga hinganlan ang Partido ug NPA isip mga terorista.
Kung tinuod gyud nga terorista ang NPA, gitapok na unta ang mga nag-unang kawatan sa goberno, gipatabanan og usa ka toneladang pulbura ug segundo lamang, hanaw na sa kalibutan kining mga tulisan. Daghan malagmit ang magsaulog ilabina kadtong mga nangutanahay sa rebolusyonaryong kalihukan kung nganong gibuhi pa kining mga buluka sa tawo diha sa goberno.
Apan dili gayud kini mahimo sa Partido, BHB ug NDFP. Sukwahi kini sa mga prinsipyo, mga balaud ug mga kalagdaan nga gituman sa rebolusyonaryong kalihukan.
Bisan nga armadong pakigbisog ang nag-unang porma sa pakigbisog nga gilunsad sa rebolusyonaryong kalhukan, ang lumpagon dili pa mao ang mga buhing lawas sa mga nagharing hut-ong kundili ang ilang politikanhon ug ekonomikanhong gahum. Gawas kini sa pipila nga adunay bug-at nga utang-dugo sa rebolusyonaryong kalihukan ug katawhan-ug kinahanglan nga pabayron human sa usa ka makuti, angay ug makatarunganong proseso sa pagbista sa hukumang bayan.
Sa pangkinatibuk-an, kinahanglang tangtangon lamang ang kundisyones nga nagpahigayon sa mga nagharing hut-ong nga magpadayon sa epektibong paghari-hari ug pagpahimulos sa katawhan. Samtang nakapangibabaw pa ang reaksyonaryong gahum pangpolitika ug pang-estado sa mga nagharing hut-ong, aktibong mudepensa ug mulunsad og rebolusyonaryong kontra-ataki ang rebolusyonaryong kalihukan batok sa kontra-rebolusyonaryong ataki.###
Back to top
| 