Mapaay ti Baro a Plano nga Amnestiya ti Aso-aso a Gubyerno nga Arroyo
Gregorio "Ka Roger" Rosal Spokesperson Communist Party of the Philippines
Nobyembre 05, 2002
Maib-ibusanen ti angin ti nakalaslastog nga aso-aso a gubyerno a Macapagal-Arroyo no kasano na nga abaken ti pumigpigsa a rebolusyon a Pilipino nga idadauluan ti Partido Komunista ti Pilipinas. Rinambakan da ti maipagarup a balligi ti kampanya da nga ibilang ti European Union ti NPA kasta met kenni Kadua Jose Ma. Sison iti listaan dagiti terorista. Ngem makitkita da a daytoy ket saan a nangiduron iti NDFP nga agparintumeng iti "surrender talks" nga idasdasar ti gubyerno. Itatta ket bimmaw-ing manen ti aso-aso a rehimen iti daanen ken laos a wagas ti panangallilaw - ti panangidasar ti amnestiya para kadagiti nagarmas laban iti aso-aso ken reaksyunaryo a gubyerno.
Ti panangidasar ti amnestiya ket paset laeng ti duaan a taktika ti reaksyunaryo ken aso-aso a gubyerno laban kadagiti puersa a rebolusyonaryo. Ti kangrunaan a taktika ket ti panagusar ti ranggas militar tapno parmeken ti armado a rebolusyon. Ngem gapu ta awan ti maiyaramid ti reaksyunaryo a gubyerno a wagas tapno rebbeken ti naunday a gubat ti umili ti NPA, kanayon a kagiddan ti kontra-rebolusyonaryo a gerra ti gubyerno ti panagaramat ti nadumaduma a porma ti saywar ken panangallilaw.
Ngem gapu ta dagitoy ket puros a panangallilaw ken kinaulbod laeng, natural nga awan ti dakkel nga epekto na iti pakinakem dagiti rebolusyonaryo ken uray iti pammati ti umili. Ammo dagiti umili a nadanonen ti rebolusyonaryo a panagtignay iti napalabas a nasurok tallo a dekada a maisupadi iti panangallilaw ti gubyerno ken militar, ti rebolusyonaryo a tignayan nga idadauluan ti CPP-NPA-NDFP ket pakaibilangan dagiti pudno a rebolusyonaryo a naanep, naanus ken intero a panawen a makilablaban para iti pagimbagan, karbengan ken masakbayan ti umili a Pilipino.
Maisupadi iti kinaulbod dagiti tagapagsarita ti aso-aso, reaksyunaryo ken mabulbulok a gubyerno ken mersenaryo a militar na, ti kaaduan a kameng ti Partido, Nalabaga a mannakigubat ti NPA ken aktibista ket addaan nangato a kamulatan iti pudno a kasasaad ti pagilian tayo, iti ramut ti agdama a problema ken kinabulok ti agdama a sistema ken nangruna iti amin ket mulat iti kakaisuna a solusyon kadagitoy a kinabulok. Daytoy ket awan sabali no di ti panangiwayat ti armado a dangadang inggana a naan-anay a marippuog ti agdama nga agraraira a mananggundaway ken mangidadanes a sistema ken masukatan ti baro nga urnos nga addaan pudno a wayawaya ken demokrasya ken manggarantiya iti maysa a nawaya, natalna, nainkalintegan ken narang-ay a sistema a panggimong.
Daytoy a kamulatan ket petpetpetan ti tunggal maysa a kadre ken kameng ti rebolusyonaryo a tignayan manipud kadagiti lider inggana iti masa a kasapian. Siguradoen ti Partido a ti intero a kasapian ket konsolidado iti ideolohiya, pulitika ken organisasyon aglalo iti kalkalpas a naimballigian a naiyabante a Maikadua a Naindaklan a Tignayan ti Panagilinteg. Daytoy met ti gapu no apay nga awan ti nagmaayan ti kontra-rebolusyonaryo a kampanya ti nagsisinnublat nga aso-aso a rehimen a mangrebbek iti panagbaringkuas nga idadauluan ti CPP-NPA-NDFP. Daytoy met ti rason no apay a sigurado a mapaay ti aniaman a kontra-rebolusyonaryo a kampanya militar ken kampanya a saywar ti reaksyunaryo, timmangken a napeklan nga aso-aso ken sibubukel a bulok a gubyerno nga US-Macapagal-Arroyo.
Dagiti komunista ken rebolusyonaryo a Pilipino ket napalalo a tagtagibassiten ken in-insultoen dagiti kasla-karing ti utek na a militarista kas kada Angelo Reyes ken Roilo Golez ken dagiti traydor iti Partido Komunista ken rebolusyonaryo a tignayan kas kada Blas Ople ken Rigoberto Tiglao. Ngamin ket agnamnam-ay ken aggangganas da iti nangato a posisyon iti gubyerno ken naan-anay a naisina dan iti pudno a kasasaad ti umili, nakalaklakan para kadakuada ti agubon laengen ti darat tapno pagustuan la unay ti didiyosen da nga US ken hepe nga aso-aso daytoy a ni Gloria Macapagal-Arroyo.
Kas met iti panangidasar ti awanan linaon a back channel talks tapno allilawen ken ipasuli ti pormal a tungtongan iti kappia ken dagiti napagkaysaan a katulagan iti napalabas, maysa manen a panangloko ti baro a diaya nga amnestiya para kadagiti rebolusyonaryo ken komunista. Maysa laeng nga insulto daytoy iti kamalayan ken integridad ti amin a rebolusyonaryo ken lumablaban a Pilipino. Ibilang laeng daytoy dagiti rebolusyonaryo nga awan sabali no di maysa a pangallilaw ken palab-ug iti amin a namulat ken lumablaban. Maibilang laeng daytoy a panangpadas ti rehimen kas sukat iti pudno a pannakarisut dagiti batayan a problema ti umili ken ti pagilian.
Kas iti amin a napalabas a diaya ti amnestiya, saan nga agballigi ti baro a diaya ti amnestiya. Saan a kinagat ti ad-adu a rebolusyonaryo ken komunista dagiti diaya ti amnestiya iti napalabas ken saan a tinukkol daytoy ti natibker a pakinakem dagiti lider ken kameng ti rebolusyonaryo a tignayan nga agtartarigagay ken agtultuloy nga ilaban dagiti pundamental ken pudno a panagbalbaliw iti gimong. Lallalo a mangilaw ti baro manen a panggep nga amnestiya. Makita ti rehimen nga Arroyo, no kasano kadagsen a tungpaen ti lallalo a nakonsolida ken pumigpigsa nga CPP-NDF-NPA ken ti intero a rebolusyonaryo a tignayan daytoy baro a plano nga amnestiya. Imbes a taldiapen pay, layusen la ketdi daytoy ti agdaldalluyon a panaglaban dagiti demokratiko ken patriyotiko a puersa ti umili ken dagiti opensiba nga iwaywayat ti buyot ti umili iti nalawa a kaaw-awayan. ###
Back to top
|