Mapapakyas an Bag-o nga Larang nga Amnestiya han Papet nga Gubyerno nga Arroyo

Gregorio "Ka Roger" Rosal
Spokesperson
Communist Party of the Philippines
Nobyembre 05, 2002

Nauubosan na hin hangin an gihahambogi nga papet nga gubyerno nga Macapagal-Arroyo ha kun tiunan-o peperdihon an nagkukusog nga rebolusyon Pilipino nga pinamumunuan han Partido Komunista han Pilipinas. Nagsalin-urog hira ha kasering nira nga kadaugan han ira kampanya nga gin-upod han European Union an NPA ngan hi Kasamang Jose Ma. Sison ha talaan han mga terorista. Pero nakikita nira nga waray ini makakagduso han NDFP nga mangimanluoy ha "surrender talks" nga iginhalad han gubyerno. Yana kinadto naman an papet nga rehimen ha gidadaani ngan laos na nga paagi han pangunguwat-an pangangayer hin amnestiya para ha mga nag-aarmas kontra ha papet ngan reaksyunaryo nga gubyerno.

An pangangayer hin amnestiya kaparte la ha duhaan nga taktika han reaksyunaryo ngan papet nga gubyerno kontra ha mga pwersa nga rebolusyonaryo. An prinsipal nga taktika amo an paggamit han kabangis militar para marugmok an armado nga rebolusyon. Pero dara nga waray ikakapanta nga paagi an reaksyunaryo nga gubyerno agud puypoyon an panmaihaan nga gerra han katawhan han NPA permi kasugbong han kontra-rebolusyonaryo nga gerra han gubyerno an paggamit hin nagkaiba-iba nga porma han saywar ngan pangunguwat.

Pero tungod nga panguwat la ito ngatanan, natural nga waray ini importante nga epekto ha kaburut-on han mga rebolusyonaryo ngan bisan ha pagtuo han katawhan. Maaram an katawhan nga naabot na han rebolusyonaryo nga paggios ha naglabay nga sobra tulo nga dekada nga kabaliskaran ha panguwat han gubyerno ngan militar, an rebolusyonaryo nga kagiusan nga pinamumunuan han CPP-NPA-NDFP ginlalakipan han mga ungod nga rebolusyonaryo nga pursigido nga bug-os nga panahon nga nakikig-away para ha interes, katungod ngan kabubwason han katawhan Pilipino.

Kabaliskaran han gindadako han mga tagapagyakan han papet, reaksyunaryo ngan nadudunot nga gubyerno ngan mersenaryo nga militar hini, an nakadadamo nga kaapi han Partido, Pula nga mangaraway han BHB ngan aktibista in mayda hitaas nga kapukawan ha tinuod nga kamutangan han aton nasud, ha gin-gagamotan han presente nga mga problema ngan kadunotan han presente nga sistema ngan labaw ha ngatanan pukaw ha kun ano an solo nga solusyon hini nga mga kadunotan. Ngan ito in waray iba kundi an paglalansar hin armado nga pakigbisog tubtob ha diretso nga maibagsak an presente nga nag-iksister nga magtiyupion ngan matalumpiguson nga sistema ngan masaliwanan hin bag-o nga kaayusan nga mayda tinuod nga katalwasan ngan demokrasya ngan naggagarantiya ha usa nga talwas, mahimyang, makatadungan ngan abunda nga sistema nga pankatilingban.

Ini nga kapukawan in dara-dara han kada usa nga kadre ngan kaapi han rebolusyonaryo nga kagiusan tikang ha mga pangulo tubtob ha masa nga kaapihan. Ginseseguro han Partido nga an bug-os nga kaapihan in konsolidado ha ideolohiya, pulitika ngan organisasyon labina pagkatapos madinaugon nga maisulong an Ikaduha nga Gamhanan nga Kagiusan nga Pagtutul-id. Ini liwat an hinungdan kun kay ano nga waray anuman nga kontra-rebolusyonaryo nga kampanya han nagsarusaliwan nga mga papet nga rehimen an nakapuypoy ha pakigbisog nga pinamumunuan han CPP-NPA-NDFP. Ini liwat an hinungdan kun kay ano nga seguro nga mapapakyas an anuman nga kontra-rebolusyonaryo nga kampanya militar ngan kampanya nga saywar han reaksyunaryo, hul-os nga papet ngan gidudunoti nga gubyerno nga US-Macapagal-Arroyo.

An mga komunista ngan rebolusyonaryo nga Pilipino in duro nga ginmemenos ngan gin-iinsulto han mga mayda haligot nga pamensar sugad kanda Angelo Reyes ngan Roilo Golez ngan han mga traydor ha Partido Komunista ngan rebolusyonaryo nga kagiusan sugad kanda Blas Ople ngan Rigoberto Tiglao. Dara kay nakakabenepisyo ngan nagpatakas ha higtaas nga pusisyon ha gubyerno ngan hul-os nga tukal hira tikang ha tinuod nga kamutangan han katawhan, gidadagmiti para ha ira an pag-iinimbento hin ano na la agud matagan la hin kalipayan an gindidiyos nira nga US ngan puno nga papet hini nga hi Gloria Macapagal-Arroyo.

Sugad liwat han paghalad han waray data nga back channeling talks agud uwaton ngan ipinid an pormal nga erestorya pankamurayawan ngan mga napag-urosahan na nga kasarabutan ha naglabay, usa na liwat nga pangunguwat an bag-o nga pangayer nga amnestiya para ha mga rebolusyonaryo ngan komunista. Usa la ini nga insulto ha kapukawan ngan integridad han ngatanan nga rebolusyonaryo ngan nakikig-away nga Pilipino. Kilal-on la ini han mga rebolusyonaryo nga waray iba kundi usa nga pangunguwat ngan lit-ag ha ngatanan nga napukaw ngan nakikig-away. Kilal-on la ini nga pag-atentar han rehimen komo pansaliwan ha mga tinuod nga solusyon ha mga batakan nga problema han katawhan ngan han nasud.

Sugad liwat han naglabay nga pangayer nga amnestiya, diri ngan diri magdadaug an bag-o nga pangayer nga amnestiya. Waray umupan an nakadadamo nga rebolusyonaryo ngan komunista ha mga pangayer nga amnestiya ha naglabay ngan waray mabari hini an madig-on nga kaburut-on han mga lider ngan kaapi han rebolusyonaryo nga kagiusan nga maghingyap ngan padayon nga ipakig-away an mga pundamental ngan tinuod nga mga pagbabag-o pankatilingban. Labaw nga paglalangawon an bag-o na liwat nga larang nga amnestiya. Makikita ha rehimen Arroyo kung tiunan-o kabug-at pagtaplongon han labaw nga nakonsolida ngan nagkukusog nga CPP-NDF-NPA ngan bug-os nga rebolusyonaryo nga kagiusan ini nga bag-o nga larang nga amnestiya. Imbes nga pagtagdon pa, lulumson la ini han naglalarab nga pag-ato han mga demokratiko ngan patriotiko nga pwersa han katawhan ngan han mga opensiba nga iglalansar han hukbong bayan ha hiluag nga kabaryohan.###

Back to top