Bisan kanus-a man, dili isurender sa Partido, Bagong Hukbong Bayan ug NDFP ang armadong rebolusyon

Gregorio "Ka Roger" Rosal
Spokesperson
Communist Party of the Philippines
Nobyembre 03, 2002

Bisan kanus-a man, dili mahimong isurender sa Partido Komunista sa Pilipinas, Bagong Hukbong Bayan, National Democratic Front ug sa nagrebolusyong katawhang Pilipino ang armadong rebolusyon, sama sa buot mahitabo ug gipanawagan sa Malakanyang. Gihulagway ni Defense Secretary Angelo Reyes isip "istratehikong kapildihan" alang sa rebolusyonaryong kalihukan ang paghilakip na usab, ning kabag-ohan lamang, sa Bagong Hukbong Bayan ug kang Kaubang Joema Sison sa Foreign Terrorist List sa European Union; busa angay'ng isurender na kuno ang armas sa Partido, BHB ug NDFP. Nahaunod usab sa psywar ni Rigoberto Tiglao, tigdumala sa "war room" sa Malakanyang, ang pagyubit sa katakus sa Partido ug mga lider niini nga padayong i-asdang ang armadong rebolusyon.

Padayon nga nagkakusog ang BHB ug ang katakus niining i-asdang ang armadong pakigbisog ug muani pa'g nagakadaghang kadaugan batok sa nagkadugta nga reaksyonaryong goberno ug dunot nga hukbo niini.

Pinaagi sa BHB, ang katawhang Pilipino migunit og armas aron mahukmanong sulbaron ang mga gamut-hinungdan sa pagpanglupig ug pagpahimulos kanila-pyudal nga pagpanaugdaog ug paghikaw kanila og yuta, langyaw'ng paghari sa ekonomiya ug politika, korapsyon sa goberno ug pagpangabusong militar.

Ang pagbuhi sa armas maoy padayon nga pagtulon na lamang niining mga tunok nga pila ka siglo ug puloan ka henerasyon nang nagdulot og samad sa kinauyokan sa nilupigan ug gipahimuslang nasud.

Ang pagbuhi sa armas sa BHB maoy pagsurender sa mga nakab-ot na sa rebolusyonaryong kalihukan ug katawhan sa armadong pakigbisog-tinuod nga reporma sa yuta, mga nalunsad nga pakigtinabangay, tinuod nga kooperatiba ug pagpalambo sa panginabuhian, panglawas, kahibalo ug kultura sa katawhan; pagtukod ug pagpadagan sa mga lokal nga demokratikong goberno sa katawhan; ug uban pang kadaugan nga inutro-otrong gilunsad ug gitukod luyo sa padayon nga pagpangataki sa militar ug goberno ni Macapagal-Arroyo.

Sa mata sa mga nilupigan, ang mga gitukod sa rebolusyonaryong armadong pakigbisog mao ang bag-ong sistema, bag-ong kahusay, bag-ong kinabuhi nga puno sa kahulugan ug paglaom alang sa katawhan. Sa mata sa mga malupigon ug mapahimuslanon, kini maoy "magun-ubong terorismo."

Ang mapungtanong pagpangampanya sa US ug sa rehimeng Arroyo aron mahinganlan nga "terorista" ang BHB ug mga kaubang nakighisgut sa kalinaw diha sa goberno, ang padayon nga paglunsad sa rehimen og hilabihang kabangis nga all-out war sa mga gibasehan sa rebolusyonaryong kalihukan ug pagsira na niini sa hisgutanang kalinaw, labaw lamang nagpadilaab sa gubat sibil sa Pilipinas ug tumbas sa dugang pagpaantus sa katawhan sa kamut sa mga reaksyonaryong pwersa.

Ingon pa man, gihagit namo ang Malakanyang ug AFP nga ipatuman pa sa gihapon ang tanang palisiya sa Geneva Conventions mahitungod sa makatawo ug sibilisadong pakiggubat, ipatuman ang Comprehensive Agreement on Respect for Human Rights and International Humanitarian Law (CARHRIHL) ug tukuron ang Joint Monitoring Committee katugbang sa mga representante sa NDF ug uban pang third-party organizations. Sama sa gipahayag sa NDF, gipasiugda niini ang CARHRIHL ug andam kini nga panubagon ang mga aksyon niini nahasubay sa mga nahaunod sa CARHRIHL. Ang padayon nga pagbalibad sa Malakanyang ug AFP nga ipatuman kiini, maoy nagpamatuod lamang nga sila ang tinuod nga terorista sa nasud. ###

Back to top