Ni kaanoman saan nga isuko ti Partido, Baro a Buyot ti Umili ken ti NDFP ti armado a rebolusyon

Gregorio "Ka Roger" Rosal
Spokesperson
Communist Party of the Philippines
Nobyembre 03, 2002

Ni kaanoman, saan a mabalin nga isuko ti Partido Komunista ti Pilipinas, Baro a Buyot ti Umili, National Democratic Front ken ti agrebrebolusyon nga umili a Pilipino ti armado a rebolusyon, kas iti kayat nga aramiden ken ipampanawagan ti Malakanyang. Parparuaren ni Defense Secretary Angelo Reyes a maysa nga "estratehiko a pukaw" para iti rebolusyonaryo a tignayan ti panangibilang met itay nabiit iti Baro a Buyot ti Umili kasta met kenni Kadua Joema Sison iti Foreign Terrorist List ti European Union, isu a rumbeng nga isuko kanon ti armas ti Partido, NPA ken NDFP. Lalaonen met ti psywar ni Rigoberto Tiglao, mangiwanwan ti "war room" ti Malakanyang, ti panangtagibassit iti kabaelan ti Partido ken dagiti lider daytoy nga agtultuloy nga iyabante ti armado a rebolusyon.

Agtultuloy a pumigpigsa ti NPA ken ti kabaelan na nga iyabante ti armado a dangadang ken aggunggun-od ti umad-adu a balligi laban iti agruprupsa a reaksyunaryo a gubyerno ken bulok a buyot daytoy.

Babaen ti NPA, ti umili a Pilipino ket nagarmas tapno desidido a risuten dagiti ramut ti panangidadanes ken pananggundaway kadakuada - pyudal a panangidadanes ken panangipaidam ti daga kadakuada, panagturay ti ganggannaet iti ekonomya ken pulitika, korapsyon iti gubyerno ken panagabuso a militar.

Ti panangibbat ti armas ket agtultuloy a pananglamduk lattan kadagitoy a siit a sumagmamanon a siglo ken manopulo a henerasyon a mangipapaay ti sugat iti kaunggan ti sangapagilian a maidaddadanes ken magunggundawayan.

Ti panangibbat ti armas ti NPA ket panagsurender metten kadagiti nagun-od iti armado a dangadang ti rebolusyonaryo a tignayan ken umili - pudno a reporma iti daga, dagiti naiwayat a panagtitinnulong, pudno a kooperatiba ken panagdur-as iti kabiagan, salun-at, kaammoan ken kultura ti umili; panangibangon ken panagtaray dagiti lokal a demokratiko a gubyerno ti umili; ken dadduma pay a balligi a patinayon a maiwaywayat ken maibangbangon iti sango ti agtultuloy a panangraut ti militar ken gubyerno ni Macapagal-Arroyo.

Iti mata dagiti mairurumen, dagiti ibangbangon ti rebolusyonaryo nga armado a dangadang ket baro a sistema, baro nga urnos, baro a biag a napnuan ti kaipapanan ken namnama para iti sangapagilian. Iti mata dagiti mangidadanes ken mananggundaway, dagitoy ket "mangdangran a terorismo".

Ti naanep a panagkampanya ti US ken ti rehimen nga Arroyo tapno maibilang a "terorista" ti NPA ken dagiti kakadua a makitungtungtong iti kappia iti gubyerno, ti agtultuloy a panangiwayat ti rehimen ti nalawag a nakarungrungsot nga all-out war kadagiti base ti rebolusyonaryo a tignayan ken panangiserran daytoy iti tungtongan iti kappia ket lallalo laeng a mangpairteng iti gerra sibil iti Pilipinas ken kaipapanan na ti lallalo a panangparigat iti umili iti ima dagiti reaksyunaryo a puersa.

Uray no kasta, kariten mi ti Malakanyang ken AFP a suruten da dagiti amin a patakaran ti Geneva Conventions maipapan iti makatao ken sibilisado a dangadang, ipatungpal ti Comprehensive Agreement on Respect for Human Rights and International Humanitarian Law (CARHRIHL) ken buklen ti Joint Monitoring Committee a katinnulong dagiti mangibagi ti NDFP ken dadduma pay a third-party organizations. Kas iti impahayag ti NDF, itantandudo daytoy ti CARHRIHL ken nakasagana daytoy a sungbatan dagiti aksyon na segun kadagiti lalaonen ti CARHRIHL. Ti agtultuloy a panagmadi ti Malakanyang ken AFP nga ipatungpal dagitoy ket pammaneknek laeng nga isuda ti pudno a terorista iti umili.

Back to top