Diri poyde igsurender han katawhan Pilipino an ira mga kadaugan ha armado nga pakigbisog

Gregorio "Ka Roger" Rosal
Spokesperson
Communist Party of the Philippines
Nobyembre 03, 2002

Waray na gud lugar an erestorya pankamurayawan ilarum han rehimen Macapagal-Arroyo. Diri ini andam nga atubangon, paghimangrawan ngan sulbaron an mga batakan nga problema nga gin-aatubang han katawhan Pilipino nga asya an nagpapalutaw han presente nga gerra sibil ha Pilipinas.

Diri abyerto an linya han komunikasyon, kabaliskaran ha ginsering han Malakanyang. Bisan pa nga magpapabilin nga bug-os an negotiating panel han NDF ngan 24-oras nga abyerto an mga upisina hini, waray ini nakakarawat nga anuman nga tawag o abiso tikang ha mga tinaglawas han GRP. Bisan an gindadako hini nga "final peace agreement" in waray pa namon makita.

Waray interes hi Macapagal-Arroyo nga maghimangraw hiunong ha pampulitika nga resolusyon han armado nga panagtipa. An interes la han US, ni Macapagal-Arroyo ngan han iya militarista nga rehimen in paghimangrawan an pagsurender han rebolusyonaryo nga kagiusan.

Kakan-o o san-o man diri nagin katugbang han pagsurender han armas ngan mamingaw nga pagkarawat han taplong ha wala ngan tuo nga pisngi an ginpinamulat han katawhan Pilipino nga maihaan ngan makatadungan nga kamurayawan.

Pinaagi han Bagong Hukbong Bayan, an katawhan Pilipino, labina an kadam-an han mga parag-uma nga kaupod ha ranggo han mga Pula nga mangaraway, nag-armas agud kab-uton an katarungan tikang ha pananalumpigos ngan paniniyupi: ha kawarayan han tuna ngan pyudal nga paniniyupi ngan pangunguripon, ha paghahadi han mga dayuhan ha ekonomya ngan pulitika, ha kurapsyon ha gubyerno ngan pan-aabuso militar.

An pagbul-iw ha armas katugbang na gihapon ha pagtulon hini nga mga tunok nga pira nga henerasyon na nga nagdudurot hin kasamdan ha nasud nga tinalumpigos ngan tiniyupi.

Diri poyde nga isurender han katawhan Pilipino an ira mga armas tungod kay katugbang hini amo an pagsurender ha mga kadaugan nga nakab-ot ha armado nga pakigbisog-tinuod nga reporma ha tuna, mga programa ha literasi, panlawas, pagburubligay ngan pagkakaurosa-mga kadaugan nga adlaw-adlaw karuyag rub-on han gubyerno ni Macapagal-Arroyo.

Ha mata han tiniyupi, an rebolusyonaryo nga armado nga pakigbisog in nagtitindog han bag-o nga sistema, bag-o nga kaayusan, bag-o nga kinabuhi nga puno hin paglaum para ha katawhan. Ha mata han mga magtiyupion ngan magtalumpiguson, ini in "mapanruba nga terorismo".

Gabay man nga diri na mahitatabo an erestorya pankamurayawan tungod kay waray naman interes dinhi an rehimen Macapagal-Arroyo, ngan an kakadtuan hini an labaw pa nga pagpaso han gerra sibil ha Pilipinas, gin-aayat namon an Malakanyang ngan AFP nga sumunod ha ngatanan nga palisiya han Geneva Conventions ngan International Humanitarian Law ngan diri paghibangon an mga sibilyan. Ha pagkayana, gibabangisi gud han all-out war han AFP ngan PNP. Gintatarget ngan ginhihibang hini diri an BHB, kundi an kinabuhi ngan mga gintatag-iya han mga parag-uma nga ginpapasangilan nira nga nagsusuporta ha BHB.

Gin-aayat liwat namon an Malakanyang ngan AFP nga ig-undong an Comprehensive Agreement on Respect for Human Rights and International Humanitarian Law (CARHRIHL) ngan tindogon an Joint Monitoring Committee (JMC) katugbang han mga tinaglawas han NDF ngan iba pa nga third-party organizations. Imbes nga magyinakan ha midya an mga upisyal han militar hiunong ha kuno pan-aabuso han BHB (nga kaurog naman waray bis ano nga basaranan nga mga susmatanon-militar la), an mga reklamo han pan-aabuso o pagtalapas ha katungod pantawo in pormal nga maisalawad ha JMC ngan an mga salaan poyde nga pababatunon. Sugad han ginplastar han NDF, gin-uundong hini an CARHRIHL ngan andam ini nga batonon an mga mapoprubaran nga mga pagtalapas dinhi han mga rebolusyonaryo nga pwersa.

Responsibilidad han Malakanyang ngan AFP, ha usa nga gapil, ngan han PKP/BHB ngan NDF ha kaluyo nga gapil an himuon an armado nga panagtipa ha pamaagi nga sibilisado ngan mayda pagrespeto ha mga pagsurundon ngan nag-uundong ha kaupayan ngan interes han katawhan Pilipino.

An padayon nga pagdumiri han Malakanyang ngan AFP nga kilal-on an CARHRIHL ngan sumakob ha JMC amo an pagtalikod ngan pagdumiri nga atubangon an mga responsibilidad hini.###

Back to top