Dili mahiyukbo ang rebolusyonaryong kalihukan sa paglakip usab sa EU sa NPA ug kang Kaubang Sison sa talaan sa mga FTO!
Gregorio "Ka Roger" Rosal
Spokesperson
Communist Party of the Philippines
Nobyembre 01, 2002 Yanghag nga nangandoy'g bulan ang itoy nga gobernong Macapagal-Arroyo sa ilusyon niini nga ang pagdeklarar sa European Union niining Oktubre 28 nga ilakip ang New People's Army ug si Kaubang Jose Ma. Sison sa ilang talaan sa mga teroristang organisasyon makapatukmod sa rebolusyonaryong kalihukan nga musurender o buhian na ang armadong pakigbisog. Gipasigarbo ni Foreign Affairs Secretary Blas Ople nga pinaagi niini, mapwersa ang CPP ug NDFP nga muluhod sa hisgutanang kalinaw ubos sa dili makatarunganon ug dili resonable nga mga kundisyones nga tinguha sa itoy nga goberno.
Sa pagpasiugda usab sa kaugalingon nilang imperyalistang interes samtang nagnunut-nunot sa anti-"teroristang" linya sa US, giligsan sa EU ang mismong gipasigarbo nilang konsepto sa due process ug gilakip sa talaan sa mga terorista ang mga rebolusyonaryong nakigbisog subay sa prinsipyo ug sa makatawo nga pamaagi ug hingpit nga nagpasiugda sa kabulahanan sa katawhan. Bisan pa nga wala kini'y gidulot nga bug-at kaayo nga kadautan sa rebolusyonaryong kalihukan, angay'ng hingpit nga tulisukon ug batukan ang kawalay katarungan ug hustisya sa gipanghimo sa US, EU ug itoy nga rehimeng Macapagal-Arroyo.
Misulod ang rebolusyonaryong kalihukan sa hisgutanang kalinaw sa GRP aron kahataga'g dalan, kung pananglitan, ang usa ka pangpolitikang solusyon sa armadong panagbangi o gubat sibil nga nahitabo karon sa Pilipinas. Paningkamot niining mahisgutan sa lamesa sa negosasyon ang gamut-hinungdan sa armadong panagbangi ug magkasabot aron tapuson kini sa bintaha sa katawhan.
Us� pa sa pormal nga negosasyon, nagka-uyon ang duha ka parte sa gambalay, mga prinsipyo ug substantive agenda nga sundon sa pormal nga hisgutanan, lakip na ang The Hague Joint Declaration. Klaro niining kasabutan nga adunay managkaangay nga istatus ang duha ka parte sa pagsulod sa hisgutanan.
Hugot nga gihuptan sa NDFP ang pagpatuman sa siyam pa nga mahinungdanong kasabutan nga nakab-ot na sa hisgutanan, lakip na ang Comprehensive Agreement on Respect for Human Rights and International Humanitarian Law (CARHRIHL). Dili nga dili makatugot ang rebolusyonaryong kalihukan nga pagaduladulaan ug pakawad-a'g bili lamang sa GRP kining mga mahinungdanong kasabutan.
Sukwahi sa gihulagway sa GRP nga alang kini sa pagbalik sa NDFP sa lamesa sa hisgutanang kalinaw, sa kamatuoran, ang pagpangampanya ni Ople aron ideklarar usab sa EU nga "terorista" ang NPA ug si Kaubang Sison mauy pagbungkag gidayon sa hisgutanang kalinaw.
Us� pa niini, larga-tudo nang nagkunsabohay ang US ug ang itoy nga gobernong Macapagal-Arroyo aron padayon nga pig-utan ang mga konsultant ug opisyal sa NDFP sa Europe nga dunay kalambigitan sa negosasyon, sa pagpanguna nila Kaubang Jose Ma. Sison ug Kaubang Luis Jalandoni.
Dili makatugot ang rebolusyonaryong kalihukan nga yatakan sa itoy nga GRP ang bantugang rekord, integridad ug prestihiyo nga nakab-ot ug padayon nga gi-ani niini sa kapin tulo ka dekada sa kinabuhi-ug-kamatayon nga pakigbisog batok sa pinakamangtas nga mga ataki sa mga managkasunod nga mga itoy nga rehumen sa Pilipinas.
Tin-aw ang nauna nang baruganan sa rebolusyonaryong kalihukan nga kung gi-ayawan sa itoy nga gubyernong Macapagal-Arroyo ang negosasyong kalinaw ug maghingusog sa pagsurender sa NDFP, andam kining magpaabot sa kang kinsamang mupuli sa rehimeng Arroyo. Dili na man usab magdugay sa gahum ang kasamtangang rehimen.
Samtang, magpadayon ang rebolusyonaryong kalihukan sa pagpundar og usa ka katilingban nga natagamtam og tinuod, makatarunganon ug malungtarong kalinaw, anaa man o wala ang hisgutanang kalinaw.###
Back to top
| 