Indi maguhod-luhod ang rebolusyonaryong kahublagan sa paglakip sang EU sa NPA kag kay Kaupod Sison sa listahan sang FTO!

Gregorio "Ka Roger" Rosal
Spokesperson
Communist Party of the Philippines
Nobyembre 01, 2002

Nagadamgo sang bugtaw ang papet nga gubyernong Macapagal-Arroyo sa ilusyon sini nga ang pagdeklarar sang European Union sining Oktubre 28 nga lakipon ang New People's Army kag si Kaupod Jose Ma. Sison sa ila listahan sang mga teroristang organisasyon makaduso sa rebolusyonaryong kahublagan nga mag-ampo ukon magbiya na sa armadong paghimakas. Ginapabugal ni Foreign Affairs Secretary Blas Ople nga paagi sini, mapilitan ang CPP kag NDFP nga magluhod-luhod sa paghambalanay pangkalinungan sa idalum sang indi matarung kag indi rasonableng mga kundisyon nga gusto sang papet nga gubyerno.

Sa pagtib-ong sa kaugalingon man nilang imperyalistang interes samtang naga-alagad sa anti-teroristang linya sang US, ginadalasa sang EU ang mismo konsepto sang ila ginapabugal nga due process kag ginbutang sa listahan sang mga terorista ang mga rebolusyonaryo nga nagapakigbatu suno sa prinsipyo kag sa tawhanon nga pamaagi kag lubos nga nagatib-ong sang kaayuhan sang pumuluyo. Bisan wala makatuga sang tuman kabug-at nga kahalitan sa rebolusyonaryong kahublagan, dapat lubos nga pakamalauton kag pamatukan ang kawawad-on sang hustisya sa ginahimo sang US, EU kag papet nga rehimeng Macapagal-Arroyo.

Ang rebolusyonaryong kahublagan nagsulod sa pagpakighambalanay pangkalinungan sa GRP agud hatagan-dalan, kon pananglitan, ang isa ka pangpulitika nga solusyon sa armadong banggianay ukon gera sibil nga nagatabo subong sa Pilipinas. Ginatinguhaan nga matalakay sa negosasyon ang ugat sang armadong banggianay kag maghilisugot nga tapuson ini sa bentaha sang pumuluyo.

Antes ang pormal nga negosasyon, nagkasugot ang duha ka bahin sa balayon, mga prinsipyo kag substantibong adyenda nga pagasundan sa pormal nga paghambalanay, lakip na ang The Hague Joint Declaration. Maathag sa kasugtanan nga ini nga may pareho nga estado ang magtimbang nga bahin sang magsulod sa hambalanay.

Mabaskog nga ginakaptan sang NDFP ang pagpatuman sa siyam pa ka malahalon nga kasugtanan nga naangkon na sa hambalanay, lakip na ang Comprehensive Agreement on Respect for Human Rights and International Humanitarian Laws (CARHRIHL). Wala gid magsugot ang rebolusyonaryong kahublagan nga hampangan kag bale-walaon sang GRP ang malahalon nga mga kasugtanan nga ini.

Kabaliskaran sa ginapaluntad sang GRP nga para ini sa pagpabalik sa NDFP sa negosasyon pangkalinungan, sa kamatuoran, ang kampanya nga ginahimo ni Ople agud ideklarar man sang EU nga "terorista" ang NPA kag si Kaupod Sison lubos na nga nagguba sa negosasyon pangkalinungan.

Antes ini, todo-todo na ang paghimbunanay sang US kag sang papet nga gubyernong Macapagal-Arroyo agud lubos nga ipiton ang mga konsultant kag upisyales sang NDFP sa Europe nga may kahilabtanan sa negosasyon, sa pagpanguna nanday Kaupod Jose Ma. Sison kag Kaupod Luis Jalandoni.

Indi magsugot ang rebolusyonaryong hublag nga lapakon sang papet nga GRP ang nagaidlak nga rekord, integridad kag prestihiyo nga naagum kag padayon nga ginaani sini sa masobra na nga tatlo ka dekada sang kabuhi-kag-kamatayon nga paghimakas batuk sa pinakamapintas nga mga atake sang mga sunod-sunod nga papet nga rehimen sa Pilipinas.

Maathag ang nahauna na nga panindugan sang rebolusyonaryong kahublagan nga kon mangindi ang papet nga gubyernong Macapagal-Arroyo sa negosasyon pangkalinungan kag maga-insister sang pagpasurender sang NDFP handa ini nga maghulat sa magabulos sa rehimeng Arroyo. Indi man magdugay sa poder ang kasubong nga rehimen.

Samtang, magapadayon ang rebolusyonaryong kahublagan sa pagpundar sang isa ka katilingban nga nagaagum sang tunay, matarung kag pangmalawigan nga kalinungan, may negosasyon pangkalinungan man ukon wala.###