Diri mapapaluhod an rebolusyonaryo nga kagiusan ha pagbutang liwat han EU ha NPA ngan kan kasamang Sison ha FTO list!

Gregorio "Ka Roger" Rosal
Spokesperson
Communist Party of the Philippines
Nobyembre 01, 2002

Nag-iininop la an papet nga gubyerno nga Macapagal-Arroyo ha ilusyon hini nga an pagkakadeklarar han European Union hiton Oktubre 28 nga ig-upod an New People's Army ngan hi Kasamang Jose Ma. Sison ha ira talaan han mga terorista nga organisasyon makakagduso ha rebolusyonaryo nga kagiusan nga sumurender o bul-iwan na an armado nga pakigbisog. Gindadako ni Foreign Affairs Secretary Blas Ople nga pinaagi hini, mapirit an CPP nga NDFP nga lumuhod ha pakikig-estorya pankamurayawan ilarum han di makatadungan ngan di rasonable nga mga kundisyon nga karuyag han papet nga gubyerno.

Ha pag-uundong liwat han kalugaringon nira nga imperyalista nga interes samtang nagsusunod-sunoran ha anti-"terorista" nga linya han US, ginliligsan han EU an mismo nga gindadako nira nga konsepto han due process nga iginbutang ha talaan han mga terorista an mga rebolusyonaryo nga nakikigbisog sigon ha prinsipyo ngan ha makatawo nga pamaagi ngan pursigido nga nag-uundong han interes han katawhan. Bisan man nga waray ini igindurot nga gibubug-ati nga kahibangan ha rebolusyonaryo nga kagiusan, angay pursigido nga turisukon ngan atuhan an kawaray hin katarungan ngan hustisya ha ginhihimo han US, EU ngan papet nga rehimen Macapagal-Arroyo.

Sinakob an rebolusyonaryo nga kagiusan ha pakikighimangraw pankamurayawan ha GRP agud matagan-dalan, kun ugaring man, an usa nga pampulitika nga solusyon ha armado nga banggaay o gerra sibil nga nahitatabo yana ha Pilipinas. Panalinguha ini nga matalakay ha lamesa han negosasyon an gamot han armado nga panagtipa ngan magkasarabot para tapuson ini ha bentaha han katawhan.

Antes an pormal nga negosasyon nagkasarabot an duha nga gapil ha balayan, mga prinsipyo ngan substantibo nga adyenda nga pagsusundon ha pormal nga erestorya, kalakip na an The Hague Joint Declaration. Klaro hini nga kasarabutan nga mayda patas nga kamutangan an duha nga gapil ha pagsakob ha erestorya.

Hugot nga ginkakatinan han NDFP an pagpapatuman ha siyam pa nga importante nga kasarabutan nga nakab-ot na ha erestorya, kaupod na an Comprehensive Agreement on Respect for Human Rights and International Humanitarian Laws (CARHIHL). Diri ngan diri makakatugot an rebolusyonaryo nga kagiusan nga pag-uyasan ngan balewarayon han GRP ini nga importante nga kasarabutan.

Kabaliskaran han ginpapalutaw han GRP nga para ini ha pagpapabalik ha NDFP ha lamesa han erestorya pankamurayawan, ha kamatuoran, an pangangampanya nga ginhihimo ni Ople para igdeklarar liwat han EU nga "terorista" an NPA ngan hi Kasamang Sison diretso na nga panruba ha erestorya pankamurayawan.

Antes hini, todo-todo na an kunsabohay han US ngan han papet nga gubyerno nga Macapagal-Arroyo para dirudiretso nga ipton an mga konsultant ngan upisyal han NDFP ha Europe nga mayda sumpay ha negosasyon, ha pangunguna nira kasamang Jose Ma. Sison ngan Kasamang Luis Jalandoni.

Diri makakatugot an rebolusyonaryo nga kagiusan nga tamakan han papet nga GRP an mainggat nga rekord, integridad ngan prestihiyo nga nakab-ot ngan padayon nga naaani hini ha sobra na tulo nga dekada han kinabuhi-ngan-kamatayon nga pakigbisog kontra ha pinakamabangis nga mga atake han mga sunod-sunod nga mga papet nga rehimen ha Pilipinas.

Klaro an nauna na nga katindog han rebolusyonaryo nga kagiusan nga kung diri han papet nga gubyerno Macapagal-Arroyo ha negosasyon pankamurayawan ngan magduduso han pagsurender han NDFP andam ini nga maghulat ha hain man nga masaliwan ha rehimen Arroyo. Diri na man liwat mag-iiha ha poder an presente nga rehimen.

Samtang, magpapadayon an rebolusyonaryo nga kagiusan ha pagpupundar han usa nga katilingban nga nagtatagamtam han tinuod, makatadungan ngan panmaihaan nga kamurayawan, nakada man o waray an erestorya pankamurayawan.###

Back to top