Sanday Kaupod Abling, Kaupod Daniel kag Kaupod Nards: mga dunganon nga martir kag baganihan sang rebolusyon

Gregorio "Ka Roger" Rosal
Spokesperson
Communist Party of the Philippines
Oktubre 16, 2002

Mabaskog nga ginapanginwala namon ang pinakadaku nga kabutigan kag liwat nga pagpaniplang sang palpak kag berdugo nga si Col. Palparan nga ang tatlo ka bangkay nga ginkutkut nila sa Mindoro mga biktima sang "purgahan" sa rebolusyonaryong hublag.

Mga martir sang rebolusyon sanday Ka Abling, Ka Daniel kag Ka Nards. Si Ka Abling isa ka isganan nga pulang kumander kag sanday Ka Daniel at Ka Nards mga huwaran nga pulang hangaway sang Bagong Hukbong Bayan (BHB) nga naghalad sang ila kabuhi alang-alang sa interes kag buasdamlag sang pumuluyong Pilipino.

Ang tatlo ka mga baganihan kag martir nga ini napatay sa isa ka madinalag-on nga ambus sang BHB sadtong Hulyo 4, 2000 sa baryo Antonino, Victoria, Oriental Mindoro. Ang mga mahal nga kaupod nga napatay sa nasambit nga inaway ginpasidunggan sang mga kaupod kag madasigan nga ginlubong sa nasambit nga lugar sa atubang sang emerhensya nga kahimtangan nga may pursuit operation ang mga terorista kag mersenaryong suldado sang reaksyunaryong gubyerno. Ang ila nga pagkabaganihan napaabot sa ila mansig-pamilya kag mahal sa kabuhi.

Sanday Ka Abling, Ka Nards kag Ka Daniel mga dungganon nga komunista kag rebolusyonaryo nga wala duha-duha nga maghalad sang ila kabuhi alang-alang sa pumuluyo kag sa rebolusyon nga ginapamunuan sang dungganon nga Partido Komunista ng Pilipinas. Sila amo ang mga modelo nga kumander kag hangaway sang Lucio de Guzman Command kag Melito Glor Command.

Ugaling ang ila mga bangkay gintampalas kag ginsamaran sang mga mersenaryo kag terorista nga suluguon ni Macapagal-Arroyo sa pagpanguna sang palpak nga berdugong si Col. Palparan. Ang ginapagguwa ni Palparan nga sila mga biktima sang "purgahan" sa sulod sang rebolusyonaryong hublag amo ang pinakadaku nga pagtampalas sa ila nga handumanan.

Si Palparan, kon amo, napamatud-an nga labing palpak sa "counter-insurgency" sa Mindoro Oriental kag Timog Katagalugan. Wala siya sarang himuon kundi ang magpatay sang mga wala inugbatu nga sibilyan kag mga tumandok nga Mangyan kag pagkatapos ipakita nga mga NPA ukon tagasuporta sang NPA; ukon indi gani, magpakutkut sang mga bangkay bisan pa sa mga pangpubliko nga sementeryo agud patuhawon nga mga biktima ang mga ini sang "purgahan" sa sulod sang rebolusyonaryong hublag pareho sa gusto niya patuhawon sa mga bangkay nanday Ka Abling, Ka Nards kag Ka Daniel.

Kabahin ini sang malaparan nga kampanyang saywar sang utok-pulbura kag puno nga papet nga si Macapagal-Arroyo kag sang iya mga mersenaryo kag matuod nga teroristang AFP kag PNP sa desperasyon nga pintahan sang tuman kalaw-ay ang CPP-NPA-NDFP. Nagabuang na ang mga pasista kon paanong samaran sa mata sang masa ang rebolusyonaryong hublag. Nagalubid sila sang maathag nga mga kabutigan.

Pat-ud nga indi nila mapapati kag matiplang ang malapad nga pumuluyo. Nahibal-an sang malapad nga masang mangunguma sa bug-os nga pungsod nga ang tatlo ka dekada nga paghimakas sang rebolusyonaryong hublag para sa ila, gani ginasakdag nila kag bug-os-sa-tasgipusuon nga ginaangkon ang rebolusyon nga ini sa paagi sa direkta nga pagpartisipar diri kag paghatag sang ila pinakamaayo nga mga anak para mangin pulang hangaway sang Bagong Hukbong Bayan. ###