Hira kasamang Abling, kasamang Daniel ngan kasamang Nards mga dungganon nga martir ngan bayani han rebolusyon

Gregorio "Ka Roger" Rosal
Spokesperson
Communist Party of the Philippines
Oktubre 16, 2002

Hugot namon nga ginpanhimuwa an gidadakoi nga buwa ngan panguwat na naman han palpak ngan berdugo nga hi Col. Palparan nga an tulo nga patay nga lawas nga gin-ukad nira ha Mindoro mga biktima han "pagpurga" han rebolusyonaryo nga kagiusan.

Hira Ka Abling, Ka Daniel ngan Ka Nards mga martir han rebolusyon. Hi Ka Abling usa nga maisog nga pula nga kumander ngan hira Daniel ngan ka Nards mga modelo nga pula nga mangaraway han Bagong Hukbong Bayan (BHB) nga naghalad han ira kinabuhi para ha interes ngan kabubwason han katawhan Pilipino.

Namatay ini nga tulo nga mga bayani ngan martir ha usa nga madinaugon nga ambus han BHB hadton Hulyo 4, 2000 ha baryo Antonino, Victoria, Oriental Mindoro. An mga mahal nga kasama nga namatay ha nasabi nga away in ginpasidunggan han mga kasama ngan dinagmit nga ginlubong ha nasabi nga lugar atubangan han gipit nga kamutangan nga mayda pursuit operation an mga terorista ngan mersenaryo nga sundalo han reaksyunaryo nga gubyerno. An ira kabayanihan in naipaabot ha kada nira nga kapamilya ngan mahal ha kinabuhi.

Hira Kasamang Abling, Kasamang Nards ngan Kasamang Daniel mga dungganon nga komunista ngan rebolusyonaryo nga waray pagruruhaduha hin paghalad han ira kinabuhi para ha katawhan ngan ha ira rebolusyon nga pinamumunuan han dungganon nga Partido Komunista han Pilipinas. Mga modelo hira nga mga kumander ngan mangaraway han Lucio de Guzman Command ngan Melito Glor Command.

Pero an ira mga patay nga lawas in gintamastamasan, gintamakan ngan ginpasipad-an han mga mersenaryo ngan terorista nga suruguon ni Macapagal-Arroyo ha pangunguna han palpak nga berdugo nga hi Col. Palparan. An ginpalutaw ni Palparan nga hira in mga biktima han "purgahan" ha sakob han rebolusyonaryo nga kagiusan in gidadakoi nga pagtamas-tamas ha ira hinumduman.

Sanglit ini hi Palparan in napoprobaran nga gidadakoi nga palpak ha "counter-insurgency" ha Mindoro Oriental ngan Timog Katagalugan. Waray niya kaya nga himuon kundi an pumatay hin mga waray ikakaato nga mga sibilyan ngan mga lumad nga Mangyan ngan pagkatapos palutawon nga mga NPA o tagasuporta han NPA; o kundi man magpaukad hin mga patay nga lawas bisan na ha mga pampubliko nga sementeryo agud palutawon nga biktima ini han "purgahan" ha sakob han rebolusyonaryo nga kagiusan sugad han karuyag nira nga palutawon ha mga patay nga lawas nira Kasamang Abling, Kasamang Nards ngan Kasamang Daniel.

Kaparte ini han hiluag nga kampanya nga psywar han utok-pulbura ngan puno-nga-papet nga hi Macapagal-Arroyo ngan han iya mersenaryo ngan mga tinuod nga terorista nga AFP ngan PNP ha desperasyon nga iladawan nga girarauti an CPP-NPA-NDFP. Nalurong na an mga pasista kung tiunan-o pakarauton ha mata han masa an rebolusyonaryo nga kagiusan. Nagpipinanhimo na hira hin direkta nga mga buwa.

Segurado nga diri nira mapapatuod ngan mauuwat an hiluag nga katawhan Pilipino. Maaram an hiluag nga masa nga parag-uma ha bug-os nga nasud nga an tulo nga dekada nga pakigbisog han rebolusyonaryo nga kagiusan in para ha ira sanglit hinangkop hira ngan bug-os nga kasingkasing nga gin-amkon ini nga rebolusyon pinaagi han direkta nga pagpartisipar dinhi ngan paghalad han pinakamaupay nira nga mga anak para magin mga pula nga mangaraway han Bagong Hukbong Bayan.

Back to top